Devatā देवता

1-7: Aṅgirasas; 8-11: Dānastuti Of Sāvarṇi

Ṛṣi ऋषि

Nābhānediṣṭha Mānava

Chandas छन्दस्

Jagatī, Anuṣṭubh, Bṛhatī, Satobṛhatī, Gāyatrī, Triṣṭubh

1. Ṛk 1

   ये य॒ज्ञेन॒ दक्षि॑णया॒ सम॑क्ता॒ इंद्र॑स्य स॒ख्यम॑मृत॒त्वमा॑न॒श ।
   तेभ्यो॑ भ॒द्रमं॑गिरसो वो अस्तु॒ प्रति॑ गृभ्णीत मान॒वं सु॑मेधसः ॥

   ये यज्ञेन दक्षिणया समक्ता इन्द्रस्य सख्यम् अमृतत्वम् आनश |
   तेभ्यो भद्रम् अङ्गिरसो वो अस्तु प्रति गृभ्णीत मानवं सुमेधसः ||

   yé yajñéna dákṣiṇayā sámaktā índrasya sakhyámamṛtatvámānaśá ǀ
   tébhyo bhadrámaṅgiraso vo astu práti gṛbhṇīta mānavám sumedhasaḥ ǁ

   ye yajñena dakṣiṇayā samaktā indrasya sakhyam amṛtatvam ānaśa |
   tebhyo bhadram aṅgiraso vo astu prati gṛbhṇīta mānavaṃ sumedhasaḥ ||

   ये । य॒ज्ञेन॑ । दक्षि॑णया । सम्ऽअ॑क्ताः । इन्द्र॑स्य । स॒ख्यम् । अ॒मृ॒त॒ऽत्वम् । आ॒न॒श ।
   तेभ्यः॑ । भ॒द्रम् । अ॒ङ्गि॒र॒सः॒ । वः॒ । अ॒स्तु॒ । प्रति॑ । गृ॒भ्णी॒त॒ । मा॒न॒वम् । सु॒ऽमे॒ध॒सः॒ ॥

   ये । यज्ञेन । दक्षिणया । सम्ऽअक्ताः । इन्द्रस्य । सख्यम् । अमृतऽत्वम् । आनश ।
   तेभ्यः । भद्रम् । अङ्गिरसः । वः । अस्तु । प्रति । गृभ्णीत । मानवम् । सुऽमेधसः ॥

   yé ǀ yajñéna ǀ dákṣiṇayā ǀ sám-aktāḥ ǀ índrasya ǀ sakhyám ǀ amṛta-tvám ǀ ānaśá ǀ
   tébhyaḥ ǀ bhadrám ǀ aṅgirasaḥ ǀ vaḥ ǀ astu ǀ práti ǀ gṛbhṇīta ǀ mānavám ǀ su-medhasaḥ ǁ

   ye ǀ yajñena ǀ dakṣiṇayā ǀ sam-aktāḥ ǀ indrasya ǀ sakhyam ǀ amṛta-tvam ǀ ānaśa ǀ
   tebhyaḥ ǀ bhadram ǀ aṅgirasaḥ ǀ vaḥ ǀ astu ǀ prati ǀ gṛbhṇīta ǀ mānavam ǀ su-medhasaḥ ǁ

   10.62.1 Aṣṭaka 8.2.1.1Anuvāka 10.5.28Interpretations

2. Ṛk 2

   य उ॒दाज॑न्पि॒तरो॑ गो॒मयं॒ वस्वृ॒तेनाभिं॑दन्परिवत्स॒रे व॒लं ।
   दी॒र्घा॒यु॒त्वमं॑गिरसो वो अस्तु॒ प्रति॑ गृभ्णीत मान॒वं सु॑मेधसः ॥

   य उदाजन् पितरो गोमयं वस्व् ऋतेनाभिन्दन् परिवत्सरे वलम् |
   दीर्घायुत्वम् अङ्गिरसो वो अस्तु प्रति गृभ्णीत मानवं सुमेधसः ||

   yá udā́janpitáro gomáyam vásvṛténā́bhindanparivatsaré valám ǀ
   dīrghāyutvámaṅgiraso vo astu práti gṛbhṇīta mānavám sumedhasaḥ ǁ

   ya udājan pitaro gomayaṃ vasv ṛtenābhindan parivatsare valam |
   dīrghāyutvam aṅgiraso vo astu prati gṛbhṇīta mānavaṃ sumedhasaḥ ||

   ये । उ॒त्ऽआज॑न् । पि॒तरः॑ । गो॒ऽमय॑म् । वसु॑ । ऋ॒तेन॑ । अभि॑न्दन् । प॒रि॒व॒त्स॒रे । व॒लम् ।
   दी॒र्घा॒यु॒ऽत्वम् । अ॒ङ्गि॒र॒सः॒ । वः॒ । अ॒स्तु॒ । प्रति॑ । गृ॒भ्णी॒त॒ । मा॒न॒वम् । सु॒ऽमे॒ध॒सः॒ ॥

   ये । उत्ऽआजन् । पितरः । गोऽमयम् । वसु । ऋतेन । अभिन्दन् । परिवत्सरे । वलम् ।
   दीर्घायुऽत्वम् । अङ्गिरसः । वः । अस्तु । प्रति । गृभ्णीत । मानवम् । सुऽमेधसः ॥

   yé ǀ ut-ā́jan ǀ pitáraḥ ǀ go-máyam ǀ vásu ǀ ṛténa ǀ ábhindan ǀ parivatsaré ǀ valám ǀ
   dīrghāyu-tvám ǀ aṅgirasaḥ ǀ vaḥ ǀ astu ǀ práti ǀ gṛbhṇīta ǀ mānavám ǀ su-medhasaḥ ǁ

   ye ǀ ut-ājan ǀ pitaraḥ ǀ go-mayam ǀ vasu ǀ ṛtena ǀ abhindan ǀ parivatsare ǀ valam ǀ
   dīrghāyu-tvam ǀ aṅgirasaḥ ǀ vaḥ ǀ astu ǀ prati ǀ gṛbhṇīta ǀ mānavam ǀ su-medhasaḥ ǁ

   10.62.2 Aṣṭaka 8.2.1.2Anuvāka 10.5.29Interpretations

3. Ṛk 3

   य ऋ॒तेन॒ सूर्य॒मारो॑हयंदि॒व्यप्र॑थयन्पृथि॒वीं मा॒तरं॒ वि ।
   सु॒प्र॒जा॒स्त्वमं॑गिरसो वो अस्तु॒ प्रति॑ गृभ्णीत मान॒वं सु॑मेधसः ॥

   य ऋतेन सूर्यम् आरोहयन् दिव्य् अप्रथयन् पृथिवीम् मातरं वि |
   सुप्रजास्त्वम् अङ्गिरसो वो अस्तु प्रति गृभ्णीत मानवं सुमेधसः ||

   yá ṛténa sū́ryamā́rohayandivyáprathayanpṛthivī́m mātáram ví ǀ
   suprajāstvámaṅgiraso vo astu práti gṛbhṇīta mānavám sumedhasaḥ ǁ

   ya ṛtena sūryam ārohayan divy aprathayan pṛthivīm mātaraṃ vi |
   suprajāstvam aṅgiraso vo astu prati gṛbhṇīta mānavaṃ sumedhasaḥ ||

   ये । ऋ॒तेन॑ । सूर्य॑म् । आ । अरो॑हयन् । दि॒वि । अप्र॑थयन् । पृ॒थि॒वीम् । मा॒तर॑म् । वि ।
   सु॒प्र॒जाः॒ऽत्वम् । अ॒ङ्गि॒र॒सः॒ । वः॒ । अ॒स्तु॒ । प्रति॑ । गृ॒भ्णी॒त॒ । मा॒न॒वम् । सु॒ऽमे॒ध॒सः॒ ॥

   ये । ऋतेन । सूर्यम् । आ । अरोहयन् । दिवि । अप्रथयन् । पृथिवीम् । मातरम् । वि ।
   सुप्रजाःऽत्वम् । अङ्गिरसः । वः । अस्तु । प्रति । गृभ्णीत । मानवम् । सुऽमेधसः ॥

   yé ǀ ṛténa ǀ sū́ryam ǀ ā́ ǀ árohayan ǀ diví ǀ áprathayan ǀ pṛthivī́m ǀ mātáram ǀ ví ǀ
   suprajāḥ-tvám ǀ aṅgirasaḥ ǀ vaḥ ǀ astu ǀ práti ǀ gṛbhṇīta ǀ mānavám ǀ su-medhasaḥ ǁ

   ye ǀ ṛtena ǀ sūryam ǀ ā ǀ arohayan ǀ divi ǀ aprathayan ǀ pṛthivīm ǀ mātaram ǀ vi ǀ
   suprajāḥ-tvam ǀ aṅgirasaḥ ǀ vaḥ ǀ astu ǀ prati ǀ gṛbhṇīta ǀ mānavam ǀ su-medhasaḥ ǁ

   10.62.3 Aṣṭaka 8.2.1.3Anuvāka 10.5.30Interpretations

4. Ṛk 4

   अ॒यं नाभा॑ वदति व॒ल्गु वो॑ गृ॒हे देव॑पुत्रा ऋषय॒स्तच्छृ॑णोतन ।
   सु॒ब्र॒ह्म॒ण्यमं॑गिरसो वो अस्तु॒ प्रति॑ गृभ्णीत मान॒वं सु॑मेधसः ॥

   अयं नाभा वदति वल्गु वो गृहे देवपुत्रा ऋषयस् तच् छृणोतन |
   सुब्रह्मण्यम् अङ्गिरसो वो अस्तु प्रति गृभ्णीत मानवं सुमेधसः ||

   ayám nā́bhā vadati valgú vo gṛhé dévaputrā ṛṣayastácchṛṇotana ǀ
   subrahmaṇyámaṅgiraso vo astu práti gṛbhṇīta mānavám sumedhasaḥ ǁ

   ayaṃ nābhā vadati valgu vo gṛhe devaputrā ṛṣayas tac chṛṇotana |
   subrahmaṇyam aṅgiraso vo astu prati gṛbhṇīta mānavaṃ sumedhasaḥ ||

   अ॒यम् । नाभा॑ । व॒द॒ति॒ । व॒ल्गु । वः॒ । गृ॒हे । देव॑ऽपुत्राः । ऋ॒ष॒यः॒ । तत् । शृ॒णो॒त॒न॒ ।
   सु॒ऽब्र॒ह्म॒ण्यम् । अ॒ङ्गि॒र॒सः॒ । वः॒ । अ॒स्तु॒ । प्रति॑ । गृ॒भ्णी॒त॒ । मा॒न॒वम् । सु॒ऽमे॒ध॒सः॒ ॥

   अयम् । नाभा । वदति । वल्गु । वः । गृहे । देवऽपुत्राः । ऋषयः । तत् । शृणोतन ।
   सुऽब्रह्मण्यम् । अङ्गिरसः । वः । अस्तु । प्रति । गृभ्णीत । मानवम् । सुऽमेधसः ॥

   ayám ǀ nā́bhā ǀ vadati ǀ valgú ǀ vaḥ ǀ gṛhé ǀ déva-putrāḥ ǀ ṛṣayaḥ ǀ tát ǀ śṛṇotana ǀ
   su-brahmaṇyám ǀ aṅgirasaḥ ǀ vaḥ ǀ astu ǀ práti ǀ gṛbhṇīta ǀ mānavám ǀ su-medhasaḥ ǁ

   ayam ǀ nābhā ǀ vadati ǀ valgu ǀ vaḥ ǀ gṛhe ǀ deva-putrāḥ ǀ ṛṣayaḥ ǀ tat ǀ śṛṇotana ǀ
   su-brahmaṇyam ǀ aṅgirasaḥ ǀ vaḥ ǀ astu ǀ prati ǀ gṛbhṇīta ǀ mānavam ǀ su-medhasaḥ ǁ

   10.62.4 Aṣṭaka 8.2.1.4Anuvāka 10.5.31Interpretations

5. Ṛk 5

   विरू॑पास॒ इदृष॑य॒स्त इद्गं॑भी॒रवे॑पसः ।
   ते अंगि॑रसः सू॒नव॒स्ते अ॒ग्नेः परि॑ जज्ञिरे ॥

   विरूपास इद् ऋषयस् त इद् गम्भीरवेपसः |
   ते अङ्गिरसः सूनवस् ते अग्नेः परि जज्ञिरे ||

   vírūpāsa ídṛ́ṣayastá ídgambhīrávepasaḥ ǀ
   té áṅgirasaḥ sūnávasté agnéḥ pári jajñire ǁ

   virūpāsa id ṛṣayas ta id gambhīravepasaḥ |
   te aṅgirasaḥ sūnavas te agneḥ pari jajñire ||

   विऽरू॑पासः । इत् । ऋष॑यः । ते । इत् । ग॒म्भी॒रऽवे॑पसः ।
   ते । अङ्गि॑रसः । सू॒नवः॑ । ते । अ॒ग्नेः । परि॑ । ज॒ज्ञि॒रे॒ ॥

   विऽरूपासः । इत् । ऋषयः । ते । इत् । गम्भीरऽवेपसः ।
   ते । अङ्गिरसः । सूनवः । ते । अग्नेः । परि । जज्ञिरे ॥

   ví-rūpāsaḥ ǀ ít ǀ ṛ́ṣayaḥ ǀ té ǀ ít ǀ gambhīrá-vepasaḥ ǀ
   té ǀ áṅgirasaḥ ǀ sūnávaḥ ǀ té ǀ agnéḥ ǀ pári ǀ jajñire ǁ

   vi-rūpāsaḥ ǀ it ǀ ṛṣayaḥ ǀ te ǀ it ǀ gambhīra-vepasaḥ ǀ
   te ǀ aṅgirasaḥ ǀ sūnavaḥ ǀ te ǀ agneḥ ǀ pari ǀ jajñire ǁ

   10.62.5 Aṣṭaka 8.2.1.5Anuvāka 10.5.32Interpretations

6. Ṛk 6

   ये अ॒ग्नेः परि॑ जज्ञि॒रे विरू॑पासो दि॒वस्परि॑ ।
   नव॑ग्वो॒ नु दश॑ग्वो॒ अंगि॑रस्तमो॒ सचा॑ दे॒वेषु॑ मंहते ॥

   ये अग्नेः परि जज्ञिरे विरूपासो दिवस् परि |
   नवग्वो नु दशग्वो अङ्गिरस्तमो सचा देवेषु मंहते ||

   yé agnéḥ pári jajñiré vírūpāso diváspári ǀ
   návagvo nú dáśagvo áṅgirastamo sácā devéṣu maṃhate ǁ

   ye agneḥ pari jajñire virūpāso divas pari |
   navagvo nu daśagvo aṅgirastamo sacā deveṣu maṃhate ||

   ये । अ॒ग्नेः । परि॑ । ज॒ज्ञि॒रे । विऽरू॑पासः । दि॒वः । परि॑ ।
   नव॑ऽग्वः । नु । दश॑ऽग्वः । अङ्गि॑रःऽतमः । सचा॑ । दे॒वेषु॑ । मं॒ह॒ते॒ ॥

   ये । अग्नेः । परि । जज्ञिरे । विऽरूपासः । दिवः । परि ।
   नवऽग्वः । नु । दशऽग्वः । अङ्गिरःऽतमः । सचा । देवेषु । मंहते ॥

   yé ǀ agnéḥ ǀ pári ǀ jajñiré ǀ ví-rūpāsaḥ ǀ diváḥ ǀ pári ǀ
   náva-gvaḥ ǀ nú ǀ dáśa-gvaḥ ǀ áṅgiraḥ-tamaḥ ǀ sácā ǀ devéṣu ǀ maṃhate ǁ

   ye ǀ agneḥ ǀ pari ǀ jajñire ǀ vi-rūpāsaḥ ǀ divaḥ ǀ pari ǀ
   nava-gvaḥ ǀ nu ǀ daśa-gvaḥ ǀ aṅgiraḥ-tamaḥ ǀ sacā ǀ deveṣu ǀ maṃhate ǁ

   10.62.6 Aṣṭaka 8.2.2.1Anuvāka 10.5.33Interpretations

7. Ṛk 7

   इंद्रे॑ण यु॒जा निः सृ॑जंत वा॒घतो॑ व्र॒जं गोमं॑तम॒श्विनं॑ ।
   स॒हस्रं॑ मे॒ दद॑तो अष्टक॒र्ण्यः१॒॑ श्रवो॑ दे॒वेष्व॑क्रत ॥

   इन्द्रेण युजा निः सृजन्त वाघतो व्रजं गोमन्तम् अश्विनम् |
   सहस्रम् मे ददतो अष्टकर्ण्यः श्रवो देवेष्व् अक्रत ||

   índreṇa yujā́ níḥ sṛjanta vāgháto vrajám gómantamaśvínam ǀ
   sahásram me dádato aṣṭakarṇyáḥ śrávo devéṣvakrata ǁ

   indreṇa yujā niḥ sṛjanta vāghato vrajaṃ gomantam aśvinam |
   sahasram me dadato aṣṭakarṇyaḥ śravo deveṣv akrata ||

   इन्द्रे॑ण । यु॒जा । निः । सृ॒ज॒न्त॒ । वा॒घतः॑ । व्र॒जम् । गोऽम॑न्तम् । अ॒श्विन॑म् ।
   स॒हस्र॑म् । मे॒ । दद॑तः । अ॒ष्ट॒ऽक॒र्ण्यः॑ । श्रवः॑ । दे॒वेषु॑ । अ॒क्र॒त॒ ॥

   इन्द्रेण । युजा । निः । सृजन्त । वाघतः । व्रजम् । गोऽमन्तम् । अश्विनम् ।
   सहस्रम् । मे । ददतः । अष्टऽकर्ण्यः । श्रवः । देवेषु । अक्रत ॥

   índreṇa ǀ yujā́ ǀ níḥ ǀ sṛjanta ǀ vāghátaḥ ǀ vrajám ǀ gó-mantam ǀ aśvínam ǀ
   sahásram ǀ me ǀ dádataḥ ǀ aṣṭa-karṇyáḥ ǀ śrávaḥ ǀ devéṣu ǀ akrata ǁ

   indreṇa ǀ yujā ǀ niḥ ǀ sṛjanta ǀ vāghataḥ ǀ vrajam ǀ go-mantam ǀ aśvinam ǀ
   sahasram ǀ me ǀ dadataḥ ǀ aṣṭa-karṇyaḥ ǀ śravaḥ ǀ deveṣu ǀ akrata ǁ

   10.62.7 Aṣṭaka 8.2.2.2Anuvāka 10.5.34Interpretations

8. Ṛk 8

   प्र नू॒नं जा॑यताम॒यं मनु॒स्तोक्मे॑व रोहतु ।
   यः स॒हस्रं॑ श॒ताश्वं॑ स॒द्यो दा॒नाय॒ मंह॑ते ॥

   प्र नूनं जायताम् अयम् मनुस् तोक्मेव रोहतु |
   यः सहस्रं शताश्वं सद्यो दानाय मंहते ||

   prá nūnám jāyatāmayám mánustókmeva rohatu ǀ
   yáḥ sahásram śatā́śvam sadyó dānā́ya máṃhate ǁ

   pra nūnaṃ jāyatām ayam manus tokmeva rohatu |
   yaḥ sahasraṃ śatāśvaṃ sadyo dānāya maṃhate ||

   प्र । नू॒नम् । जा॒य॒ता॒म् । अ॒यम् । मनुः॑ । तोक्म॑ऽइव । रो॒ह॒तु॒ ।
   यः । स॒हस्र॑म् । श॒तऽअ॑श्वम् । स॒द्यः । दा॒नाय॑ । मंह॑ते ॥

   प्र । नूनम् । जायताम् । अयम् । मनुः । तोक्मऽइव । रोहतु ।
   यः । सहस्रम् । शतऽअश्वम् । सद्यः । दानाय । मंहते ॥

   prá ǀ nūnám ǀ jāyatām ǀ ayám ǀ mánuḥ ǀ tókma-iva ǀ rohatu ǀ
   yáḥ ǀ sahásram ǀ śatá-aśvam ǀ sadyáḥ ǀ dānā́ya ǀ máṃhate ǁ

   pra ǀ nūnam ǀ jāyatām ǀ ayam ǀ manuḥ ǀ tokma-iva ǀ rohatu ǀ
   yaḥ ǀ sahasram ǀ śata-aśvam ǀ sadyaḥ ǀ dānāya ǀ maṃhate ǁ

   10.62.8 Aṣṭaka 8.2.2.3Anuvāka 10.5.35Interpretations

9. Ṛk 9

   न तम॑श्नोति॒ कश्च॒न दि॒व इ॑व॒ सान्वा॒रभं॑ ।
   सा॒व॒र्ण्यस्य॒ दक्षि॑णा॒ वि सिंधु॑रिव पप्रथे ॥

   न तम् अश्नोति कश् चन दिव इव सान्व् आरभम् |
   सावर्ण्यस्य दक्षिणा वि सिन्धुर् इव पप्रथे ||

   ná támaśnoti káścaná divá iva sā́nvārábham ǀ
   sāvarṇyásya dákṣiṇā ví síndhuriva paprathe ǁ

   na tam aśnoti kaś cana diva iva sānv ārabham |
   sāvarṇyasya dakṣiṇā vi sindhur iva paprathe ||

   न । तम् । अ॒श्नो॒ति॒ । कः । च॒न । दि॒वःऽइ॑व । सानु॑ । आ॒ऽरभ॑म् ।
   सा॒व॒र्ण्यस्य॑ । दक्षि॑णा । वि । सिन्धुः॑ऽइव । प॒प्र॒थे॒ ॥

   न । तम् । अश्नोति । कः । चन । दिवःऽइव । सानु । आऽरभम् ।
   सावर्ण्यस्य । दक्षिणा । वि । सिन्धुःऽइव । पप्रथे ॥

   ná ǀ tám ǀ aśnoti ǀ káḥ ǀ caná ǀ diváḥ-iva ǀ sā́nu ǀ ā-rábham ǀ
   sāvarṇyásya ǀ dákṣiṇā ǀ ví ǀ síndhuḥ-iva ǀ paprathe ǁ

   na ǀ tam ǀ aśnoti ǀ kaḥ ǀ cana ǀ divaḥ-iva ǀ sānu ǀ ā-rabham ǀ
   sāvarṇyasya ǀ dakṣiṇā ǀ vi ǀ sindhuḥ-iva ǀ paprathe ǁ

   10.62.9 Aṣṭaka 8.2.2.4Anuvāka 10.5.36Interpretations

10. Ṛk 10

    उ॒त दा॒सा प॑रि॒विषे॒ स्मद्दि॑ष्टी॒ गोप॑रीणसा ।
    यदु॑स्तु॒र्वश्च॑ मामहे ॥

    उत दासा परिविषे स्मद्दिष्टी गोपरीणसा |
    यदुस् तुर्वश् च मामहे ||

    utá dāsā́ parivíṣe smáddiṣṭī góparīṇasā ǀ
    yádusturváśca māmahe ǁ

    uta dāsā pariviṣe smaddiṣṭī goparīṇasā |
    yadus turvaś ca māmahe ||

    उ॒त । दा॒सा । प॒रि॒ऽविषे॑ । स्मद्दि॑ष्टी॒ इति॒ स्मत्ऽदि॑ष्टी । गोऽप॑रीणसा ।
    यदुः॑ । तु॒र्वः । च॒ । म॒म॒हे॒ ॥

    उत । दासा । परिऽविषे । स्मद्दिष्टी इति स्मत्ऽदिष्टी । गोऽपरीणसा ।
    यदुः । तुर्वः । च । ममहे ॥

    utá ǀ dāsā́ ǀ pari-víṣe ǀ smáddiṣṭī íti smát-diṣṭī ǀ gó-parīṇasā ǀ
    yáduḥ ǀ turváḥ ǀ ca ǀ mamahe ǁ

    uta ǀ dāsā ǀ pari-viṣe ǀ smaddiṣṭī iti smat-diṣṭī ǀ go-parīṇasā ǀ
    yaduḥ ǀ turvaḥ ǀ ca ǀ mamahe ǁ

    10.62.10 Aṣṭaka 8.2.2.5Anuvāka 10.5.37Interpretations

11. Ṛk 11

    स॒ह॒स्र॒दा ग्रा॑म॒णीर्मा रि॑ष॒न्मनुः॒ सूर्ये॑णास्य॒ यत॑मानैतु॒ दक्षि॑णा ।
    साव॑र्णेर्दे॒वाः प्र ति॑रं॒त्वायु॒र्यस्मि॒न्नश्रां॑ता॒ अस॑नाम॒ वाजं॑ ॥

    सहस्रदा ग्रामणीर् मा रिषन् मनुः सूर्येणास्य यतमानैतु दक्षिणा |
    सावर्णेर् देवाः प्र तिरन्त्व् आयुर् यस्मिन्न् अश्रान्ता असनाम वाजम् ||

    sahasradā́ grāmaṇī́rmā́ riṣanmánuḥ sū́ryeṇāsya yátamānaitu dákṣiṇā ǀ
    sā́varṇerdevā́ḥ prá tirantvā́yuryásminnáśrāntā ásanāma vā́jam ǁ

    sahasradā grāmaṇīr mā riṣan manuḥ sūryeṇāsya yatamānaitu dakṣiṇā |
    sāvarṇer devāḥ pra tirantv āyur yasminn aśrāntā asanāma vājam ||

    स॒ह॒स्र॒ऽदाः । ग्रा॒म॒ऽनीः । मा । रि॒ष॒त् । मनुः॑ । सूर्ये॑ण । अ॒स्य॒ । यत॑माना । ए॒तु॒ । दक्षि॑णा ।
    साव॑र्णेः । दे॒वाः । प्र । ति॒र॒न्तु॒ । आयुः॑ । यस्मि॑न् । अश्रा॑न्ताः । अस॑नाम । वाज॑म् ॥

    सहस्रऽदाः । ग्रामऽनीः । मा । रिषत् । मनुः । सूर्येण । अस्य । यतमाना । एतु । दक्षिणा ।
    सावर्णेः । देवाः । प्र । तिरन्तु । आयुः । यस्मिन् । अश्रान्ताः । असनाम । वाजम् ॥

    sahasra-dā́ḥ ǀ grāma-nī́ḥ ǀ mā́ ǀ riṣat ǀ mánuḥ ǀ sū́ryeṇa ǀ asya ǀ yátamānā ǀ etu ǀ dákṣiṇā ǀ
    sā́varṇeḥ ǀ devā́ḥ ǀ prá ǀ tirantu ǀ ā́yuḥ ǀ yásmin ǀ áśrāntāḥ ǀ ásanāma ǀ vā́jam ǁ

    sahasra-dāḥ ǀ grāma-nīḥ ǀ mā ǀ riṣat ǀ manuḥ ǀ sūryeṇa ǀ asya ǀ yatamānā ǀ etu ǀ dakṣiṇā ǀ
    sāvarṇeḥ ǀ devāḥ ǀ pra ǀ tirantu ǀ āyuḥ ǀ yasmin ǀ aśrāntāḥ ǀ asanāma ǀ vājam ǁ

    10.62.11 Aṣṭaka 8.2.2.6Anuvāka 10.5.38Interpretations

Text, recitation and interpretations from the Ṛgveda database of theveda.org.in.