Devatā देवता

Viśvedevās

Ṛṣi ऋषि

Bṛhaduktha Vāmadevya

Chandas छन्दस्

Triṣṭubh, Jagatī

1. Ṛk 1

   इ॒दं त॒ एकं॑ प॒र ऊ॑ त॒ एकं॑ तृ॒तीये॑न॒ ज्योति॑षा॒ सं वि॑शस्व ।
   सं॒वेश॑ने त॒न्व१॒॑श्चारु॑रेधि प्रि॒यो दे॒वानां॑ पर॒मे ज॒नित्रे॑ ॥

   इदं त एकम् पर ऊ त एकं तृतीयेन ज्योतिषा सं विशस्व |
   संवेशने तन्वश् चारुर् एधि प्रियो देवानाम् परमे जनित्रे ||

   idám ta ékam pará ū ta ékam tṛtī́yena jyótiṣā sám viśasva ǀ
   saṃvéśane tanváścā́ruredhi priyó devā́nām paramé janítre ǁ

   idaṃ ta ekam para ū ta ekaṃ tṛtīyena jyotiṣā saṃ viśasva |
   saṃveśane tanvaś cārur edhi priyo devānām parame janitre ||

   इ॒दम् । ते॒ । एक॑म् । प॒रः । ऊं॒ इति॑ । ते॒ । एक॑म् । तृ॒तीये॑न । ज्योति॑षा । सम् । वि॒श॒स्व॒ ।
   स॒म्ऽवेश॑ने । त॒न्वः॑ । चारुः॑ । ए॒धि॒ । प्रि॒यः । दे॒वाना॑म् । प॒र॒मे । ज॒नित्रे॑ ॥

   इदम् । ते । एकम् । परः । ऊं इति । ते । एकम् । तृतीयेन । ज्योतिषा । सम् । विशस्व ।
   सम्ऽवेशने । तन्वः । चारुः । एधि । प्रियः । देवानाम् । परमे । जनित्रे ॥

   idám ǀ te ǀ ékam ǀ paráḥ ǀ ūṃ íti ǀ te ǀ ékam ǀ tṛtī́yena ǀ jyótiṣā ǀ sám ǀ viśasva ǀ
   sam-véśane ǀ tanváḥ ǀ cā́ruḥ ǀ edhi ǀ priyáḥ ǀ devā́nām ǀ paramé ǀ janítre ǁ

   idam ǀ te ǀ ekam ǀ paraḥ ǀ ūṃ iti ǀ te ǀ ekam ǀ tṛtīyena ǀ jyotiṣā ǀ sam ǀ viśasva ǀ
   sam-veśane ǀ tanvaḥ ǀ cāruḥ ǀ edhi ǀ priyaḥ ǀ devānām ǀ parame ǀ janitre ǁ

   10.56.1 Aṣṭaka 8.1.18.1Anuvāka 10.4.122Interpretations

2. Ṛk 2

   त॒नूष्टे॑ वाजिंत॒न्वं१॒॑ नयं॑ती वा॒मम॒स्मभ्यं॒ धातु॒ शर्म॒ तुभ्यं॑ ।
   अह्रु॑तो म॒हो ध॒रुणा॑य दे॒वांदि॒वी॑व॒ ज्योतिः॒ स्वमा मि॑मीयाः ॥

   तनूष् टे वाजिन् तन्वं नयन्ती वामम् अस्मभ्यं धातु शर्म तुभ्यम् |
   अह्रुतो महो धरुणाय देवान् दिवीव ज्योतिः स्वम् आ मिमीयाः ||

   tanū́ṣṭe vājintanvám náyantī vāmámasmábhyam dhā́tu śárma túbhyam ǀ
   áhruto mahó dharúṇāya devā́ndivī́va jyótiḥ svámā́ mimīyāḥ ǁ

   tanūṣ ṭe vājin tanvaṃ nayantī vāmam asmabhyaṃ dhātu śarma tubhyam |
   ahruto maho dharuṇāya devān divīva jyotiḥ svam ā mimīyāḥ ||

   त॒नूः । ते॒ । वा॒जि॒न् । त॒न्व॑म् । नय॑न्ती । वा॒मम् । अ॒स्मभ्य॑म् । धातु॑ । शर्म॑ । तुभ्य॑म् ।
   अह्रु॑तः । म॒हः । ध॒रुणा॑य । दे॒वान् । दि॒विऽइ॑व । ज्योतिः॑ । स्वम् । आ । मि॒मी॒याः॒ ॥

   तनूः । ते । वाजिन् । तन्वम् । नयन्ती । वामम् । अस्मभ्यम् । धातु । शर्म । तुभ्यम् ।
   अह्रुतः । महः । धरुणाय । देवान् । दिविऽइव । ज्योतिः । स्वम् । आ । मिमीयाः ॥

   tanū́ḥ ǀ te ǀ vājin ǀ tanvám ǀ náyantī ǀ vāmám ǀ asmábhyam ǀ dhā́tu ǀ śárma ǀ túbhyam ǀ
   áhrutaḥ ǀ maháḥ ǀ dharúṇāya ǀ devā́n ǀ diví-iva ǀ jyótiḥ ǀ svám ǀ ā́ ǀ mimīyāḥ ǁ

   tanūḥ ǀ te ǀ vājin ǀ tanvam ǀ nayantī ǀ vāmam ǀ asmabhyam ǀ dhātu ǀ śarma ǀ tubhyam ǀ
   ahrutaḥ ǀ mahaḥ ǀ dharuṇāya ǀ devān ǀ divi-iva ǀ jyotiḥ ǀ svam ǀ ā ǀ mimīyāḥ ǁ

   10.56.2 Aṣṭaka 8.1.18.2Anuvāka 10.4.123Interpretations

3. Ṛk 3

   वा॒ज्य॑सि॒ वाजि॑नेना सुवे॒नीः सु॑वि॒तः स्तोमं॑ सुवि॒तो दिवं॑ गाः ।
   सु॒वि॒तो धर्म॑ प्रथ॒मानु॑ स॒त्या सु॑वि॒तो दे॒वान्त्सु॑वि॒तोऽनु॒ पत्म॑ ॥

   वाज्य् असि वाजिनेना सुवेनीः सुवित स्तोमं सुवितो दिवं गाः |
   सुवितो धर्म प्रथमानु सत्या सुवितो देवान् सुवितो ऽनु पत्म ||

   vājyási vā́jinenā suvenī́ḥ suvitáḥ stómam suvitó dívam gāḥ ǀ
   suvitó dhárma prathamā́nu satyā́ suvitó devā́ntsuvitó’nu pátma ǁ

   vājy asi vājinenā suvenīḥ suvita stomaṃ suvito divaṃ gāḥ |
   suvito dharma prathamānu satyā suvito devān suvito 'nu patma ||

   वा॒जी । अ॒सि॒ । वाजि॑नेन । सु॒ऽवे॒नीः । सु॒वि॒तः । स्तोम॑म् । सु॒वि॒तः । दिव॑म् । गाः॒ ।
   सु॒वि॒तः । धर्म॑ । प्र॒थ॒मा । अनु॑ । स॒त्या । सु॒वि॒तः । दे॒वान् । सु॒वि॒तः । अनु॑ । पत्म॑ ॥

   वाजी । असि । वाजिनेन । सुऽवेनीः । सुवितः । स्तोमम् । सुवितः । दिवम् । गाः ।
   सुवितः । धर्म । प्रथमा । अनु । सत्या । सुवितः । देवान् । सुवितः । अनु । पत्म ॥

   vājī́ ǀ asi ǀ vā́jinena ǀ su-venī́ḥ ǀ suvitáḥ ǀ stómam ǀ suvitáḥ ǀ dívam ǀ gāḥ ǀ
   suvitáḥ ǀ dhárma ǀ prathamā́ ǀ ánu ǀ satyā́ ǀ suvitáḥ ǀ devā́n ǀ suvitáḥ ǀ ánu ǀ pátma ǁ

   vājī ǀ asi ǀ vājinena ǀ su-venīḥ ǀ suvitaḥ ǀ stomam ǀ suvitaḥ ǀ divam ǀ gāḥ ǀ
   suvitaḥ ǀ dharma ǀ prathamā ǀ anu ǀ satyā ǀ suvitaḥ ǀ devān ǀ suvitaḥ ǀ anu ǀ patma ǁ

   10.56.3 Aṣṭaka 8.1.18.3Anuvāka 10.4.124Interpretations

4. Ṛk 4

   म॒हि॒म्न ए॑षां पि॒तर॑श्च॒नेशि॑रे दे॒वा दे॒वेष्व॑दधु॒रपि॒ क्रतुं॑ ।
   सम॑विव्यचुरु॒त यान्यत्वि॑षु॒रैषां॑ त॒नूषु॒ नि वि॑विशुः॒ पुनः॑ ॥

   महिम्न एषाम् पितरश् चनेशिरे देवा देवेष्व् अदधुर् अपि क्रतुम् |
   सम् अविव्यचुर् उत यान्य् अत्विषुर् ऐषां तनूषु नि विविशुः पुनः ||

   mahimná eṣām pitáraścanéśire devā́ devéṣvadadhurápi krátum ǀ
   sámavivyacurutá yā́nyátviṣuráiṣām tanū́ṣu ní viviśuḥ púnaḥ ǁ

   mahimna eṣām pitaraś caneśire devā deveṣv adadhur api kratum |
   sam avivyacur uta yāny atviṣur aiṣāṃ tanūṣu ni viviśuḥ punaḥ ||

   म॒हि॒म्नः । ए॒षा॒म् । पि॒तरः॑ । च॒न । ई॒शि॒रे॒ । दे॒वाः । दे॒वेषु॑ । अ॒द॒धुः॒ । अपि॑ । क्रतु॑म् ।
   सम् । अ॒वि॒व्य॒चुः॒ । उ॒त । यानि॑ । अत्वि॑षुः । आ । ए॒षा॒म् । त॒नूषु॑ । नि । वि॒वि॒शुः॒ । पुन॒रिति॑ ॥

   महिम्नः । एषाम् । पितरः । चन । ईशिरे । देवाः । देवेषु । अदधुः । अपि । क्रतुम् ।
   सम् । अविव्यचुः । उत । यानि । अत्विषुः । आ । एषाम् । तनूषु । नि । विविशुः । पुनरिति ॥

   mahimnáḥ ǀ eṣām ǀ pitáraḥ ǀ caná ǀ īśire ǀ devā́ḥ ǀ devéṣu ǀ adadhuḥ ǀ ápi ǀ krátum ǀ
   sám ǀ avivyacuḥ ǀ utá ǀ yā́ni ǀ átviṣuḥ ǀ ā́ ǀ eṣām ǀ tanū́ṣu ǀ ní ǀ viviśuḥ ǀ púnaríti ǁ

   mahimnaḥ ǀ eṣām ǀ pitaraḥ ǀ cana ǀ īśire ǀ devāḥ ǀ deveṣu ǀ adadhuḥ ǀ api ǀ kratum ǀ
   sam ǀ avivyacuḥ ǀ uta ǀ yāni ǀ atviṣuḥ ǀ ā ǀ eṣām ǀ tanūṣu ǀ ni ǀ viviśuḥ ǀ punariti ǁ

   10.56.4 Aṣṭaka 8.1.18.4Anuvāka 10.4.125Interpretations

5. Ṛk 5

   सहो॑भि॒र्विश्वं॒ परि॑ चक्रमू॒ रजः॒ पूर्वा॒ धामा॒न्यमि॑ता॒ मिमा॑नाः ।
   त॒नूषु॒ विश्वा॒ भुव॑ना॒ नि ये॑मिरे॒ प्रासा॑रयंत पुरु॒ध प्र॒जा अनु॑ ॥

   सहोभिर् विश्वम् परि चक्रमू रजः पूर्वा धामान्य् अमिता मिमानाः |
   तनूषु विश्वा भुवना नि येमिरे प्रासारयन्त पुरुध प्रजा अनु ||

   sáhobhirvíśvam pári cakramū rájaḥ pū́rvā dhā́mānyámitā mímānāḥ ǀ
   tanū́ṣu víśvā bhúvanā ní yemire prā́sārayanta purudhá prajā́ ánu ǁ

   sahobhir viśvam pari cakramū rajaḥ pūrvā dhāmāny amitā mimānāḥ |
   tanūṣu viśvā bhuvanā ni yemire prāsārayanta purudha prajā anu ||

   सहः॑ऽभिः । विश्व॑म् । परि॑ । च॒क्र॒मुः॒ । रजः॑ । पूर्वा॑ । धामा॑नि । अमि॑ता । मिमा॑नाः ।
   त॒नूषु॑ । विश्वा॑ । भुव॑ना । नि । ये॒मि॒रे॒ । प्र । अ॒सा॒र॒य॒न्त॒ । पु॒रु॒ध । प्र॒ऽजाः । अनु॑ ॥

   सहःऽभिः । विश्वम् । परि । चक्रमुः । रजः । पूर्वा । धामानि । अमिता । मिमानाः ।
   तनूषु । विश्वा । भुवना । नि । येमिरे । प्र । असारयन्त । पुरुध । प्रऽजाः । अनु ॥

   sáhaḥ-bhiḥ ǀ víśvam ǀ pári ǀ cakramuḥ ǀ rájaḥ ǀ pū́rvā ǀ dhā́māni ǀ ámitā ǀ mímānāḥ ǀ
   tanū́ṣu ǀ víśvā ǀ bhúvanā ǀ ní ǀ yemire ǀ prá ǀ asārayanta ǀ purudhá ǀ pra-jā́ḥ ǀ ánu ǁ

   sahaḥ-bhiḥ ǀ viśvam ǀ pari ǀ cakramuḥ ǀ rajaḥ ǀ pūrvā ǀ dhāmāni ǀ amitā ǀ mimānāḥ ǀ
   tanūṣu ǀ viśvā ǀ bhuvanā ǀ ni ǀ yemire ǀ pra ǀ asārayanta ǀ purudha ǀ pra-jāḥ ǀ anu ǁ

   10.56.5 Aṣṭaka 8.1.18.5Anuvāka 10.4.126Interpretations

6. Ṛk 6

   द्विधा॑ सू॒नवोऽसु॑रं स्व॒र्विद॒मास्था॑पयंत तृ॒तीये॑न॒ कर्म॑णा ।
   स्वां प्र॒जां पि॒तरः॒ पित्र्यं॒ सह॒ आव॑रेष्वदधु॒स्तंतु॒मात॑तं ॥

   द्विधा सूनवो ऽसुरं स्वर्विदम् आस्थापयन्त तृतीयेन कर्मणा |
   स्वाम् प्रजाम् पितरः पित्र्यं सह आवरेष्व् अदधुस् तन्तुम् आततम् ||

   dvídhā sūnávó’suram svarvídamā́sthāpayanta tṛtī́yena kármaṇā ǀ
   svā́m prajā́m pitáraḥ pítryam sáha ā́vareṣvadadhustántumā́tatam ǁ

   dvidhā sūnavo 'suraṃ svarvidam āsthāpayanta tṛtīyena karmaṇā |
   svām prajām pitaraḥ pitryaṃ saha āvareṣv adadhus tantum ātatam ||

   द्विधा॑ । सू॒नवः॑ । असु॑रम् । स्वः॒ऽविद॑म् । आ । अ॒स्था॒प॒य॒न्त॒ । तृ॒तीये॑न । कर्म॑णा ।
   स्वाम् । प्र॒ऽजाम् । पि॒तरः॑ । पित्र्य॑म् । सहः॑ । आ । अव॑रेषु । अ॒द॒धुः॒ । तन्तु॑म् । आऽत॑तम् ॥

   द्विधा । सूनवः । असुरम् । स्वःऽविदम् । आ । अस्थापयन्त । तृतीयेन । कर्मणा ।
   स्वाम् । प्रऽजाम् । पितरः । पित्र्यम् । सहः । आ । अवरेषु । अदधुः । तन्तुम् । आऽततम् ॥

   dvídhā ǀ sūnávaḥ ǀ ásuram ǀ svaḥ-vídam ǀ ā́ ǀ asthāpayanta ǀ tṛtī́yena ǀ kármaṇā ǀ
   svā́m ǀ pra-jā́m ǀ pitáraḥ ǀ pítryam ǀ sáhaḥ ǀ ā́ ǀ ávareṣu ǀ adadhuḥ ǀ tántum ǀ ā́-tatam ǁ

   dvidhā ǀ sūnavaḥ ǀ asuram ǀ svaḥ-vidam ǀ ā ǀ asthāpayanta ǀ tṛtīyena ǀ karmaṇā ǀ
   svām ǀ pra-jām ǀ pitaraḥ ǀ pitryam ǀ sahaḥ ǀ ā ǀ avareṣu ǀ adadhuḥ ǀ tantum ǀ ā-tatam ǁ

   10.56.6 Aṣṭaka 8.1.18.6Anuvāka 10.4.127Interpretations

7. Ṛk 7

   ना॒वा न क्षोदः॑ प्र॒दिशः॑ पृथि॒व्याः स्व॒स्तिभि॒रति॑ दु॒र्गाणि॒ विश्वा॑ ।
   स्वां प्र॒जां बृ॒हदु॑क्थो महि॒त्वाव॑रेष्वदधा॒दा परे॑षु ॥

   नावा न क्षोदः प्रदिशः पृथिव्याः स्वस्तिभिर् अति दुर्गाणि विश्वा |
   स्वाम् प्रजाम् बृहदुक्थो महित्वावरेष्व् अदधाद् आ परेषु ||

   nāvā́ ná kṣódaḥ pradíśaḥ pṛthivyā́ḥ svastíbhiráti durgā́ṇi víśvā ǀ
   svā́m prajā́m bṛháduktho mahitvā́vareṣvadadhādā́ páreṣu ǁ

   nāvā na kṣodaḥ pradiśaḥ pṛthivyāḥ svastibhir ati durgāṇi viśvā |
   svām prajām bṛhaduktho mahitvāvareṣv adadhād ā pareṣu ||

   ना॒वा । न । क्षोदः॑ । प्र॒ऽदिशः॑ । पृ॒थि॒व्याः । स्व॒स्तिऽभिः॑ । अति॑ । दुः॒ऽगानि॑ । विश्वा॑ ।
   स्वाम् । प्र॒ऽजाम् । बृ॒हत्ऽउ॑क्थः । म॒हि॒ऽत्वा । आ । अव॑रेषु । अ॒द॒धा॒त् । आ । परे॑षु ॥

   नावा । न । क्षोदः । प्रऽदिशः । पृथिव्याः । स्वस्तिऽभिः । अति । दुःऽगानि । विश्वा ।
   स्वाम् । प्रऽजाम् । बृहत्ऽउक्थः । महिऽत्वा । आ । अवरेषु । अदधात् । आ । परेषु ॥

   nāvā́ ǀ ná ǀ kṣódaḥ ǀ pra-díśaḥ ǀ pṛthivyā́ḥ ǀ svastí-bhiḥ ǀ áti ǀ duḥ-gā́ni ǀ víśvā ǀ
   svā́m ǀ pra-jā́m ǀ bṛhát-ukthaḥ ǀ mahi-tvā́ ǀ ā́ ǀ ávareṣu ǀ adadhāt ǀ ā́ ǀ páreṣu ǁ

   nāvā ǀ na ǀ kṣodaḥ ǀ pra-diśaḥ ǀ pṛthivyāḥ ǀ svasti-bhiḥ ǀ ati ǀ duḥ-gāni ǀ viśvā ǀ
   svām ǀ pra-jām ǀ bṛhat-ukthaḥ ǀ mahi-tvā ǀ ā ǀ avareṣu ǀ adadhāt ǀ ā ǀ pareṣu ǁ

   10.56.7 Aṣṭaka 8.1.18.7Anuvāka 10.4.128Interpretations

Text, recitation and interpretations from the Ṛgveda database of theveda.org.in.