Devatā देवता

Bṛhaspati

Ṛṣi ऋषि

Ayāsya Āṅgirasa

Chandas छन्दस्

Triṣṭubh

1. Ṛk 1

   उ॒द॒प्रुतो॒ न वयो॒ रक्ष॑माणा॒ वाव॑दतो अ॒भ्रिय॑स्येव॒ घोषाः॑ ।
   गि॒रि॒भ्रजो॒ नोर्मयो॒ मदं॑तो॒ बृह॒स्पति॑म॒भ्य१॒॑र्का अ॑नावन् ॥

   उदप्रुतो न वयो रक्षमाणा वावदतो अभ्रियस्येव घोषाः |
   गिरिभ्रजो नोर्मयो मदन्तो बृहस्पतिम् अभ्य् अर्का अनावन् ||

   udaprúto ná váyo rákṣamāṇā vā́vadato abhríyasyeva ghóṣāḥ ǀ
   giribhrájo nórmáyo mádanto bṛ́haspátimabhyárkā́ anāvan ǁ

   udapruto na vayo rakṣamāṇā vāvadato abhriyasyeva ghoṣāḥ |
   giribhrajo normayo madanto bṛhaspatim abhy arkā anāvan ||

   उ॒द॒ऽप्रुतः॑ । न । वयः॑ । रक्ष॑माणाः । वाव॑दतः । अ॒भ्रिय॑स्यऽइव । घोषाः॑ ।
   गि॒रि॒ऽभ्रजः॑ । न । ऊ॒र्मयः॑ । मद॑न्तः । बृह॒स्पति॑म् । अ॒भि । अ॒र्काः । अ॒ना॒व॒न् ॥

   उदऽप्रुतः । न । वयः । रक्षमाणाः । वावदतः । अभ्रियस्यऽइव । घोषाः ।
   गिरिऽभ्रजः । न । ऊर्मयः । मदन्तः । बृहस्पतिम् । अभि । अर्काः । अनावन् ॥

   uda-prútaḥ ǀ ná ǀ váyaḥ ǀ rákṣamāṇāḥ ǀ vā́vadataḥ ǀ abhríyasya-iva ǀ ghóṣāḥ ǀ
   giri-bhrájaḥ ǀ ná ǀ ūrmáyaḥ ǀ mádantaḥ ǀ bṛ́haspátim ǀ abhí ǀ arkā́ḥ ǀ anāvan ǁ

   uda-prutaḥ ǀ na ǀ vayaḥ ǀ rakṣamāṇāḥ ǀ vāvadataḥ ǀ abhriyasya-iva ǀ ghoṣāḥ ǀ
   giri-bhrajaḥ ǀ na ǀ ūrmayaḥ ǀ madantaḥ ǀ bṛhaspatim ǀ abhi ǀ arkāḥ ǀ anāvan ǁ

   10.68.1 Aṣṭaka 8.2.17.1Anuvāka 10.5.115Interpretations

2. Ṛk 2

   सं गोभि॑रांगिर॒सो नक्ष॑माणो॒ भग॑ इ॒वेद॑र्य॒मणं॑ निनाय ।
   जने॑ मि॒त्रो न दंप॑ती अनक्ति॒ बृह॑स्पते वा॒जया॒शूँरि॑वा॒जौ ॥

   सं गोभिर् आङ्गिरसो नक्षमाणो भग इवेद् अर्यमणं निनाय |
   जने मित्रो न दम्पती अनक्ति बृहस्पते वाजयाशूंर् इवाजौ ||

   sám góbhirāṅgirasó nákṣamāṇo bhága ivédaryamáṇam nināya ǀ
   jáne mitró ná dámpatī anakti bṛ́haspate vājáyāśū́m̐rivājáu ǁ

   saṃ gobhir āṅgiraso nakṣamāṇo bhaga ived aryamaṇaṃ nināya |
   jane mitro na dampatī anakti bṛhaspate vājayāśūṃr ivājau ||

   सम् । गोभिः॑ । आ॒ङ्गि॒र॒सः । नक्ष॑माणः । भगः॑ऽइव । इत् । अ॒र्य॒मण॑म् । नि॒ना॒य॒ ।
   जने॑ । मि॒त्रः । न । दम्प॑ती॒ इति॒ दम्ऽप॑ती । अ॒न॒क्ति॒ । बृह॑स्पते । वा॒जय॑ । आ॒शून्ऽइ॑व । आ॒जौ ॥

   सम् । गोभिः । आङ्गिरसः । नक्षमाणः । भगःऽइव । इत् । अर्यमणम् । निनाय ।
   जने । मित्रः । न । दम्पती इति दम्ऽपती । अनक्ति । बृहस्पते । वाजय । आशून्ऽइव । आजौ ॥

   sám ǀ góbhiḥ ǀ āṅgirasáḥ ǀ nákṣamāṇaḥ ǀ bhágaḥ-iva ǀ ít ǀ aryamáṇam ǀ nināya ǀ
   jáne ǀ mitráḥ ǀ ná ǀ dámpatī íti dám-patī ǀ anakti ǀ bṛ́haspate ǀ vājáya ǀ āśū́n-iva ǀ ājáu ǁ

   sam ǀ gobhiḥ ǀ āṅgirasaḥ ǀ nakṣamāṇaḥ ǀ bhagaḥ-iva ǀ it ǀ aryamaṇam ǀ nināya ǀ
   jane ǀ mitraḥ ǀ na ǀ dampatī iti dam-patī ǀ anakti ǀ bṛhaspate ǀ vājaya ǀ āśūn-iva ǀ ājau ǁ

   10.68.2 Aṣṭaka 8.2.17.2Anuvāka 10.5.116Interpretations

3. Ṛk 3

   सा॒ध्व॒र्या अ॑ति॒थिनी॑रिषि॒राः स्पा॒र्हाः सु॒वर्णा॑ अनव॒द्यरू॑पाः ।
   बृह॒स्पतिः॒ पर्व॑तेभ्यो वि॒तूर्या॒ निर्गा ऊ॑पे॒ यव॑मिव स्थि॒विभ्यः॑ ॥

   साध्वर्या अतिथिनीर् इषिरा स्पार्हाः सुवर्णा अनवद्यरूपाः |
   बृहस्पतिः पर्वतेभ्यो वितूर्या निर् गा ऊपे यवम् इव स्थिविभ्यः ||

   sādhvaryā́ atithínīriṣirā́ḥ spārhā́ḥ suvárṇā anavadyárūpāḥ ǀ
   bṛ́haspátiḥ párvatebhyo vitū́ryā nírgā́ ūpe yávamiva sthivíbhyaḥ ǁ

   sādhvaryā atithinīr iṣirā spārhāḥ suvarṇā anavadyarūpāḥ |
   bṛhaspatiḥ parvatebhyo vitūryā nir gā ūpe yavam iva sthivibhyaḥ ||

   सा॒धु॒ऽअ॒र्याः । अ॒ति॒थिनीः॑ । इ॒षि॒राः । स्पा॒र्हाः । सु॒ऽवर्णाः॑ । अ॒न॒व॒द्यऽरू॑पाः ।
   बृह॒स्पतिः॑ । पर्व॑तेभ्यः । वि॒ऽतूर्य॑ । निः । गाः । ऊ॒पे॒ । यव॑म्ऽइव । स्थि॒विऽभ्यः॑ ॥

   साधुऽअर्याः । अतिथिनीः । इषिराः । स्पार्हाः । सुऽवर्णाः । अनवद्यऽरूपाः ।
   बृहस्पतिः । पर्वतेभ्यः । विऽतूर्य । निः । गाः । ऊपे । यवम्ऽइव । स्थिविऽभ्यः ॥

   sādhu-aryā́ḥ ǀ atithínīḥ ǀ iṣirā́ḥ ǀ spārhā́ḥ ǀ su-várṇāḥ ǀ anavadyá-rūpāḥ ǀ
   bṛ́haspátiḥ ǀ párvatebhyaḥ ǀ vi-tū́rya ǀ níḥ ǀ gā́ḥ ǀ ūpe ǀ yávam-iva ǀ sthiví-bhyaḥ ǁ

   sādhu-aryāḥ ǀ atithinīḥ ǀ iṣirāḥ ǀ spārhāḥ ǀ su-varṇāḥ ǀ anavadya-rūpāḥ ǀ
   bṛhaspatiḥ ǀ parvatebhyaḥ ǀ vi-tūrya ǀ niḥ ǀ gāḥ ǀ ūpe ǀ yavam-iva ǀ sthivi-bhyaḥ ǁ

   10.68.3 Aṣṭaka 8.2.17.3Anuvāka 10.5.117Interpretations

4. Ṛk 4

   आ॒प्रु॒षा॒यन्मधु॑न ऋ॒तस्य॒ योनि॑मवक्षि॒पन्न॒र्क उ॒ल्कामि॑व॒ द्योः ।
   बृह॒स्पति॑रु॒द्धर॒न्नश्म॑नो॒ गा भूम्या॑ उ॒द्नेव॒ वि त्वचं॑ बिभेद ॥

   आप्रुषायन् मधुन ऋतस्य योनिम् अवक्षिपन्न् अर्क उल्काम् इव द्योः |
   बृहस्पतिर् उद्धरन्न् अश्मनो गा भूम्या उद्नेव वि त्वचम् बिभेद ||

   āpruṣāyánmádhuna ṛtásya yónimavakṣipánnarká ulkā́miva dyóḥ ǀ
   bṛ́haspátiruddhárannáśmano gā́ bhū́myā udnéva ví tvácam bibheda ǁ

   āpruṣāyan madhuna ṛtasya yonim avakṣipann arka ulkām iva dyoḥ |
   bṛhaspatir uddharann aśmano gā bhūmyā udneva vi tvacam bibheda ||

   आ॒ऽप्रु॒षा॒यन् । मधु॑ना । ऋ॒तस्य॑ । योनि॑म् । अ॒व॒ऽक्षि॒पन् । अ॒र्कः । उ॒ल्काम्ऽइ॑व । द्योः ।
   बृह॒स्पतिः॑ । उ॒द्धर॑न् । अश्म॑नः । गाः । भूम्याः॑ । उ॒द्नाऽइ॑व । वि । त्वच॑म् । बि॒भे॒द॒ ॥

   आऽप्रुषायन् । मधुना । ऋतस्य । योनिम् । अवऽक्षिपन् । अर्कः । उल्काम्ऽइव । द्योः ।
   बृहस्पतिः । उद्धरन् । अश्मनः । गाः । भूम्याः । उद्नाऽइव । वि । त्वचम् । बिभेद ॥

   ā-pruṣāyán ǀ mádhunā ǀ ṛtásya ǀ yónim ǀ ava-kṣipán ǀ arkáḥ ǀ ulkā́m-iva ǀ dyóḥ ǀ
   bṛ́haspátiḥ ǀ uddháran ǀ áśmanaḥ ǀ gā́ḥ ǀ bhū́myāḥ ǀ udnā́-iva ǀ ví ǀ tvácam ǀ bibheda ǁ

   ā-pruṣāyan ǀ madhunā ǀ ṛtasya ǀ yonim ǀ ava-kṣipan ǀ arkaḥ ǀ ulkām-iva ǀ dyoḥ ǀ
   bṛhaspatiḥ ǀ uddharan ǀ aśmanaḥ ǀ gāḥ ǀ bhūmyāḥ ǀ udnā-iva ǀ vi ǀ tvacam ǀ bibheda ǁ

   10.68.4 Aṣṭaka 8.2.17.4Anuvāka 10.5.118Interpretations

5. Ṛk 5

   अप॒ ज्योति॑षा॒ तमो॑ अं॒तरि॑क्षादु॒द्नः शीपा॑लमिव॒ वात॑ आजत् ।
   बृह॒स्पति॑रनु॒मृश्या॑ व॒लस्या॒भ्रमि॑व॒ वात॒ आ च॑क्र॒ आ गाः ॥

   अप ज्योतिषा तमो अन्तरिक्षाद् उद्नः शीपालम् इव वात आजत् |
   बृहस्पतिर् अनुमृश्या वलस्याभ्रम् इव वात आ चक्र आ गाः ||

   ápa jyótiṣā támo antárikṣādudnáḥ śī́pālamiva vā́ta ājat ǀ
   bṛ́haspátiranumṛ́śyā valásyābhrámiva vā́ta ā́ cakra ā́ gā́ḥ ǁ

   apa jyotiṣā tamo antarikṣād udnaḥ śīpālam iva vāta ājat |
   bṛhaspatir anumṛśyā valasyābhram iva vāta ā cakra ā gāḥ ||

   अप॑ । ज्योति॑षा । तमः॑ । अ॒न्तरि॑क्षात् । उ॒द्नः । शीपा॑लम्ऽइव । वातः॑ । आ॒ज॒त् ।
   बृह॒स्पतिः॑ । अ॒नु॒ऽमृश्य॑ । व॒लस्य॑ । अ॒भ्रम्ऽइ॑व । वातः॑ । आ । च॒क्रे॒ । आ । गाः ॥

   अप । ज्योतिषा । तमः । अन्तरिक्षात् । उद्नः । शीपालम्ऽइव । वातः । आजत् ।
   बृहस्पतिः । अनुऽमृश्य । वलस्य । अभ्रम्ऽइव । वातः । आ । चक्रे । आ । गाः ॥

   ápa ǀ jyótiṣā ǀ támaḥ ǀ antárikṣāt ǀ udnáḥ ǀ śī́pālam-iva ǀ vā́taḥ ǀ ājat ǀ
   bṛ́haspátiḥ ǀ anu-mṛ́śya ǀ valásya ǀ abhrám-iva ǀ vā́taḥ ǀ ā́ ǀ cakre ǀ ā́ ǀ gā́ḥ ǁ

   apa ǀ jyotiṣā ǀ tamaḥ ǀ antarikṣāt ǀ udnaḥ ǀ śīpālam-iva ǀ vātaḥ ǀ ājat ǀ
   bṛhaspatiḥ ǀ anu-mṛśya ǀ valasya ǀ abhram-iva ǀ vātaḥ ǀ ā ǀ cakre ǀ ā ǀ gāḥ ǁ

   10.68.5 Aṣṭaka 8.2.17.5Anuvāka 10.5.119Interpretations

6. Ṛk 6

   य॒दा व॒लस्य॒ पीय॑तो॒ जसुं॒ भेद्बृह॒स्पति॑रग्नि॒तपो॑भिर॒र्कैः ।
   द॒द्भिर्न जि॒ह्वा परि॑विष्ट॒माद॑दा॒विर्नि॒धीँर॑कृणोदु॒स्रिया॑णां ॥

   यदा वलस्य पीयतो जसुम् भेद् बृहस्पतिर् अग्नितपोभिर् अर्कैः |
   दद्भिर् न जिह्वा परिविष्टम् आदद् आविर् निधींर् अकृणोद् उस्रियाणाम् ||

   yadā́ valásya pī́yato jásum bhédbṛ́haspátiragnitápobhirarkáiḥ ǀ
   dadbhírná jihvā́ páriviṣṭamā́dadāvírnidhī́m̐rakṛṇodusríyāṇām ǁ

   yadā valasya pīyato jasum bhed bṛhaspatir agnitapobhir arkaiḥ |
   dadbhir na jihvā pariviṣṭam ādad āvir nidhīṃr akṛṇod usriyāṇām ||

   य॒दा । व॒लस्य॑ । पीय॑तः । जसु॑म् । भेत् । बृह॒स्पतिः॑ । अ॒ग्नि॒तपः॑ऽभिः । अ॒र्कैः ।
   द॒त्ऽभिः । न । जि॒ह्वा । परि॑ऽविष्टम् । आद॑त् । आ॒विः । नि॒ऽधीन् । अ॒कृ॒णो॒त् । उ॒स्रिया॑णाम् ॥

   यदा । वलस्य । पीयतः । जसुम् । भेत् । बृहस्पतिः । अग्नितपःऽभिः । अर्कैः ।
   दत्ऽभिः । न । जिह्वा । परिऽविष्टम् । आदत् । आविः । निऽधीन् । अकृणोत् । उस्रियाणाम् ॥

   yadā́ ǀ valásya ǀ pī́yataḥ ǀ jásum ǀ bhét ǀ bṛ́haspátiḥ ǀ agnitápaḥ-bhiḥ ǀ arkáiḥ ǀ
   dat-bhíḥ ǀ ná ǀ jihvā́ ǀ pári-viṣṭam ǀ ā́dat ǀ āvíḥ ǀ ni-dhī́n ǀ akṛṇot ǀ usríyāṇām ǁ

   yadā ǀ valasya ǀ pīyataḥ ǀ jasum ǀ bhet ǀ bṛhaspatiḥ ǀ agnitapaḥ-bhiḥ ǀ arkaiḥ ǀ
   dat-bhiḥ ǀ na ǀ jihvā ǀ pari-viṣṭam ǀ ādat ǀ āviḥ ǀ ni-dhīn ǀ akṛṇot ǀ usriyāṇām ǁ

   10.68.6 Aṣṭaka 8.2.17.6Anuvāka 10.5.120Interpretations

7. Ṛk 7

   बृह॒स्पति॒रम॑त॒ हि त्यदा॑सां॒ नाम॑ स्व॒रीणां॒ सद॑ने॒ गुहा॒ यत् ।
   आं॒डेव॑ भि॒त्त्वा श॑कु॒नस्य॒ गर्भ॒मुदु॒स्रियाः॒ पर्व॑तस्य॒ त्मना॑जत् ॥

   बृहस्पतिर् अमत हि त्यद् आसां नाम स्वरीणां सदने गुहा यत् |
   आण्डेव भित्त्वा शकुनस्य गर्भम् उद् उस्रियाः पर्वतस्य त्मनाजत् ||

   bṛ́haspátirámata hí tyádāsām nā́ma svarī́ṇām sádane gúhā yát ǀ
   āṇḍéva bhittvā́ śakunásya gárbhamúdusríyāḥ párvatasya tmánājat ǁ

   bṛhaspatir amata hi tyad āsāṃ nāma svarīṇāṃ sadane guhā yat |
   āṇḍeva bhittvā śakunasya garbham ud usriyāḥ parvatasya tmanājat ||

   बृह॒स्पतिः॑ । अम॑त । हि । त्यत् । आ॒सा॒म् । नाम॑ । स्व॒रीणा॑म् । सद॑ने । गुहा॑ । यत् ।
   आ॒ण्डाऽइ॑व । भि॒त्त्वा । श॒कु॒नस्य॑ । गर्भ॑म् । उत् । उ॒स्रियाः॑ । पर्व॑तस्य । त्मना॑ । आ॒ज॒त् ॥

   बृहस्पतिः । अमत । हि । त्यत् । आसाम् । नाम । स्वरीणाम् । सदने । गुहा । यत् ।
   आण्डाऽइव । भित्त्वा । शकुनस्य । गर्भम् । उत् । उस्रियाः । पर्वतस्य । त्मना । आजत् ॥

   bṛ́haspátiḥ ǀ ámata ǀ hí ǀ tyát ǀ āsām ǀ nā́ma ǀ svarī́ṇām ǀ sádane ǀ gúhā ǀ yát ǀ
   āṇḍā́-iva ǀ bhittvā́ ǀ śakunásya ǀ gárbham ǀ út ǀ usríyāḥ ǀ párvatasya ǀ tmánā ǀ ājat ǁ

   bṛhaspatiḥ ǀ amata ǀ hi ǀ tyat ǀ āsām ǀ nāma ǀ svarīṇām ǀ sadane ǀ guhā ǀ yat ǀ
   āṇḍā-iva ǀ bhittvā ǀ śakunasya ǀ garbham ǀ ut ǀ usriyāḥ ǀ parvatasya ǀ tmanā ǀ ājat ǁ

   10.68.7 Aṣṭaka 8.2.18.1Anuvāka 10.5.121Interpretations

8. Ṛk 8

   अश्नापि॑नद्धं॒ मधु॒ पर्य॑पश्य॒न्मत्स्यं॒ न दी॒न उ॒दनि॑ क्षि॒यंतं॑ ।
   निष्टज्ज॑भार चम॒सं न वृ॒क्षाद्बृह॒स्पति॑र्विर॒वेणा॑ वि॒कृत्य॑ ॥

   अश्नापिनद्धम् मधु पर्य् अपश्यन् मत्स्यं न दीन उदनि क्षियन्तम् |
   निष् टज् जभार चमसं न वृक्षाद् बृहस्पतिर् विरवेणा विकृत्य ||

   áśnā́pinaddham mádhu páryapaśyanmátsyam ná dīná udáni kṣiyántam ǀ
   níṣṭájjabhāra camasám ná vṛkṣā́dbṛ́haspátirviravéṇā vikṛ́tya ǁ

   aśnāpinaddham madhu pary apaśyan matsyaṃ na dīna udani kṣiyantam |
   niṣ ṭaj jabhāra camasaṃ na vṛkṣād bṛhaspatir viraveṇā vikṛtya ||

   अश्ना॑ । अपि॑ऽनद्धम् । मधु॑ । परि॑ । अ॒प॒श्य॒त् । मत्स्य॑म् । न । दी॒ने । उ॒दनि॑ । क्षि॒यन्त॑म् ।
   निः । तत् । ज॒भा॒र॒ । च॒म॒सम् । न । वृ॒क्षात् । बृह॒स्पतिः॑ । वि॒ऽर॒वेण॑ । वि॒ऽकृत्य॑ ॥

   अश्ना । अपिऽनद्धम् । मधु । परि । अपश्यत् । मत्स्यम् । न । दीने । उदनि । क्षियन्तम् ।
   निः । तत् । जभार । चमसम् । न । वृक्षात् । बृहस्पतिः । विऽरवेण । विऽकृत्य ॥

   áśnā ǀ ápi-naddham ǀ mádhu ǀ pári ǀ apaśyat ǀ mátsyam ǀ ná ǀ dīné ǀ udáni ǀ kṣiyántam ǀ
   níḥ ǀ tát ǀ jabhāra ǀ camasám ǀ ná ǀ vṛkṣā́t ǀ bṛ́haspátiḥ ǀ vi-ravéṇa ǀ vi-kṛ́tya ǁ

   aśnā ǀ api-naddham ǀ madhu ǀ pari ǀ apaśyat ǀ matsyam ǀ na ǀ dīne ǀ udani ǀ kṣiyantam ǀ
   niḥ ǀ tat ǀ jabhāra ǀ camasam ǀ na ǀ vṛkṣāt ǀ bṛhaspatiḥ ǀ vi-raveṇa ǀ vi-kṛtya ǁ

   10.68.8 Aṣṭaka 8.2.18.2Anuvāka 10.5.122Interpretations

9. Ṛk 9

   सोषाम॑विंद॒त्स स्वः१॒॑ सो अ॒ग्निं सो अ॒र्केण॒ वि ब॑बाधे॒ तमां॑सि ।
   बृह॒स्पति॒र्गोव॑पुषो व॒लस्य॒ निर्म॒ज्जानं॒ न पर्व॑णो जभार ॥

   सोषाम् अविन्दत् स स्वः सो अग्निं सो अर्केण वि बबाधे तमांसि |
   बृहस्पतिर् गोवपुषो वलस्य निर् मज्जानं न पर्वणो जभार ||

   sóṣā́mavindatsá sváḥ só agním só arkéṇa ví babādhe támāṃsi ǀ
   bṛ́haspátirgóvapuṣo valásya nírmajjā́nam ná párvaṇo jabhāra ǁ

   soṣām avindat sa svaḥ so agniṃ so arkeṇa vi babādhe tamāṃsi |
   bṛhaspatir govapuṣo valasya nir majjānaṃ na parvaṇo jabhāra ||

   सः । उ॒षाम् । अ॒वि॒न्द॒त् । सः । स्व१॒॑रिति॑ स्वः॑ । सः । अ॒ग्निम् । सः । अ॒र्केण॑ । वि । ब॒बा॒धे॒ । तमां॑सि ।
   बृह॒स्पतिः॑ । गोऽव॑पुषः । व॒लस्य॑ । निः । म॒ज्जान॑म् । न । पर्व॑णः । ज॒भा॒र॒ ॥

   सः । उषाम् । अविन्दत् । सः । स्वरिति स्वः । सः । अग्निम् । सः । अर्केण । वि । बबाधे । तमांसि ।
   बृहस्पतिः । गोऽवपुषः । वलस्य । निः । मज्जानम् । न । पर्वणः । जभार ॥

   sáḥ ǀ uṣā́m ǀ avindat ǀ sáḥ ǀ sváríti sváḥ ǀ sáḥ ǀ agním ǀ sáḥ ǀ arkéṇa ǀ ví ǀ babādhe ǀ támāṃsi ǀ
   bṛ́haspátiḥ ǀ gó-vapuṣaḥ ǀ valásya ǀ níḥ ǀ majjā́nam ǀ ná ǀ párvaṇaḥ ǀ jabhāra ǁ

   saḥ ǀ uṣām ǀ avindat ǀ saḥ ǀ svariti svaḥ ǀ saḥ ǀ agnim ǀ saḥ ǀ arkeṇa ǀ vi ǀ babādhe ǀ tamāṃsi ǀ
   bṛhaspatiḥ ǀ go-vapuṣaḥ ǀ valasya ǀ niḥ ǀ majjānam ǀ na ǀ parvaṇaḥ ǀ jabhāra ǁ

   10.68.9 Aṣṭaka 8.2.18.3Anuvāka 10.5.123Interpretations

10. Ṛk 10

    हि॒मेव॑ प॒र्णा मु॑षि॒ता वना॑नि॒ बृह॒स्पति॑नाकृपयद्व॒लो गाः ।
    अ॒ना॒नु॒कृ॒त्यम॑पु॒नश्च॑कार॒ यात्सूर्या॒मासा॑ मि॒थ उ॒च्चरा॑तः ॥

    हिमेव पर्णा मुषिता वनानि बृहस्पतिनाकृपयद् वलो गाः |
    अनानुकृत्यम् अपुनश् चकार यात् सूर्यामासा मिथ उच्चरातः ||

    himéva parṇā́ muṣitā́ vánāni bṛ́haspátinākṛpayadvaló gā́ḥ ǀ
    anānukṛtyámapunáścakāra yā́tsū́ryāmā́sā mithá uccárātaḥ ǁ

    himeva parṇā muṣitā vanāni bṛhaspatinākṛpayad valo gāḥ |
    anānukṛtyam apunaś cakāra yāt sūryāmāsā mitha uccarātaḥ ||

    हि॒माऽइ॑व । प॒र्णा । मु॒षि॒ता । वना॑नि । बृह॒स्पति॑ना । अ॒कृ॒प॒य॒त् । व॒लः । गाः ।
    अ॒न॒नु॒ऽकृ॒त्यम् । अ॒पु॒नरिति॑ । च॒का॒र॒ । यात् । सूर्या॒मासा॑ । मि॒थः । उ॒त्ऽचरा॑तः ॥

    हिमाऽइव । पर्णा । मुषिता । वनानि । बृहस्पतिना । अकृपयत् । वलः । गाः ।
    अननुऽकृत्यम् । अपुनरिति । चकार । यात् । सूर्यामासा । मिथः । उत्ऽचरातः ॥

    himā́-iva ǀ parṇā́ ǀ muṣitā́ ǀ vánāni ǀ bṛ́haspátinā ǀ akṛpayat ǀ valáḥ ǀ gā́ḥ ǀ
    ananu-kṛtyám ǀ apunáríti ǀ cakāra ǀ yā́t ǀ sū́ryāmā́sā ǀ mitháḥ ǀ ut-cárātaḥ ǁ

    himā-iva ǀ parṇā ǀ muṣitā ǀ vanāni ǀ bṛhaspatinā ǀ akṛpayat ǀ valaḥ ǀ gāḥ ǀ
    ananu-kṛtyam ǀ apunariti ǀ cakāra ǀ yāt ǀ sūryāmāsā ǀ mithaḥ ǀ ut-carātaḥ ǁ

    10.68.10 Aṣṭaka 8.2.18.4Anuvāka 10.5.124Interpretations

11. Ṛk 11

    अ॒भि श्या॒वं न कृश॑नेभि॒रश्वं॒ नक्ष॑त्रेभिः पि॒तरो॒ द्याम॑पिंशन् ।
    रात्र्यां॒ तमो॒ अद॑धु॒र्ज्योति॒रह॒न्बृह॒स्पति॑र्भि॒नदद्रिं॑ वि॒दद्गाः ॥

    अभि श्यावं न कृशनेभिर् अश्वं नक्षत्रेभिः पितरो द्याम् अपिंशन् |
    रात्र्यां तमो अदधुर् ज्योतिर् अहन् बृहस्पतिर् भिनद् अद्रिं विदद् गाः ||

    abhí śyāvám ná kṛ́śanebhiráśvam nákṣatrebhiḥ pitáro dyā́mapiṃśan ǀ
    rā́tryām támo ádadhurjyótiráhanbṛ́haspátirbhinádádrim vidádgā́ḥ ǁ

    abhi śyāvaṃ na kṛśanebhir aśvaṃ nakṣatrebhiḥ pitaro dyām apiṃśan |
    rātryāṃ tamo adadhur jyotir ahan bṛhaspatir bhinad adriṃ vidad gāḥ ||

    अ॒भि । श्या॒वम् । न । कृश॑नेभिः । अश्व॑म् । नक्ष॑त्रेभिः । पि॒तरः॑ । द्याम् । अ॒पिं॒श॒न् ।
    रात्र्या॑म् । तमः॑ । अद॑धुः । ज्योतिः॑ । अह॑न् । बृह॒स्पतिः॑ । भि॒नत् । अद्रि॑म् । वि॒दत् । गाः ॥

    अभि । श्यावम् । न । कृशनेभिः । अश्वम् । नक्षत्रेभिः । पितरः । द्याम् । अपिंशन् ।
    रात्र्याम् । तमः । अदधुः । ज्योतिः । अहन् । बृहस्पतिः । भिनत् । अद्रिम् । विदत् । गाः ॥

    abhí ǀ śyāvám ǀ ná ǀ kṛ́śanebhiḥ ǀ áśvam ǀ nákṣatrebhiḥ ǀ pitáraḥ ǀ dyā́m ǀ apiṃśan ǀ
    rā́tryām ǀ támaḥ ǀ ádadhuḥ ǀ jyótiḥ ǀ áhan ǀ bṛ́haspátiḥ ǀ bhinát ǀ ádrim ǀ vidát ǀ gā́ḥ ǁ

    abhi ǀ śyāvam ǀ na ǀ kṛśanebhiḥ ǀ aśvam ǀ nakṣatrebhiḥ ǀ pitaraḥ ǀ dyām ǀ apiṃśan ǀ
    rātryām ǀ tamaḥ ǀ adadhuḥ ǀ jyotiḥ ǀ ahan ǀ bṛhaspatiḥ ǀ bhinat ǀ adrim ǀ vidat ǀ gāḥ ǁ

    10.68.11 Aṣṭaka 8.2.18.5Anuvāka 10.5.125Interpretations

12. Ṛk 12

    इ॒दम॑कर्म॒ नमो॑ अभ्रि॒याय॒ यः पू॒र्वीरन्वा॒नोन॑वीति ।
    बृह॒स्पतिः॒ स हि गोभिः॒ सो अश्वैः॒ स वी॒रेभिः॒ स नृभि॑र्नो॒ वयो॑ धात् ॥

    इदम् अकर्म नमो अभ्रियाय यः पूर्वीर् अन्व् आनोनवीति |
    बृहस्पतिः स हि गोभिः सो अश्वैः स वीरेभिः स नृभिर् नो वयो धात् ||

    idámakarma námo abhriyā́ya yáḥ pūrvī́ránvānónavīti ǀ
    bṛ́haspátiḥ sá hí góbhiḥ só áśvaiḥ sá vīrébhiḥ sá nṛ́bhirno váyo dhāt ǁ

    idam akarma namo abhriyāya yaḥ pūrvīr anv ānonavīti |
    bṛhaspatiḥ sa hi gobhiḥ so aśvaiḥ sa vīrebhiḥ sa nṛbhir no vayo dhāt ||

    इ॒दम् । अ॒क॒र्म॒ । नमः॑ । अ॒भ्रि॒याय॑ । यः । पू॒र्वीः । अनु॑ । आ॒ऽनोन॑वीति ।
    बृह॒स्पतिः॑ । सः । हि । गोभिः॑ । सः । अश्वः॑ । सः । वी॒रेभिः॑ । सः । नृऽभिः॑ । नः॒ । वयः॑ । धा॒त् ॥

    इदम् । अकर्म । नमः । अभ्रियाय । यः । पूर्वीः । अनु । आऽनोनवीति ।
    बृहस्पतिः । सः । हि । गोभिः । सः । अश्वः । सः । वीरेभिः । सः । नृऽभिः । नः । वयः । धात् ॥

    idám ǀ akarma ǀ námaḥ ǀ abhriyā́ya ǀ yáḥ ǀ pūrvī́ḥ ǀ ánu ǀ ā-nónavīti ǀ
    bṛ́haspátiḥ ǀ sáḥ ǀ hí ǀ góbhiḥ ǀ sáḥ ǀ áśvaḥ ǀ sáḥ ǀ vīrébhiḥ ǀ sáḥ ǀ nṛ́-bhiḥ ǀ naḥ ǀ váyaḥ ǀ dhāt ǁ

    idam ǀ akarma ǀ namaḥ ǀ abhriyāya ǀ yaḥ ǀ pūrvīḥ ǀ anu ǀ ā-nonavīti ǀ
    bṛhaspatiḥ ǀ saḥ ǀ hi ǀ gobhiḥ ǀ saḥ ǀ aśvaḥ ǀ saḥ ǀ vīrebhiḥ ǀ saḥ ǀ nṛ-bhiḥ ǀ naḥ ǀ vayaḥ ǀ dhāt ǁ

    10.68.12 Aṣṭaka 8.2.18.6Anuvāka 10.5.126Interpretations

Text, recitation and interpretations from the Ṛgveda database of theveda.org.in.