Devatā देवता

Maruts

Ṛṣi ऋषि

Syūmaraśmi Bhārgava

Chandas छन्दस्

Triṣṭubh, Jagatī

1. Ṛk 1

   विप्रा॑सो॒ न मन्म॑भिः स्वा॒ध्यो॑ देवा॒व्यो॒३॒॑ न य॒ज्ञैः स्वप्न॑सः ।
   राजा॑नो॒ न चि॒त्राः सु॑सं॒दृशः॑ क्षिती॒नां न मर्या॑ अरे॒पसः॑ ॥

   विप्रासो न मन्मभिः स्वाध्यो देवाव्यो न यज्ञैः स्वप्नसः |
   राजानो न चित्राः सुसंदृशः क्षितीनां न मर्या अरेपसः ||

   víprāso ná mánmabhiḥ svādhyó devāvyó ná yajñáiḥ svápnasaḥ ǀ
   rā́jāno ná citrā́ḥ susaṃdṛ́śaḥ kṣitīnā́m ná máryā arepásaḥ ǁ

   viprāso na manmabhiḥ svādhyo devāvyo na yajñaiḥ svapnasaḥ |
   rājāno na citrāḥ susaṃdṛśaḥ kṣitīnāṃ na maryā arepasaḥ ||

   विप्रा॑सः । न । मन्म॑ऽभिः । सु॒ऽआ॒ध्यः॑ । दे॒व॒ऽअ॒व्यः॑ । न । य॒ज्ञैः । सु॒ऽअप्न॑सः ।
   राजा॑नः । न । चि॒त्राः । सु॒ऽस॒न्दृशः॑ । क्षि॒ती॒नाम् । न । मर्याः॑ । अ॒रे॒पसः॑ ॥

   विप्रासः । न । मन्मऽभिः । सुऽआध्यः । देवऽअव्यः । न । यज्ञैः । सुऽअप्नसः ।
   राजानः । न । चित्राः । सुऽसन्दृशः । क्षितीनाम् । न । मर्याः । अरेपसः ॥

   víprāsaḥ ǀ ná ǀ mánma-bhiḥ ǀ su-ādhyáḥ ǀ deva-avyáḥ ǀ ná ǀ yajñáiḥ ǀ su-ápnasaḥ ǀ
   rā́jānaḥ ǀ ná ǀ citrā́ḥ ǀ su-sandṛ́śaḥ ǀ kṣitīnā́m ǀ ná ǀ máryāḥ ǀ arepásaḥ ǁ

   viprāsaḥ ǀ na ǀ manma-bhiḥ ǀ su-ādhyaḥ ǀ deva-avyaḥ ǀ na ǀ yajñaiḥ ǀ su-apnasaḥ ǀ
   rājānaḥ ǀ na ǀ citrāḥ ǀ su-sandṛśaḥ ǀ kṣitīnām ǀ na ǀ maryāḥ ǀ arepasaḥ ǁ

   10.78.1 Aṣṭaka 8.3.12.1Anuvāka 10.6.86Interpretations

2. Ṛk 2

   अ॒ग्निर्न ये भ्राज॑सा रु॒क्मव॑क्षसो॒ वाता॑सो॒ न स्व॒युजः॑ स॒द्यऊ॑तयः ।
   प्र॒ज्ञा॒तारो॒ न ज्येष्ठाः॑ सुनी॒तयः॑ सु॒शर्मा॑णो॒ न सोमा॑ ऋ॒तं य॒ते ॥

   अग्निर् न ये भ्राजसा रुक्मवक्षसो वातासो न स्वयुजः सद्यऊतयः |
   प्रज्ञातारो न ज्येष्ठाः सुनीतयः सुशर्माणो न सोमा ऋतं यते ||

   agnírná yé bhrā́jasā rukmávakṣaso vā́tāso ná svayújaḥ sadyáūtayaḥ ǀ
   prajñātā́ro ná jyéṣṭhāḥ sunītáyaḥ suśármāṇo ná sómā ṛtám yaté ǁ

   agnir na ye bhrājasā rukmavakṣaso vātāso na svayujaḥ sadyaūtayaḥ |
   prajñātāro na jyeṣṭhāḥ sunītayaḥ suśarmāṇo na somā ṛtaṃ yate ||

   अ॒ग्निः । न । ये । भ्राज॑सा । रु॒क्मऽव॑क्षसः । वाता॑सः । न । स्व॒ऽयुजः॑ । स॒द्यःऽऊ॑तयः ।
   प्र॒ऽज्ञा॒तारः॑ । न । ज्येष्ठाः॑ । सु॒ऽनी॒तयः॑ । सु॒ऽशर्मा॑णः । न । सोमाः॑ । ऋ॒तम् । य॒ते ॥

   अग्निः । न । ये । भ्राजसा । रुक्मऽवक्षसः । वातासः । न । स्वऽयुजः । सद्यःऽऊतयः ।
   प्रऽज्ञातारः । न । ज्येष्ठाः । सुऽनीतयः । सुऽशर्माणः । न । सोमाः । ऋतम् । यते ॥

   agníḥ ǀ ná ǀ yé ǀ bhrā́jasā ǀ rukmá-vakṣasaḥ ǀ vā́tāsaḥ ǀ ná ǀ sva-yújaḥ ǀ sadyáḥ-ūtayaḥ ǀ
   pra-jñātā́raḥ ǀ ná ǀ jyéṣṭhāḥ ǀ su-nītáyaḥ ǀ su-śármāṇaḥ ǀ ná ǀ sómāḥ ǀ ṛtám ǀ yaté ǁ

   agniḥ ǀ na ǀ ye ǀ bhrājasā ǀ rukma-vakṣasaḥ ǀ vātāsaḥ ǀ na ǀ sva-yujaḥ ǀ sadyaḥ-ūtayaḥ ǀ
   pra-jñātāraḥ ǀ na ǀ jyeṣṭhāḥ ǀ su-nītayaḥ ǀ su-śarmāṇaḥ ǀ na ǀ somāḥ ǀ ṛtam ǀ yate ǁ

   10.78.2 Aṣṭaka 8.3.12.2Anuvāka 10.6.87Interpretations

3. Ṛk 3

   वाता॑सो॒ न ये धुन॑यो जिग॒त्नवो॑ऽग्नी॒नां न जि॒ह्वा वि॑रो॒किणः॑ ।
   वर्म॑ण्वंतो॒ न यो॒धाः शिमी॑वंतः पितॄ॒णां न शंसाः॑ सुरा॒तयः॑ ॥

   वातासो न ये धुनयो जिगत्नवो ऽग्नीनां न जिह्वा विरोकिणः |
   वर्मण्वन्तो न योधाः शिमीवन्तः पितॄणां न शंसाः सुरातयः ||

   vā́tāso ná yé dhúnayo jigatnávo’gnīnā́m ná jihvā́ virokíṇaḥ ǀ
   vármaṇvanto ná yodhā́ḥ śímīvantaḥ pitṝṇā́m ná śáṃsāḥ surātáyaḥ ǁ

   vātāso na ye dhunayo jigatnavo 'gnīnāṃ na jihvā virokiṇaḥ |
   varmaṇvanto na yodhāḥ śimīvantaḥ pitṝṇāṃ na śaṃsāḥ surātayaḥ ||

   वाता॑सः । न । ये । धुन॑यः । जि॒ग॒त्नवः॑ । अ॒ग्नी॒नाम् । न । जि॒ह्वाः । वि॒ऽरो॒किणः॑ ।
   वर्म॑ण्ऽवन्तः॑ । न । यो॒धाः । शिमी॑ऽवन्तः । पि॒तॄ॒णाम् । न । शंसाः॑ । सु॒ऽरा॒तयः॑ ॥

   वातासः । न । ये । धुनयः । जिगत्नवः । अग्नीनाम् । न । जिह्वाः । विऽरोकिणः ।
   वर्मण्ऽवन्तः । न । योधाः । शिमीऽवन्तः । पितॄणाम् । न । शंसाः । सुऽरातयः ॥

   vā́tāsaḥ ǀ ná ǀ yé ǀ dhúnayaḥ ǀ jigatnávaḥ ǀ agnīnā́m ǀ ná ǀ jihvā́ḥ ǀ vi-rokíṇaḥ ǀ
   vármaṇ-vantaḥ ǀ ná ǀ yodhā́ḥ ǀ śímī-vantaḥ ǀ pitṝṇā́m ǀ ná ǀ śáṃsāḥ ǀ su-rātáyaḥ ǁ

   vātāsaḥ ǀ na ǀ ye ǀ dhunayaḥ ǀ jigatnavaḥ ǀ agnīnām ǀ na ǀ jihvāḥ ǀ vi-rokiṇaḥ ǀ
   varmaṇ-vantaḥ ǀ na ǀ yodhāḥ ǀ śimī-vantaḥ ǀ pitṝṇām ǀ na ǀ śaṃsāḥ ǀ su-rātayaḥ ǁ

   10.78.3 Aṣṭaka 8.3.12.3Anuvāka 10.6.88Interpretations

4. Ṛk 4

   रथा॑नां॒ न ये॒३॒॑ऽराः सना॑भयो जिगी॒वांसो॒ न शूरा॑ अ॒भिद्य॑वः ।
   व॒रे॒यवो॒ न मर्या॑ घृत॒प्रुषो॑ऽभिस्व॒र्तारो॑ अ॒र्कं न सु॒ष्टुभः॑ ॥

   रथानां न ये ऽराः सनाभयो जिगीवांसो न शूरा अभिद्यवः |
   वरेयवो न मर्या घृतप्रुषो ऽभिस्वर्तारो अर्कं न सुष्टुभः ||

   ráthānām ná yé’rā́ḥ sánābhayo jigīvā́ṃso ná śū́rā abhídyavaḥ ǀ
   vareyávo ná máryā ghṛtaprúṣo’bhisvartā́ro arkám ná suṣṭúbhaḥ ǁ

   rathānāṃ na ye 'rāḥ sanābhayo jigīvāṃso na śūrā abhidyavaḥ |
   vareyavo na maryā ghṛtapruṣo 'bhisvartāro arkaṃ na suṣṭubhaḥ ||

   रथा॑नाम् । न । ये । अ॒राः । सऽना॑भयः । जि॒गी॒वांसः॑ । न । शूराः॑ । अ॒भिऽद्य॑वः ।
   व॒रे॒ऽयवः॑ । न । मर्याः॑ । घृ॒त॒ऽप्रुषः॑ । अ॒भि॒ऽस्व॒र्तारः॑ । अ॒र्कम् । न । सु॒ऽस्तुभः॑ ॥

   रथानाम् । न । ये । अराः । सऽनाभयः । जिगीवांसः । न । शूराः । अभिऽद्यवः ।
   वरेऽयवः । न । मर्याः । घृतऽप्रुषः । अभिऽस्वर्तारः । अर्कम् । न । सुऽस्तुभः ॥

   ráthānām ǀ ná ǀ yé ǀ arā́ḥ ǀ sá-nābhayaḥ ǀ jigīvā́ṃsaḥ ǀ ná ǀ śū́rāḥ ǀ abhí-dyavaḥ ǀ
   vare-yávaḥ ǀ ná ǀ máryāḥ ǀ ghṛta-prúṣaḥ ǀ abhi-svartā́raḥ ǀ arkám ǀ ná ǀ su-stúbhaḥ ǁ

   rathānām ǀ na ǀ ye ǀ arāḥ ǀ sa-nābhayaḥ ǀ jigīvāṃsaḥ ǀ na ǀ śūrāḥ ǀ abhi-dyavaḥ ǀ
   vare-yavaḥ ǀ na ǀ maryāḥ ǀ ghṛta-pruṣaḥ ǀ abhi-svartāraḥ ǀ arkam ǀ na ǀ su-stubhaḥ ǁ

   10.78.4 Aṣṭaka 8.3.12.4Anuvāka 10.6.89Interpretations

5. Ṛk 5

   अश्वा॑सो॒ न ये ज्येष्ठा॑स आ॒शवो॑ दिधि॒षवो॒ न र॒थ्यः॑ सु॒दान॑वः ।
   आपो॒ न नि॒म्नैरु॒दभि॑र्जिग॒त्नवो॑ वि॒श्वरू॑पा॒ अंगि॑रसो॒ न साम॑भिः ॥

   अश्वासो न ये ज्येष्ठास आशवो दिधिषवो न रथ्यः सुदानवः |
   आपो न निम्नैर् उदभिर् जिगत्नवो विश्वरूपा अङ्गिरसो न सामभिः ||

   áśvāso ná yé jyéṣṭhāsa āśávo didhiṣávo ná rathyáḥ sudā́navaḥ ǀ
   ā́po ná nimnáirudábhirjigatnávo viśvárūpā áṅgiraso ná sā́mabhiḥ ǁ

   aśvāso na ye jyeṣṭhāsa āśavo didhiṣavo na rathyaḥ sudānavaḥ |
   āpo na nimnair udabhir jigatnavo viśvarūpā aṅgiraso na sāmabhiḥ ||

   अश्वा॑सः । न । ये । ज्येष्ठा॑सः । आ॒शवः॑ । दि॒धि॒षवः॑ । न । र॒थ्यः॑ । सु॒ऽदान॑वः ।
   आपः॑ । न । नि॒म्नैः । उ॒दऽभिः॑ । जि॒ग॒त्नवः॑ । वि॒श्वऽरू॑पाः । अङ्गि॑रसः । न । साम॑ऽभिः ॥

   अश्वासः । न । ये । ज्येष्ठासः । आशवः । दिधिषवः । न । रथ्यः । सुऽदानवः ।
   आपः । न । निम्नैः । उदऽभिः । जिगत्नवः । विश्वऽरूपाः । अङ्गिरसः । न । सामऽभिः ॥

   áśvāsaḥ ǀ ná ǀ yé ǀ jyéṣṭhāsaḥ ǀ āśávaḥ ǀ didhiṣávaḥ ǀ ná ǀ rathyáḥ ǀ su-dā́navaḥ ǀ
   ā́paḥ ǀ ná ǀ nimnáiḥ ǀ udá-bhiḥ ǀ jigatnávaḥ ǀ viśvá-rūpāḥ ǀ áṅgirasaḥ ǀ ná ǀ sā́ma-bhiḥ ǁ

   aśvāsaḥ ǀ na ǀ ye ǀ jyeṣṭhāsaḥ ǀ āśavaḥ ǀ didhiṣavaḥ ǀ na ǀ rathyaḥ ǀ su-dānavaḥ ǀ
   āpaḥ ǀ na ǀ nimnaiḥ ǀ uda-bhiḥ ǀ jigatnavaḥ ǀ viśva-rūpāḥ ǀ aṅgirasaḥ ǀ na ǀ sāma-bhiḥ ǁ

   10.78.5 Aṣṭaka 8.3.12.5Anuvāka 10.6.90Interpretations

6. Ṛk 6

   ग्रावा॑णो॒ न सू॒रयः॒ सिंधु॑मातर आदर्दि॒रासो॒ अद्र॑यो॒ न वि॒श्वहा॑ ।
   शि॒शूला॒ न क्री॒ळयः॑ सुमा॒तरो॑ महाग्रा॒मो न याम॑न्नु॒त त्वि॒षा ॥

   ग्रावाणो न सूरयः सिन्धुमातर आदर्दिरासो अद्रयो न विश्वहा |
   शिशूला न क्रीऌअयः सुमातरो महाग्रामो न यामन्न् उत त्विषा ||

   grā́vāṇo ná sūráyaḥ síndhumātara ādardirā́so ádrayo ná viśváhā ǀ
   śiśū́lā ná krīḷáyaḥ sumātáro mahāgrāmó ná yā́mannutá tviṣā́ ǁ

   grāvāṇo na sūrayaḥ sindhumātara ādardirāso adrayo na viśvahā |
   śiśūlā na krīḷayaḥ sumātaro mahāgrāmo na yāmann uta tviṣā ||

   ग्रावा॑णः । न । सू॒रयः॑ । सिन्धु॑ऽमातरः । आ॒ऽद॒र्दि॒रासः॑ । अद्र॑यः । न । वि॒श्वहा॑ ।
   शि॒शूलाः॑ । न । क्री॒ळयः॑ । सु॒ऽमा॒तरः॑ । म॒हा॒ऽग्रा॒मः । न । याम॑न् । उ॒त । त्वि॒षा ॥

   ग्रावाणः । न । सूरयः । सिन्धुऽमातरः । आऽदर्दिरासः । अद्रयः । न । विश्वहा ।
   शिशूलाः । न । क्रीळयः । सुऽमातरः । महाऽग्रामः । न । यामन् । उत । त्विषा ॥

   grā́vāṇaḥ ǀ ná ǀ sūráyaḥ ǀ síndhu-mātaraḥ ǀ ā-dardirā́saḥ ǀ ádrayaḥ ǀ ná ǀ viśváhā ǀ
   śiśū́lāḥ ǀ ná ǀ krīḷáyaḥ ǀ su-mātáraḥ ǀ mahā-grāmáḥ ǀ ná ǀ yā́man ǀ utá ǀ tviṣā́ ǁ

   grāvāṇaḥ ǀ na ǀ sūrayaḥ ǀ sindhu-mātaraḥ ǀ ā-dardirāsaḥ ǀ adrayaḥ ǀ na ǀ viśvahā ǀ
   śiśūlāḥ ǀ na ǀ krīḷayaḥ ǀ su-mātaraḥ ǀ mahā-grāmaḥ ǀ na ǀ yāman ǀ uta ǀ tviṣā ǁ

   10.78.6 Aṣṭaka 8.3.13.1Anuvāka 10.6.91Interpretations

7. Ṛk 7

   उ॒षसां॒ न के॒तवो॑ऽध्वर॒श्रियः॑ शुभं॒यवो॒ नांजिभि॒र्व्य॑श्वितन् ।
   सिंध॑वो॒ न य॒यियो॒ भ्राज॑दृष्टयः परा॒वतो॒ न योज॑नानि ममिरे ॥

   उषसां न केतवो ऽध्वरश्रियः शुभंयवो नाञ्जिभिर् व्य् अश्वितन् |
   सिन्धवो न ययियो भ्राजदृष्टयः परावतो न योजनानि ममिरे ||

   uṣásām ná ketávo’dhvaraśríyaḥ śubhaṃyávo nā́ñjíbhirvyáśvitan ǀ
   síndhavo ná yayíyo bhrā́jadṛṣṭayaḥ parāváto ná yójanāni mamire ǁ

   uṣasāṃ na ketavo 'dhvaraśriyaḥ śubhaṃyavo nāñjibhir vy aśvitan |
   sindhavo na yayiyo bhrājadṛṣṭayaḥ parāvato na yojanāni mamire ||

   उ॒षसा॑म् । न । के॒तवः॑ । अ॒ध्व॒र॒ऽश्रियः॑ । शु॒भ॒म्ऽयवः॑ । न । अ॒ञ्जिऽभिः॑ । वि । अ॒श्वि॒त॒न् ।
   सिन्ध॑वः । न । य॒यियः॑ । भ्राज॑त्ऽऋष्टयः । प॒रा॒ऽवतः॑ । न । योज॑नानि । म॒मि॒रे॒ ॥

   उषसाम् । न । केतवः । अध्वरऽश्रियः । शुभम्ऽयवः । न । अञ्जिऽभिः । वि । अश्वितन् ।
   सिन्धवः । न । ययियः । भ्राजत्ऽऋष्टयः । पराऽवतः । न । योजनानि । ममिरे ॥

   uṣásām ǀ ná ǀ ketávaḥ ǀ adhvara-śríyaḥ ǀ śubham-yávaḥ ǀ ná ǀ añjí-bhiḥ ǀ ví ǀ aśvitan ǀ
   síndhavaḥ ǀ ná ǀ yayíyaḥ ǀ bhrā́jat-ṛṣṭayaḥ ǀ parā-vátaḥ ǀ ná ǀ yójanāni ǀ mamire ǁ

   uṣasām ǀ na ǀ ketavaḥ ǀ adhvara-śriyaḥ ǀ śubham-yavaḥ ǀ na ǀ añji-bhiḥ ǀ vi ǀ aśvitan ǀ
   sindhavaḥ ǀ na ǀ yayiyaḥ ǀ bhrājat-ṛṣṭayaḥ ǀ parā-vataḥ ǀ na ǀ yojanāni ǀ mamire ǁ

   10.78.7 Aṣṭaka 8.3.13.2Anuvāka 10.6.92Interpretations

8. Ṛk 8

   सु॒भा॒गान्नो॑ देवाः कृणुता सु॒रत्ना॑न॒स्मान्त्स्तो॒तॄन्म॑रुतो वावृधा॒नाः ।
   अधि॑ स्तो॒त्रस्य॑ स॒ख्यस्य॑ गात स॒नाद्धि वो॑ रत्न॒धेया॑नि॒ संति॑ ॥

   सुभागान् नो देवाः कृणुता सुरत्नान् अस्मान् स्तोतॄन् मरुतो वावृधानाः |
   अधि स्तोत्रस्य सख्यस्य गात सनाद् धि वो रत्नधेयानि सन्ति ||

   subhāgā́nno devāḥ kṛṇutā surátnānasmā́ntstotṝ́nmaruto vāvṛdhānā́ḥ ǀ
   ádhi stotrásya sakhyásya gāta sanā́ddhí vo ratnadhéyāni sánti ǁ

   subhāgān no devāḥ kṛṇutā suratnān asmān stotṝn maruto vāvṛdhānāḥ |
   adhi stotrasya sakhyasya gāta sanād dhi vo ratnadheyāni santi ||

   सु॒ऽभा॒गान् । नः॒ । दे॒वाः॒ । कृ॒णु॒त॒ । सु॒ऽरत्ना॑न् । अ॒स्मान् । स्तो॒तॄन् । म॒रु॒तः॒ । व॒वृ॒धा॒नाः ।
   अधि॑ । स्तो॒त्रस्य॑ । स॒ख्यस्य॑ । गा॒त॒ । स॒नात् । हि । वः॒ । र॒त्न॒ऽधेया॑नि । सन्ति॑ ॥

   सुऽभागान् । नः । देवाः । कृणुत । सुऽरत्नान् । अस्मान् । स्तोतॄन् । मरुतः । ववृधानाः ।
   अधि । स्तोत्रस्य । सख्यस्य । गात । सनात् । हि । वः । रत्नऽधेयानि । सन्ति ॥

   su-bhāgā́n ǀ naḥ ǀ devāḥ ǀ kṛṇuta ǀ su-rátnān ǀ asmā́n ǀ stotṝ́n ǀ marutaḥ ǀ vavṛdhānā́ḥ ǀ
   ádhi ǀ stotrásya ǀ sakhyásya ǀ gāta ǀ sanā́t ǀ hí ǀ vaḥ ǀ ratna-dhéyāni ǀ sánti ǁ

   su-bhāgān ǀ naḥ ǀ devāḥ ǀ kṛṇuta ǀ su-ratnān ǀ asmān ǀ stotṝn ǀ marutaḥ ǀ vavṛdhānāḥ ǀ
   adhi ǀ stotrasya ǀ sakhyasya ǀ gāta ǀ sanāt ǀ hi ǀ vaḥ ǀ ratna-dheyāni ǀ santi ǁ

   10.78.8 Aṣṭaka 8.3.13.3Anuvāka 10.6.93Interpretations

Text, recitation and interpretations from the Ṛgveda database of theveda.org.in.