Devatā देवता

Dakṣiṇā

Ṛṣi ऋषि

Divya Āṅgirasa Or Dakṣiṇā Prājapatyā

Chandas छन्दस्

Triṣṭubh, Jagatī

1. Ṛk 1

   आ॒विर॑भू॒न्महि॒ माघो॑नमेषां॒ विश्वं॑ जी॒वं तम॑सो॒ निर॑मोचि ।
   महि॒ ज्योतिः॑ पि॒तृभि॑र्द॒त्तमागा॑दु॒रुः पंथा॒ दक्षि॑णाया अदर्शि ॥

   आविर् अभून् महि माघोनम् एषां विश्वं जीवं तमसो निर् अमोचि |
   महि ज्योतिः पितृभिर् दत्तम् आगाद् उरुः पन्था दक्षिणाया अदर्शि ||

   āvírabhūnmáhi mā́ghonameṣām víśvam jīvám támaso níramoci ǀ
   máhi jyótiḥ pitṛ́bhirdattámā́gādurúḥ pánthā dákṣiṇāyā adarśi ǁ

   āvir abhūn mahi māghonam eṣāṃ viśvaṃ jīvaṃ tamaso nir amoci |
   mahi jyotiḥ pitṛbhir dattam āgād uruḥ panthā dakṣiṇāyā adarśi ||

   आ॒विः । अ॒भू॒त् । महि॑ । माघो॑नम् । ए॒षा॒म् । विश्व॑म् । जी॒वम् । तम॑सः । निः । अ॒मो॒चि॒ ।
   महि॑ । ज्योतिः॑ । पि॒तृऽभिः॑ । द॒त्तम् । आ । अ॒गा॒त् । उ॒रुः । पन्थाः॑ । दक्षि॑णायाः । अ॒द॒र्शि॒ ॥

   आविः । अभूत् । महि । माघोनम् । एषाम् । विश्वम् । जीवम् । तमसः । निः । अमोचि ।
   महि । ज्योतिः । पितृऽभिः । दत्तम् । आ । अगात् । उरुः । पन्थाः । दक्षिणायाः । अदर्शि ॥

   āvíḥ ǀ abhūt ǀ máhi ǀ mā́ghonam ǀ eṣām ǀ víśvam ǀ jīvám ǀ támasaḥ ǀ níḥ ǀ amoci ǀ
   máhi ǀ jyótiḥ ǀ pitṛ́-bhiḥ ǀ dattám ǀ ā́ ǀ agāt ǀ urúḥ ǀ pánthāḥ ǀ dákṣiṇāyāḥ ǀ adarśi ǁ

   āviḥ ǀ abhūt ǀ mahi ǀ māghonam ǀ eṣām ǀ viśvam ǀ jīvam ǀ tamasaḥ ǀ niḥ ǀ amoci ǀ
   mahi ǀ jyotiḥ ǀ pitṛ-bhiḥ ǀ dattam ǀ ā ǀ agāt ǀ uruḥ ǀ panthāḥ ǀ dakṣiṇāyāḥ ǀ adarśi ǁ

   10.107.1 Aṣṭaka 8.6.3.1Anuvāka 10.9.83Interpretations

2. Ṛk 2

   उ॒च्चा दि॒वि दक्षि॑णावंतो अस्थु॒र्ये अ॑श्व॒दाः स॒ह ते सूर्ये॑ण ।
   हि॒र॒ण्य॒दा अ॑मृत॒त्वं भ॑जंते वासो॒दाः सो॑म॒ प्र ति॑रंत॒ आयुः॑ ॥

   उच्चा दिवि दक्षिणावन्तो अस्थुर् ये अश्वदाः सह ते सूर्येण |
   हिरण्यदा अमृतत्वम् भजन्ते वासोदाः सोम प्र तिरन्त आयुः ||

   uccā́ diví dákṣiṇāvanto asthuryé aśvadā́ḥ sahá té sū́ryeṇa ǀ
   hiraṇyadā́ amṛtatvám bhajante vāsodā́ḥ soma prá tiranta ā́yuḥ ǁ

   uccā divi dakṣiṇāvanto asthur ye aśvadāḥ saha te sūryeṇa |
   hiraṇyadā amṛtatvam bhajante vāsodāḥ soma pra tiranta āyuḥ ||

   उ॒च्चा । दि॒वि । दक्षि॑णाऽवन्तः । अ॒स्थुः॒ । ये । अ॒श्व॒ऽदाः । स॒ह । ते । सूर्ये॑ण ।
   हि॒र॒ण्य॒ऽदाः । अ॒मृ॒त॒ऽत्वम् । भ॒ज॒न्ते॒ । वा॒सः॒ऽदाः । सो॒म॒ । प्र । ति॒र॒न्ते॒ । आयुः॑ ॥

   उच्चा । दिवि । दक्षिणाऽवन्तः । अस्थुः । ये । अश्वऽदाः । सह । ते । सूर्येण ।
   हिरण्यऽदाः । अमृतऽत्वम् । भजन्ते । वासःऽदाः । सोम । प्र । तिरन्ते । आयुः ॥

   uccā́ ǀ diví ǀ dákṣiṇā-vantaḥ ǀ asthuḥ ǀ yé ǀ aśva-dā́ḥ ǀ sahá ǀ té ǀ sū́ryeṇa ǀ
   hiraṇya-dā́ḥ ǀ amṛta-tvám ǀ bhajante ǀ vāsaḥ-dā́ḥ ǀ soma ǀ prá ǀ tirante ǀ ā́yuḥ ǁ

   uccā ǀ divi ǀ dakṣiṇā-vantaḥ ǀ asthuḥ ǀ ye ǀ aśva-dāḥ ǀ saha ǀ te ǀ sūryeṇa ǀ
   hiraṇya-dāḥ ǀ amṛta-tvam ǀ bhajante ǀ vāsaḥ-dāḥ ǀ soma ǀ pra ǀ tirante ǀ āyuḥ ǁ

   10.107.2 Aṣṭaka 8.6.3.2Anuvāka 10.9.84Interpretations

3. Ṛk 3

   दैवी॑ पू॒र्तिर्दक्षि॑णा देवय॒ज्या न क॑वा॒रिभ्यो॑ न॒हि ते पृ॒णंति॑ ।
   अथा॒ नरः॒ प्रय॑तदक्षिणासोऽवद्यभि॒या ब॒हवः॑ पृणंति ॥

   दैवी पूर्तिर् दक्षिणा देवयज्या न कवारिभ्यो नहि ते पृणन्ति |
   अथा नरः प्रयतदक्षिणासो ऽवद्यभिया बहवः पृणन्ति ||

   dáivī pūrtírdákṣiṇā devayajyā́ ná kavāríbhyo nahí té pṛṇánti ǀ
   áthā náraḥ práyatadakṣiṇāso’vadyabhiyā́ bahávaḥ pṛṇanti ǁ

   daivī pūrtir dakṣiṇā devayajyā na kavāribhyo nahi te pṛṇanti |
   athā naraḥ prayatadakṣiṇāso 'vadyabhiyā bahavaḥ pṛṇanti ||

   दैवी॑ । पू॒र्तिः । दक्षि॑णा । दे॒व॒ऽय॒ज्या । न । क॒व॒ऽअ॒रिभ्यः॑ । न॒हि । ते । पृ॒णन्ति॑ ।
   अथ॑ । नरः॑ । प्रय॑तऽदक्षिणासः । अ॒व॒द्य॒ऽभि॒या । ब॒हवः॑ । पृ॒ण॒न्ति॒ ॥

   दैवी । पूर्तिः । दक्षिणा । देवऽयज्या । न । कवऽअरिभ्यः । नहि । ते । पृणन्ति ।
   अथ । नरः । प्रयतऽदक्षिणासः । अवद्यऽभिया । बहवः । पृणन्ति ॥

   dáivī ǀ pūrtíḥ ǀ dákṣiṇā ǀ deva-yajyā́ ǀ ná ǀ kava-aríbhyaḥ ǀ nahí ǀ té ǀ pṛṇánti ǀ
   átha ǀ náraḥ ǀ práyata-dakṣiṇāsaḥ ǀ avadya-bhiyā́ ǀ bahávaḥ ǀ pṛṇanti ǁ

   daivī ǀ pūrtiḥ ǀ dakṣiṇā ǀ deva-yajyā ǀ na ǀ kava-aribhyaḥ ǀ nahi ǀ te ǀ pṛṇanti ǀ
   atha ǀ naraḥ ǀ prayata-dakṣiṇāsaḥ ǀ avadya-bhiyā ǀ bahavaḥ ǀ pṛṇanti ǁ

   10.107.3 Aṣṭaka 8.6.3.3Anuvāka 10.9.85Interpretations

4. Ṛk 4

   श॒तधा॑रं वा॒युम॒र्कं स्व॒र्विदं॑ नृ॒चक्ष॑स॒स्ते अ॒भि च॑क्षते ह॒विः ।
   ये पृ॒णंति॒ प्र च॒ यच्छं॑ति संग॒मे ते दक्षि॑णां दुहते स॒प्तमा॑तरं ॥

   शतधारं वायुम् अर्कं स्वर्विदं नृचक्षसस् ते अभि चक्षते हविः |
   ये पृणन्ति प्र च यच्छन्ति संगमे ते दक्षिणां दुहते सप्तमातरम् ||

   śatádhāram vāyúmarkám svarvídam nṛcákṣasasté abhí cakṣate havíḥ ǀ
   yé pṛṇánti prá ca yácchanti saṃgamé té dákṣiṇām duhate saptámātaram ǁ

   śatadhāraṃ vāyum arkaṃ svarvidaṃ nṛcakṣasas te abhi cakṣate haviḥ |
   ye pṛṇanti pra ca yacchanti saṃgame te dakṣiṇāṃ duhate saptamātaram ||

   श॒तऽधा॑रम् । वा॒युम् । अ॒र्कम् । स्वः॒ऽविद॑म् । नृ॒ऽचक्ष॑सः । ते । अ॒भि । च॒क्ष॒ते॒ । ह॒विः ।
   ये । पृ॒णन्ति॑ । प्र । च॒ । यच्छ॑न्ति । स॒म्ऽग॒मे । ते । दक्षि॑णाम् । दु॒ह॒ते॒ । स॒प्तऽमा॑तरम् ॥

   शतऽधारम् । वायुम् । अर्कम् । स्वःऽविदम् । नृऽचक्षसः । ते । अभि । चक्षते । हविः ।
   ये । पृणन्ति । प्र । च । यच्छन्ति । सम्ऽगमे । ते । दक्षिणाम् । दुहते । सप्तऽमातरम् ॥

   śatá-dhāram ǀ vāyúm ǀ arkám ǀ svaḥ-vídam ǀ nṛ-cákṣasaḥ ǀ té ǀ abhí ǀ cakṣate ǀ havíḥ ǀ
   yé ǀ pṛṇánti ǀ prá ǀ ca ǀ yácchanti ǀ sam-gamé ǀ té ǀ dákṣiṇām ǀ duhate ǀ saptá-mātaram ǁ

   śata-dhāram ǀ vāyum ǀ arkam ǀ svaḥ-vidam ǀ nṛ-cakṣasaḥ ǀ te ǀ abhi ǀ cakṣate ǀ haviḥ ǀ
   ye ǀ pṛṇanti ǀ pra ǀ ca ǀ yacchanti ǀ sam-game ǀ te ǀ dakṣiṇām ǀ duhate ǀ sapta-mātaram ǁ

   10.107.4 Aṣṭaka 8.6.3.4Anuvāka 10.9.86Interpretations

5. Ṛk 5

   दक्षि॑णावान्प्रथ॒मो हू॒त ए॑ति॒ दक्षि॑णावान्ग्राम॒णीरग्र॑मेति ।
   तमे॒व म॑न्ये नृ॒पतिं॒ जना॑नां॒ यः प्र॑थ॒मो दक्षि॑णामावि॒वाय॑ ॥

   दक्षिणावान् प्रथमो हूत एति दक्षिणावान् ग्रामणीर् अग्रम् एति |
   तम् एव मन्ये नृपतिं जनानां यः प्रथमो दक्षिणाम् आविवाय ||

   dákṣiṇāvānprathamó hūtá eti dákṣiṇāvāngrāmaṇī́rágrameti ǀ
   támevá manye nṛpátim jánānām yáḥ prathamó dákṣiṇāmāvivā́ya ǁ

   dakṣiṇāvān prathamo hūta eti dakṣiṇāvān grāmaṇīr agram eti |
   tam eva manye nṛpatiṃ janānāṃ yaḥ prathamo dakṣiṇām āvivāya ||

   दक्षि॑णाऽवान् । प्र॒थ॒मः । हू॒तः । ए॒ति॒ । दक्षि॑णाऽवान् । ग्रा॒म॒ऽनीः । अग्र॑म् । ए॒ति॒ ।
   तम् । ए॒व । म॒न्ये॒ । नृ॒ऽपति॑म् । जना॑नाम् । यः । प्र॒थ॒मः । दक्षि॑णाम् । आ॒ऽवि॒वाय॑ ॥

   दक्षिणाऽवान् । प्रथमः । हूतः । एति । दक्षिणाऽवान् । ग्रामऽनीः । अग्रम् । एति ।
   तम् । एव । मन्ये । नृऽपतिम् । जनानाम् । यः । प्रथमः । दक्षिणाम् । आऽविवाय ॥

   dákṣiṇā-vān ǀ prathamáḥ ǀ hūtáḥ ǀ eti ǀ dákṣiṇā-vān ǀ grāma-nī́ḥ ǀ ágram ǀ eti ǀ
   tám ǀ evá ǀ manye ǀ nṛ-pátim ǀ jánānām ǀ yáḥ ǀ prathamáḥ ǀ dákṣiṇām ǀ ā-vivā́ya ǁ

   dakṣiṇā-vān ǀ prathamaḥ ǀ hūtaḥ ǀ eti ǀ dakṣiṇā-vān ǀ grāma-nīḥ ǀ agram ǀ eti ǀ
   tam ǀ eva ǀ manye ǀ nṛ-patim ǀ janānām ǀ yaḥ ǀ prathamaḥ ǀ dakṣiṇām ǀ ā-vivāya ǁ

   10.107.5 Aṣṭaka 8.6.3.5Anuvāka 10.9.87Interpretations

6. Ṛk 6

   तमे॒व ऋषिं॒ तमु॑ ब्र॒ह्माण॑माहुर्यज्ञ॒न्यं॑ साम॒गामु॑क्थ॒शासं॑ ।
   स शु॒क्रस्य॑ त॒न्वो॑ वेद ति॒स्रो यः प्र॑थ॒मो दक्षि॑णया र॒राध॑ ॥

   तम् एव ऋषिं तम् उ ब्रह्माणम् आहुर् यज्ञन्यं सामगाम् उक्थशासम् |
   स शुक्रस्य तन्वो वेद तिस्रो यः प्रथमो दक्षिणया रराध ||

   támevá ṛ́ṣim támu brahmā́ṇamāhuryajñanyám sāmagā́mukthaśā́sam ǀ
   sá śukrásya tanvó veda tisró yáḥ prathamó dákṣiṇayā rarā́dha ǁ

   tam eva ṛṣiṃ tam u brahmāṇam āhur yajñanyaṃ sāmagām ukthaśāsam |
   sa śukrasya tanvo veda tisro yaḥ prathamo dakṣiṇayā rarādha ||

   तम् । ए॒व । ऋषि॑म् । तम् । ऊं॒ इति॑ । ब्र॒ह्माण॑म् । आ॒हुः॒ । य॒ज्ञ॒ऽन्य॑म् । सा॒म॒ऽगाम् । उ॒क्थ॒ऽशस॑म् ।
   सः । शु॒क्रस्य॑ । त॒न्वः॑ । वे॒द॒ । ति॒स्रः । यः । प्र॒थ॒मः । दक्षि॑णया । र॒राध॑ ॥

   तम् । एव । ऋषिम् । तम् । ऊं इति । ब्रह्माणम् । आहुः । यज्ञऽन्यम् । सामऽगाम् । उक्थऽशसम् ।
   सः । शुक्रस्य । तन्वः । वेद । तिस्रः । यः । प्रथमः । दक्षिणया । रराध ॥

   tám ǀ evá ǀ ṛ́ṣim ǀ tám ǀ ūṃ íti ǀ brahmā́ṇam ǀ āhuḥ ǀ yajña-nyám ǀ sāma-gā́m ǀ uktha-śásam ǀ
   sáḥ ǀ śukrásya ǀ tanváḥ ǀ veda ǀ tisráḥ ǀ yáḥ ǀ prathamáḥ ǀ dákṣiṇayā ǀ rarā́dha ǁ

   tam ǀ eva ǀ ṛṣim ǀ tam ǀ ūṃ iti ǀ brahmāṇam ǀ āhuḥ ǀ yajña-nyam ǀ sāma-gām ǀ uktha-śasam ǀ
   saḥ ǀ śukrasya ǀ tanvaḥ ǀ veda ǀ tisraḥ ǀ yaḥ ǀ prathamaḥ ǀ dakṣiṇayā ǀ rarādha ǁ

   10.107.6 Aṣṭaka 8.6.4.1Anuvāka 10.9.88Interpretations

7. Ṛk 7

   दक्षि॒णाश्वं॒ दक्षि॑णा॒ गां द॑दाति॒ दक्षि॑णा चं॒द्रमु॒त यद्धिर॑ण्यं ।
   दक्षि॒णान्नं॑ वनुते॒ यो न॑ आ॒त्मा दक्षि॑णां॒ वर्म॑ कृणुते विजा॒नन् ॥

   दक्षिणाश्वं दक्षिणा गां ददाति दक्षिणा चन्द्रम् उत यद् धिरण्यम् |
   दक्षिणान्नं वनुते यो न आत्मा दक्षिणां वर्म कृणुते विजानन् ||

   dákṣiṇā́śvam dákṣiṇā gā́m dadāti dákṣiṇā candrámutá yáddhíraṇyam ǀ
   dákṣiṇā́nnam vanute yó na ātmā́ dákṣiṇām várma kṛṇute vijānán ǁ

   dakṣiṇāśvaṃ dakṣiṇā gāṃ dadāti dakṣiṇā candram uta yad dhiraṇyam |
   dakṣiṇānnaṃ vanute yo na ātmā dakṣiṇāṃ varma kṛṇute vijānan ||

   दक्षि॑णा । अश्व॑म् । दक्षि॑णा । गाम् । द॒दा॒ति॒ । दक्षि॑णा । च॒न्द्रम् । उ॒त । यत् । हिर॑ण्यम् ।
   दक्षि॑णा । अन्न॑म् । व॒नु॒ते॒ । यः । नः॒ । आ॒त्मा । दक्षि॑णाम् । वर्म॑ । कृ॒णु॒ते॒ । वि॒ऽजा॒नन् ॥

   दक्षिणा । अश्वम् । दक्षिणा । गाम् । ददाति । दक्षिणा । चन्द्रम् । उत । यत् । हिरण्यम् ।
   दक्षिणा । अन्नम् । वनुते । यः । नः । आत्मा । दक्षिणाम् । वर्म । कृणुते । विऽजानन् ॥

   dákṣiṇā ǀ áśvam ǀ dákṣiṇā ǀ gā́m ǀ dadāti ǀ dákṣiṇā ǀ candrám ǀ utá ǀ yát ǀ híraṇyam ǀ
   dákṣiṇā ǀ ánnam ǀ vanute ǀ yáḥ ǀ naḥ ǀ ātmā́ ǀ dákṣiṇām ǀ várma ǀ kṛṇute ǀ vi-jānán ǁ

   dakṣiṇā ǀ aśvam ǀ dakṣiṇā ǀ gām ǀ dadāti ǀ dakṣiṇā ǀ candram ǀ uta ǀ yat ǀ hiraṇyam ǀ
   dakṣiṇā ǀ annam ǀ vanute ǀ yaḥ ǀ naḥ ǀ ātmā ǀ dakṣiṇām ǀ varma ǀ kṛṇute ǀ vi-jānan ǁ

   10.107.7 Aṣṭaka 8.6.4.2Anuvāka 10.9.89Interpretations

8. Ṛk 8

   न भो॒जा म॑म्रु॒र्न न्य॒र्थमी॑यु॒र्न रि॑ष्यंति॒ न व्य॑थंते ह भो॒जाः ।
   इ॒दं यद्विश्वं॒ भुव॑नं॒ स्व॑श्चै॒तत्सर्वं॒ दक्षि॑णैभ्यो ददाति ॥

   न भोजा मम्रुर् न न्यर्थम् ईयुर् न रिष्यन्ति न व्यथन्ते ह भोजाः |
   इदं यद् विश्वम् भुवनं स्वश् चैतत् सर्वं दक्षिणैभ्यो ददाति ||

   ná bhojā́ mamrurná nyarthámīyurná riṣyanti ná vyathante ha bhojā́ḥ ǀ
   idám yádvíśvam bhúvanam sváścaitátsárvam dákṣiṇaibhyo dadāti ǁ

   na bhojā mamrur na nyartham īyur na riṣyanti na vyathante ha bhojāḥ |
   idaṃ yad viśvam bhuvanaṃ svaś caitat sarvaṃ dakṣiṇaibhyo dadāti ||

   न । भो॒जाः । म॒म्रुः॒ । न । नि॒ऽअ॒र्थम् । ई॒युः॒ । न । रि॒ष्य॒न्ति॒ । न । व्य॒थ॒न्ते॒ । ह॒ । भो॒जाः ।
   इ॒दम् । यत् । विश्व॑म् । भुव॑नम् । स्वः॑ । च॒ । ए॒तत् । सर्व॑म् । दक्षि॑णा । ए॒भ्यः॒ । द॒दा॒ति॒ ॥

   न । भोजाः । मम्रुः । न । निऽअर्थम् । ईयुः । न । रिष्यन्ति । न । व्यथन्ते । ह । भोजाः ।
   इदम् । यत् । विश्वम् । भुवनम् । स्वः । च । एतत् । सर्वम् । दक्षिणा । एभ्यः । ददाति ॥

   ná ǀ bhojā́ḥ ǀ mamruḥ ǀ ná ǀ ni-arthám ǀ īyuḥ ǀ ná ǀ riṣyanti ǀ ná ǀ vyathante ǀ ha ǀ bhojā́ḥ ǀ
   idám ǀ yát ǀ víśvam ǀ bhúvanam ǀ sváḥ ǀ ca ǀ etát ǀ sárvam ǀ dákṣiṇā ǀ ebhyaḥ ǀ dadāti ǁ

   na ǀ bhojāḥ ǀ mamruḥ ǀ na ǀ ni-artham ǀ īyuḥ ǀ na ǀ riṣyanti ǀ na ǀ vyathante ǀ ha ǀ bhojāḥ ǀ
   idam ǀ yat ǀ viśvam ǀ bhuvanam ǀ svaḥ ǀ ca ǀ etat ǀ sarvam ǀ dakṣiṇā ǀ ebhyaḥ ǀ dadāti ǁ

   10.107.8 Aṣṭaka 8.6.4.3Anuvāka 10.9.90Interpretations

9. Ṛk 9

   भो॒जा जि॑ग्युः सुर॒भिं योनि॒मग्रे॑ भो॒जा जि॑ग्युर्व॒ध्वं१॒॑ या सु॒वासाः॑ ।
   भो॒जा जि॑ग्युरंतः॒पेयं॒ सुरा॑या भो॒जा जि॑ग्यु॒र्ये अहू॑ताः प्र॒यंति॑ ॥

   भोजा जिग्युः सुरभिं योनिम् अग्रे भोजा जिग्युर् वध्वं या सुवासाः |
   भोजा जिग्युर् अन्तःपेयं सुराया भोजा जिग्युर् ये अहूताः प्रयन्ति ||

   bhojā́ jigyuḥ surabhím yónimágre bhojā́ jigyurvadhvám yā́ suvā́sāḥ ǀ
   bhojā́ jigyurantaḥpéyam súrāyā bhojā́ jigyuryé áhūtāḥ prayánti ǁ

   bhojā jigyuḥ surabhiṃ yonim agre bhojā jigyur vadhvaṃ yā suvāsāḥ |
   bhojā jigyur antaḥpeyaṃ surāyā bhojā jigyur ye ahūtāḥ prayanti ||

   भो॒जाः । जि॒ग्युः॒ । सु॒र॒भिम् । योनि॑म् । अग्रे॑ । भो॒जाः । जि॒ग्युः॒ । व॒ध्व॑म् । या । सु॒ऽवासाः॑ ।
   भो॒जाः । जि॒ग्युः॒ । अ॒न्तः॒ऽपेय॑म् । सुरा॑याः । भो॒जाः । जि॒ग्युः॒ । ये । अहू॑ताः । प्र॒ऽयन्ति॑ ॥

   भोजाः । जिग्युः । सुरभिम् । योनिम् । अग्रे । भोजाः । जिग्युः । वध्वम् । या । सुऽवासाः ।
   भोजाः । जिग्युः । अन्तःऽपेयम् । सुरायाः । भोजाः । जिग्युः । ये । अहूताः । प्रऽयन्ति ॥

   bhojā́ḥ ǀ jigyuḥ ǀ surabhím ǀ yónim ǀ ágre ǀ bhojā́ḥ ǀ jigyuḥ ǀ vadhvám ǀ yā́ ǀ su-vā́sāḥ ǀ
   bhojā́ḥ ǀ jigyuḥ ǀ antaḥ-péyam ǀ súrāyāḥ ǀ bhojā́ḥ ǀ jigyuḥ ǀ yé ǀ áhūtāḥ ǀ pra-yánti ǁ

   bhojāḥ ǀ jigyuḥ ǀ surabhim ǀ yonim ǀ agre ǀ bhojāḥ ǀ jigyuḥ ǀ vadhvam ǀ yā ǀ su-vāsāḥ ǀ
   bhojāḥ ǀ jigyuḥ ǀ antaḥ-peyam ǀ surāyāḥ ǀ bhojāḥ ǀ jigyuḥ ǀ ye ǀ ahūtāḥ ǀ pra-yanti ǁ

   10.107.9 Aṣṭaka 8.6.4.4Anuvāka 10.9.91Interpretations

10. Ṛk 10

    भो॒जायाश्वं॒ सं मृ॑जंत्या॒शुं भो॒जाया॑स्ते क॒न्या॒३॒॑ शुंभ॑माना ।
    भो॒जस्ये॒दं पु॑ष्क॒रिणी॑व॒ वेश्म॒ परि॑ष्कृतं देवमा॒नेव॑ चि॒त्रं ॥

    भोजायाश्वं सम् मृजन्त्य् आशुम् भोजायास्ते कन्या शुम्भमाना |
    भोजस्येदम् पुष्करिणीव वेश्म परिष्कृतं देवमानेव चित्रम् ||

    bhojā́yā́śvam sám mṛjantyāśúm bhojā́yāste kanyā́ śúmbhamānā ǀ
    bhojásyedám puṣkaríṇīva véśma páriṣkṛtam devamānéva citrám ǁ

    bhojāyāśvaṃ sam mṛjanty āśum bhojāyāste kanyā śumbhamānā |
    bhojasyedam puṣkariṇīva veśma pariṣkṛtaṃ devamāneva citram ||

    भो॒जाय॑ । अश्व॑म् । सम् । मृ॒ज॒न्ति॒ । आ॒शुम् । भो॒जाय॑ । आ॒स्ते॒ । क॒न्या॑ । शुम्भ॑माना ।
    भो॒जस्य॑ । इ॒दम् । पु॒ष्क॒रिणी॑ऽइव । वेश्म॑ । परि॑ऽकृतम् । दे॒व॒मा॒नाऽइ॑व । चि॒त्रम् ॥

    भोजाय । अश्वम् । सम् । मृजन्ति । आशुम् । भोजाय । आस्ते । कन्या । शुम्भमाना ।
    भोजस्य । इदम् । पुष्करिणीऽइव । वेश्म । परिऽकृतम् । देवमानाऽइव । चित्रम् ॥

    bhojā́ya ǀ áśvam ǀ sám ǀ mṛjanti ǀ āśúm ǀ bhojā́ya ǀ āste ǀ kanyā́ ǀ śúmbhamānā ǀ
    bhojásya ǀ idám ǀ puṣkaríṇī-iva ǀ véśma ǀ pári-kṛtam ǀ devamānā́-iva ǀ citrám ǁ

    bhojāya ǀ aśvam ǀ sam ǀ mṛjanti ǀ āśum ǀ bhojāya ǀ āste ǀ kanyā ǀ śumbhamānā ǀ
    bhojasya ǀ idam ǀ puṣkariṇī-iva ǀ veśma ǀ pari-kṛtam ǀ devamānā-iva ǀ citram ǁ

    10.107.10 Aṣṭaka 8.6.4.5Anuvāka 10.9.92Interpretations

11. Ṛk 11

    भो॒जमश्वाः॑ सुष्ठु॒वाहो॑ वहंति सु॒वृद्रथो॑ वर्तते॒ दक्षि॑णायाः ।
    भो॒जं दे॑वासोऽवता॒ भरे॑षु भो॒जः शत्रू॑न्त्समनी॒केषु॒ जेता॑ ॥

    भोजम् अश्वाः सुष्ठुवाहो वहन्ति सुवृद् रथो वर्तते दक्षिणायाः |
    भोजं देवासो ऽवता भरेषु भोजः शत्रून् समनीकेषु जेता ||

    bhojámáśvāḥ suṣṭhuvā́ho vahanti suvṛ́drátho vartate dákṣiṇāyāḥ ǀ
    bhojám devāso’vatā bháreṣu bhojáḥ śátrūntsamanīkéṣu jétā ǁ

    bhojam aśvāḥ suṣṭhuvāho vahanti suvṛd ratho vartate dakṣiṇāyāḥ |
    bhojaṃ devāso 'vatā bhareṣu bhojaḥ śatrūn samanīkeṣu jetā ||

    भो॒जम् । अश्वाः॑ । सु॒ष्ठु॒ऽवाहः॑ । व॒ह॒न्ति॒ । सु॒ऽवृत् । रथः॑ । व॒र्त॒ते॒ । दक्षि॑णायाः ।
    भो॒जम् । दे॒वा॒सः॒ । अ॒व॒त॒ । भरे॑षु । भो॒जः । शत्रू॑न् । स॒म्ऽअ॒नी॒केषु॑ । जेता॑ ॥

    भोजम् । अश्वाः । सुष्ठुऽवाहः । वहन्ति । सुऽवृत् । रथः । वर्तते । दक्षिणायाः ।
    भोजम् । देवासः । अवत । भरेषु । भोजः । शत्रून् । सम्ऽअनीकेषु । जेता ॥

    bhojám ǀ áśvāḥ ǀ suṣṭhu-vā́haḥ ǀ vahanti ǀ su-vṛ́t ǀ ráthaḥ ǀ vartate ǀ dákṣiṇāyāḥ ǀ
    bhojám ǀ devāsaḥ ǀ avata ǀ bháreṣu ǀ bhojáḥ ǀ śátrūn ǀ sam-anīkéṣu ǀ jétā ǁ

    bhojam ǀ aśvāḥ ǀ suṣṭhu-vāhaḥ ǀ vahanti ǀ su-vṛt ǀ rathaḥ ǀ vartate ǀ dakṣiṇāyāḥ ǀ
    bhojam ǀ devāsaḥ ǀ avata ǀ bhareṣu ǀ bhojaḥ ǀ śatrūn ǀ sam-anīkeṣu ǀ jetā ǁ

    10.107.11 Aṣṭaka 8.6.4.6Anuvāka 10.9.93Interpretations

Text, recitation and interpretations from the Ṛgveda database of theveda.org.in.