Devatā देवता

Indra

Ṛṣi ऋषि

Bṛhaduktha Vāmadevya

Chandas छन्दस्

Triṣṭubh

1. Ṛk 1

   तां सु ते॑ की॒र्तिं म॑घवन्महि॒त्वा यत्त्वा॑ भी॒ते रोद॑सी॒ अह्व॑येतां ।
   प्रावो॑ दे॒वाँ आति॑रो॒ दास॒मोजः॑ प्र॒जायै॑ त्वस्यै॒ यदशि॑क्ष इंद्र ॥

   तां सु ते कीर्तिम् मघवन् महित्वा यत् त्वा भीते रोदसी अह्वयेताम् |
   प्रावो देवां आतिरो दासम् ओजः प्रजायै त्वस्यै यद् अशिक्ष इन्द्र ||

   tā́m sú te kīrtím maghavanmahitvā́ yáttvā bhīté ródasī áhvayetām ǀ
   prā́vo devā́m̐ ā́tiro dā́samójaḥ prajā́yai tvasyai yádáśikṣa indra ǁ

   tāṃ su te kīrtim maghavan mahitvā yat tvā bhīte rodasī ahvayetām |
   prāvo devāṃ ātiro dāsam ojaḥ prajāyai tvasyai yad aśikṣa indra ||

   ताम् । सु । ते॒ । की॒र्तिम् । म॒घ॒ऽव॒न् । म॒हि॒ऽत्वा । यत् । त्वा॒ । भी॒ते इति॑ । रोद॑सी॒ इति॑ । अह्व॑येताम् ।
   प्र । आ॒वः॒ । दे॒वान् । आ । अ॒ति॒रः॒ । दास॑म् । ओजः॑ । प्र॒ऽजायै॑ । त्व॒स्यै॒ । यत् । अशि॑क्षः । इ॒न्द्र॒ ॥

   ताम् । सु । ते । कीर्तिम् । मघऽवन् । महिऽत्वा । यत् । त्वा । भीते इति । रोदसी इति । अह्वयेताम् ।
   प्र । आवः । देवान् । आ । अतिरः । दासम् । ओजः । प्रऽजायै । त्वस्यै । यत् । अशिक्षः । इन्द्र ॥

   tā́m ǀ sú ǀ te ǀ kīrtím ǀ magha-van ǀ mahi-tvā́ ǀ yát ǀ tvā ǀ bhīté íti ǀ ródasī íti ǀ áhvayetām ǀ
   prá ǀ āvaḥ ǀ devā́n ǀ ā́ ǀ atiraḥ ǀ dā́sam ǀ ójaḥ ǀ pra-jā́yai ǀ tvasyai ǀ yát ǀ áśikṣaḥ ǀ indra ǁ

   tām ǀ su ǀ te ǀ kīrtim ǀ magha-van ǀ mahi-tvā ǀ yat ǀ tvā ǀ bhīte iti ǀ rodasī iti ǀ ahvayetām ǀ
   pra ǀ āvaḥ ǀ devān ǀ ā ǀ atiraḥ ǀ dāsam ǀ ojaḥ ǀ pra-jāyai ǀ tvasyai ǀ yat ǀ aśikṣaḥ ǀ indra ǁ

   10.54.1 Aṣṭaka 8.1.15.1Anuvāka 10.4.108Interpretations

2. Ṛk 2

   यदच॑रस्त॒न्वा॑ वावृधा॒नो बला॑नींद्र प्रब्रुवा॒णो जने॑षु ।
   मा॒येत्सा ते॒ यानि॑ यु॒द्धान्या॒हुर्नाद्य शत्रुं॑ न॒नु पु॒रा वि॑वित्से ॥

   यद् अचरस् तन्वा वावृधानो बलानीन्द्र प्रब्रुवाणो जनेषु |
   मायेत् सा ते यानि युद्धान्य् आहुर् नाद्य शत्रुं ननु पुरा विवित्से ||

   yádácarastanvā́ vāvṛdhānó bálānīndra prabruvāṇó jáneṣu ǀ
   māyétsā́ te yā́ni yuddhā́nyāhúrnā́dyá śátrum nanú purā́ vivitse ǁ

   yad acaras tanvā vāvṛdhāno balānīndra prabruvāṇo janeṣu |
   māyet sā te yāni yuddhāny āhur nādya śatruṃ nanu purā vivitse ||

   यत् । अच॑रः । त॒न्वा॑ । व॒वृ॒धा॒नः । बला॑नि । इ॒न्द्र॒ । प्र॒ऽब्रु॒वा॒णः । जने॑षु ।
   मा॒या । इत् । सा । ते॒ । यानि॑ । यु॒द्धानि॑ । आ॒हुः । न । अ॒द्य । शत्रु॑म् । न॒नु । पु॒रा । वि॒वि॒त्से॒ ॥

   यत् । अचरः । तन्वा । ववृधानः । बलानि । इन्द्र । प्रऽब्रुवाणः । जनेषु ।
   माया । इत् । सा । ते । यानि । युद्धानि । आहुः । न । अद्य । शत्रुम् । ननु । पुरा । विवित्से ॥

   yát ǀ ácaraḥ ǀ tanvā́ ǀ vavṛdhānáḥ ǀ bálāni ǀ indra ǀ pra-bruvāṇáḥ ǀ jáneṣu ǀ
   māyā́ ǀ ít ǀ sā́ ǀ te ǀ yā́ni ǀ yuddhā́ni ǀ āhúḥ ǀ ná ǀ adyá ǀ śátrum ǀ nanú ǀ purā́ ǀ vivitse ǁ

   yat ǀ acaraḥ ǀ tanvā ǀ vavṛdhānaḥ ǀ balāni ǀ indra ǀ pra-bruvāṇaḥ ǀ janeṣu ǀ
   māyā ǀ it ǀ sā ǀ te ǀ yāni ǀ yuddhāni ǀ āhuḥ ǀ na ǀ adya ǀ śatrum ǀ nanu ǀ purā ǀ vivitse ǁ

   10.54.2 Aṣṭaka 8.1.15.2Anuvāka 10.4.109Interpretations

3. Ṛk 3

   क उ॒ नु ते॑ महि॒मनः॑ समस्या॒स्मत्पूर्व॒ ऋष॒योऽंत॑मापुः ।
   यन्मा॒तरं॑ च पि॒तरं॑ च सा॒कमज॑नयथास्त॒न्वः१॒॑ स्वायाः॑ ॥

   क उ नु ते महिमनः समस्यास्मत् पूर्व ऋषयो ऽन्तम् आपुः |
   यन् मातरं च पितरं च साकम् अजनयथास् तन्वः स्वायाः ||

   ká u nú te mahimánaḥ samasyāsmátpū́rva ṛ́ṣayó’ntamāpuḥ ǀ
   yánmātáram ca pitáram ca sākámájanayathāstanváḥ svā́yāḥ ǁ

   ka u nu te mahimanaḥ samasyāsmat pūrva ṛṣayo 'ntam āpuḥ |
   yan mātaraṃ ca pitaraṃ ca sākam ajanayathās tanvaḥ svāyāḥ ||

   के । ऊं॒ इति॑ । नु । ते॒ । म॒हि॒मनः॑ । स॒म॒स्य॒ । अ॒स्मत् । पूर्वे॑ । ऋष॑यः । अन्त॑म् । आ॒पुः॒ ।
   यत् । मा॒तर॑म् । च॒ । पि॒तर॑म् । च॒ । सा॒कम् । अज॑नयथाः । त॒न्वः॑ । स्वायाः॑ ॥

   के । ऊं इति । नु । ते । महिमनः । समस्य । अस्मत् । पूर्वे । ऋषयः । अन्तम् । आपुः ।
   यत् । मातरम् । च । पितरम् । च । साकम् । अजनयथाः । तन्वः । स्वायाः ॥

   ké ǀ ūṃ íti ǀ nú ǀ te ǀ mahimánaḥ ǀ samasya ǀ asmát ǀ pū́rve ǀ ṛ́ṣayaḥ ǀ ántam ǀ āpuḥ ǀ
   yát ǀ mātáram ǀ ca ǀ pitáram ǀ ca ǀ sākám ǀ ájanayathāḥ ǀ tanváḥ ǀ svā́yāḥ ǁ

   ke ǀ ūṃ iti ǀ nu ǀ te ǀ mahimanaḥ ǀ samasya ǀ asmat ǀ pūrve ǀ ṛṣayaḥ ǀ antam ǀ āpuḥ ǀ
   yat ǀ mātaram ǀ ca ǀ pitaram ǀ ca ǀ sākam ǀ ajanayathāḥ ǀ tanvaḥ ǀ svāyāḥ ǁ

   10.54.3 Aṣṭaka 8.1.15.3Anuvāka 10.4.110Interpretations

4. Ṛk 4

   च॒त्वारि॑ ते असु॒र्या॑णि॒ नामादा॑भ्यानि महि॒षस्य॑ संति ।
   त्वमं॒ग तानि॒ विश्वा॑नि वित्से॒ येभिः॒ कर्मा॑णि मघवंच॒कर्थ॑ ॥

   चत्वारि ते असुर्याणि नामादाभ्यानि महिषस्य सन्ति |
   त्वम् अङ्ग तानि विश्वानि वित्से येभिः कर्माणि मघवञ् चकर्थ ||

   catvā́ri te asuryā́ṇi nā́mā́dābhyāni mahiṣásya santi ǀ
   tvámaṅgá tā́ni víśvāni vitse yébhiḥ kármāṇi maghavañcakártha ǁ

   catvāri te asuryāṇi nāmādābhyāni mahiṣasya santi |
   tvam aṅga tāni viśvāni vitse yebhiḥ karmāṇi maghavañ cakartha ||

   च॒त्वारि॑ । ते॒ । अ॒सु॒र्या॑णि । नाम॑ । अदा॑भ्यानि । म॒हि॒षस्य॑ । स॒न्ति॒ ।
   त्वम् । अ॒ङ्ग । तानि॑ । विश्वा॑नि । वि॒त्से॒ । येभिः॑ । कर्मा॑णि । म॒घ॒ऽव॒न् । च॒कर्थ॑ ॥

   चत्वारि । ते । असुर्याणि । नाम । अदाभ्यानि । महिषस्य । सन्ति ।
   त्वम् । अङ्ग । तानि । विश्वानि । वित्से । येभिः । कर्माणि । मघऽवन् । चकर्थ ॥

   catvā́ri ǀ te ǀ asuryā́ṇi ǀ nā́ma ǀ ádābhyāni ǀ mahiṣásya ǀ santi ǀ
   tvám ǀ aṅgá ǀ tā́ni ǀ víśvāni ǀ vitse ǀ yébhiḥ ǀ kármāṇi ǀ magha-van ǀ cakártha ǁ

   catvāri ǀ te ǀ asuryāṇi ǀ nāma ǀ adābhyāni ǀ mahiṣasya ǀ santi ǀ
   tvam ǀ aṅga ǀ tāni ǀ viśvāni ǀ vitse ǀ yebhiḥ ǀ karmāṇi ǀ magha-van ǀ cakartha ǁ

   10.54.4 Aṣṭaka 8.1.15.4Anuvāka 10.4.111Interpretations

5. Ṛk 5

   त्वं विश्वा॑ दधिषे॒ केव॑लानि॒ यान्या॒विर्या च॒ गुहा॒ वसू॑नि ।
   काम॒मिन्मे॑ मघव॒न्मा वि ता॑री॒स्त्वमा॑ज्ञा॒ता त्वमिं॑द्रासि दा॒ता ॥

   त्वं विश्वा दधिषे केवलानि यान्य् आविर् या च गुहा वसूनि |
   कामम् इन् मे मघवन् मा वि तारीस् त्वम् आज्ञाता त्वम् इन्द्रासि दाता ||

   tvám víśvā dadhiṣe kévalāni yā́nyāvíryā́ ca gúhā vásūni ǀ
   kā́mamínme maghavanmā́ ví tārīstvámājñātā́ tvámindrāsi dātā́ ǁ

   tvaṃ viśvā dadhiṣe kevalāni yāny āvir yā ca guhā vasūni |
   kāmam in me maghavan mā vi tārīs tvam ājñātā tvam indrāsi dātā ||

   त्वम् । विश्वा॑ । द॒धि॒षे॒ । केव॑लानि । यानि॑ । आ॒विः । या । च॒ । गुहा॑ । वसू॑नि ।
   काम॑म् । इत् । मे॒ । म॒घ॒ऽव॒न् । मा । वि । ता॒रीः॒ । त्वम् । आ॒ऽज्ञा॒ता । त्वम् । इ॒न्द्र॒ । अ॒सि॒ । दा॒ता ॥

   त्वम् । विश्वा । दधिषे । केवलानि । यानि । आविः । या । च । गुहा । वसूनि ।
   कामम् । इत् । मे । मघऽवन् । मा । वि । तारीः । त्वम् । आऽज्ञाता । त्वम् । इन्द्र । असि । दाता ॥

   tvám ǀ víśvā ǀ dadhiṣe ǀ kévalāni ǀ yā́ni ǀ āvíḥ ǀ yā́ ǀ ca ǀ gúhā ǀ vásūni ǀ
   kā́mam ǀ ít ǀ me ǀ magha-van ǀ mā́ ǀ ví ǀ tārīḥ ǀ tvám ǀ ā-jñātā́ ǀ tvám ǀ indra ǀ asi ǀ dātā́ ǁ

   tvam ǀ viśvā ǀ dadhiṣe ǀ kevalāni ǀ yāni ǀ āviḥ ǀ yā ǀ ca ǀ guhā ǀ vasūni ǀ
   kāmam ǀ it ǀ me ǀ magha-van ǀ mā ǀ vi ǀ tārīḥ ǀ tvam ǀ ā-jñātā ǀ tvam ǀ indra ǀ asi ǀ dātā ǁ

   10.54.5 Aṣṭaka 8.1.15.5Anuvāka 10.4.112Interpretations

6. Ṛk 6

   यो अद॑धा॒ज्ज्योति॑षि॒ ज्योति॑रं॒तर्यो असृ॑ज॒न्मधु॑ना॒ सं मधू॑नि ।
   अध॑ प्रि॒यं शू॒षमिंद्रा॑य॒ मन्म॑ ब्रह्म॒कृतो॑ बृ॒हदु॑क्थादवाचि ॥

   यो अदधाज् ज्योतिषि ज्योतिर् अन्तर् यो असृजन् मधुना सम् मधूनि |
   अध प्रियं शूषम् इन्द्राय मन्म ब्रह्मकृतो बृहदुक्थाद् अवाचि ||

   yó ádadhājjyótiṣi jyótirantáryó ásṛjanmádhunā sám mádhūni ǀ
   ádha priyám śūṣámíndrāya mánma brahmakṛ́to bṛhádukthādavāci ǁ

   yo adadhāj jyotiṣi jyotir antar yo asṛjan madhunā sam madhūni |
   adha priyaṃ śūṣam indrāya manma brahmakṛto bṛhadukthād avāci ||

   यः । अद॑धात् । ज्योति॑षि । ज्योतिः॑ । अ॒न्तः । यः । असृ॑जत् । मधु॑ना । सम् । मधू॑नि ।
   अध॑ । प्रि॒यम् । शू॒षम् । इन्द्रा॑य । मन्म॑ । ब्र॒ह्म॒ऽकृतः॑ । बृ॒हत्ऽउ॑क्थात् । अ॒वा॒चि॒ ॥

   यः । अदधात् । ज्योतिषि । ज्योतिः । अन्तः । यः । असृजत् । मधुना । सम् । मधूनि ।
   अध । प्रियम् । शूषम् । इन्द्राय । मन्म । ब्रह्मऽकृतः । बृहत्ऽउक्थात् । अवाचि ॥

   yáḥ ǀ ádadhāt ǀ jyótiṣi ǀ jyótiḥ ǀ antáḥ ǀ yáḥ ǀ ásṛjat ǀ mádhunā ǀ sám ǀ mádhūni ǀ
   ádha ǀ priyám ǀ śūṣám ǀ índrāya ǀ mánma ǀ brahma-kṛ́taḥ ǀ bṛhát-ukthāt ǀ avāci ǁ

   yaḥ ǀ adadhāt ǀ jyotiṣi ǀ jyotiḥ ǀ antaḥ ǀ yaḥ ǀ asṛjat ǀ madhunā ǀ sam ǀ madhūni ǀ
   adha ǀ priyam ǀ śūṣam ǀ indrāya ǀ manma ǀ brahma-kṛtaḥ ǀ bṛhat-ukthāt ǀ avāci ǁ

   10.54.6 Aṣṭaka 8.1.15.6Anuvāka 10.4.113Interpretations

Text, recitation and interpretations from the Ṛgveda database of theveda.org.in.