Devatā देवता

Hymn Āprī

Ṛṣi ऋषि

Sumitra Vādhryaśva

Chandas छन्दस्

Triṣṭubh

1. Ṛk 1

   इ॒मां मे॑ अग्ने स॒मिधं॑ जुषस्वे॒ळस्प॒दे प्रति॑ हर्या घृ॒ताचीं॑ ।
   वर्ष्म॑न्पृथि॒व्याः सु॑दिन॒त्वे अह्ना॑मू॒र्ध्वो भ॑व सुक्रतो देवय॒ज्या ॥

   इमाम् मे अग्ने समिधं जुषस्वेऌअस् पदे प्रति हर्या घृताचीम् |
   वर्ष्मन् पृथिव्याः सुदिनत्वे अह्नाम् ऊर्ध्वो भव सुक्रतो देवयज्या ||

   imā́m me agne samídham juṣasveḷáspadé práti haryā ghṛtā́cīm ǀ
   várṣmanpṛthivyā́ḥ sudinatvé áhnāmūrdhvó bhava sukrato devayajyā́ ǁ

   imām me agne samidhaṃ juṣasveḷas pade prati haryā ghṛtācīm |
   varṣman pṛthivyāḥ sudinatve ahnām ūrdhvo bhava sukrato devayajyā ||

   इ॒माम् । मे॒ । अ॒ग्ने॒ । स॒म्ऽइध॑म् । जु॒ष॒स्व॒ । इ॒ळः । प॒दे । प्रति॑ । ह॒र्य॒ । घृ॒ताची॑म् ।
   वर्ष्म॑न् । पृ॒थि॒व्याः । सु॒दि॒न॒ऽत्वे । अह्ना॑म् । ऊ॒र्ध्वः । भ॒व॒ । सु॒क्र॒तो॒ इति॑ सुऽक्रतो । दे॒व॒ऽय॒ज्या ॥

   इमाम् । मे । अग्ने । सम्ऽइधम् । जुषस्व । इळः । पदे । प्रति । हर्य । घृताचीम् ।
   वर्ष्मन् । पृथिव्याः । सुदिनऽत्वे । अह्नाम् । ऊर्ध्वः । भव । सुक्रतो इति सुऽक्रतो । देवऽयज्या ॥

   imā́m ǀ me ǀ agne ǀ sam-ídham ǀ juṣasva ǀ iḷáḥ ǀ padé ǀ práti ǀ harya ǀ ghṛtā́cīm ǀ
   várṣman ǀ pṛthivyā́ḥ ǀ sudina-tvé ǀ áhnām ǀ ūrdhváḥ ǀ bhava ǀ sukrato íti su-krato ǀ deva-yajyā́ ǁ

   imām ǀ me ǀ agne ǀ sam-idham ǀ juṣasva ǀ iḷaḥ ǀ pade ǀ prati ǀ harya ǀ ghṛtācīm ǀ
   varṣman ǀ pṛthivyāḥ ǀ sudina-tve ǀ ahnām ǀ ūrdhvaḥ ǀ bhava ǀ sukrato iti su-krato ǀ deva-yajyā ǁ

   10.70.1 Aṣṭaka 8.2.21.1Anuvāka 10.6.13Interpretations

2. Ṛk 2

   आ दे॒वाना॑मग्र॒यावे॒ह या॑तु॒ नरा॒शंसो॑ वि॒श्वरू॑पेभि॒रश्वैः॑ ।
   ऋ॒तस्य॑ प॒था नम॑सा मि॒येधो॑ दे॒वेभ्यो॑ दे॒वत॑मः सुषूदत् ॥

   आ देवानाम् अग्रयावेह यातु नराशंसो विश्वरूपेभिर् अश्वैः |
   ऋतस्य पथा नमसा मियेधो देवेभ्यो देवतमः सुषूदत् ||

   ā́ devā́nāmagrayā́vehá yātu nárāśáṃso viśvárūpebhiráśvaiḥ ǀ
   ṛtásya pathā́ námasā miyédho devébhyo devátamaḥ suṣūdat ǁ

   ā devānām agrayāveha yātu narāśaṃso viśvarūpebhir aśvaiḥ |
   ṛtasya pathā namasā miyedho devebhyo devatamaḥ suṣūdat ||

   आ । दे॒वाना॑म् । अ॒ग्र॒ऽयावा॑ । इ॒ह । या॒तु॒ । नरा॒शंसः॑ । वि॒श्वऽरू॑पेभिः । अश्वैः॑ ।
   ऋ॒तस्य॑ । प॒था । नम॑सा । मि॒येधः॑ । दे॒वेभ्यः॑ । दे॒वऽत॑मः । सु॒सू॒द॒त् ॥

   आ । देवानाम् । अग्रऽयावा । इह । यातु । नराशंसः । विश्वऽरूपेभिः । अश्वैः ।
   ऋतस्य । पथा । नमसा । मियेधः । देवेभ्यः । देवऽतमः । सुसूदत् ॥

   ā́ ǀ devā́nām ǀ agra-yā́vā ǀ ihá ǀ yātu ǀ nárāśáṃsaḥ ǀ viśvá-rūpebhiḥ ǀ áśvaiḥ ǀ
   ṛtásya ǀ pathā́ ǀ námasā ǀ miyédhaḥ ǀ devébhyaḥ ǀ devá-tamaḥ ǀ susūdat ǁ

   ā ǀ devānām ǀ agra-yāvā ǀ iha ǀ yātu ǀ narāśaṃsaḥ ǀ viśva-rūpebhiḥ ǀ aśvaiḥ ǀ
   ṛtasya ǀ pathā ǀ namasā ǀ miyedhaḥ ǀ devebhyaḥ ǀ deva-tamaḥ ǀ susūdat ǁ

   10.70.2 Aṣṭaka 8.2.21.2Anuvāka 10.6.14Interpretations

3. Ṛk 3

   श॒श्व॒त्त॒ममी॑ळते दू॒त्या॑य ह॒विष्मं॑तो मनु॒ष्या॑सो अ॒ग्निं ।
   वहि॑ष्ठै॒रश्वैः॑ सु॒वृता॒ रथे॒ना दे॒वान्व॑क्षि॒ नि ष॑दे॒ह होता॑ ॥

   शश्वत्तमम् ईऌअते दूत्याय हविष्मन्तो मनुष्यासो अग्निम् |
   वहिष्ठैर् अश्वैः सुवृता रथेना देवान् वक्षि नि षदेह होता ||

   śaśvattamámīḷate dūtyā́ya havíṣmanto manuṣyā́so agním ǀ
   váhiṣṭhairáśvaiḥ suvṛ́tā ráthenā́ devā́nvakṣi ní ṣadehá hótā ǁ

   śaśvattamam īḷate dūtyāya haviṣmanto manuṣyāso agnim |
   vahiṣṭhair aśvaiḥ suvṛtā rathenā devān vakṣi ni ṣadeha hotā ||

   श॒श्व॒त्ऽत॒मम् । ई॒ळ॒ते॒ । दू॒त्या॑य । ह॒विष्म॑न्तः । म॒नु॒ष्या॑सः । अ॒ग्निम् ।
   वहि॑ष्ठैः । अश्वैः॑ । सु॒ऽवृता॑ । रथे॑न । आ । दे॒वान् । व॒क्षि॒ । नि । स॒द॒ । इ॒ह । होता॑ ॥

   शश्वत्ऽतमम् । ईळते । दूत्याय । हविष्मन्तः । मनुष्यासः । अग्निम् ।
   वहिष्ठैः । अश्वैः । सुऽवृता । रथेन । आ । देवान् । वक्षि । नि । सद । इह । होता ॥

   śaśvat-tamám ǀ īḷate ǀ dūtyā́ya ǀ havíṣmantaḥ ǀ manuṣyā́saḥ ǀ agním ǀ
   váhiṣṭhaiḥ ǀ áśvaiḥ ǀ su-vṛ́tā ǀ ráthena ǀ ā́ ǀ devā́n ǀ vakṣi ǀ ní ǀ sada ǀ ihá ǀ hótā ǁ

   śaśvat-tamam ǀ īḷate ǀ dūtyāya ǀ haviṣmantaḥ ǀ manuṣyāsaḥ ǀ agnim ǀ
   vahiṣṭhaiḥ ǀ aśvaiḥ ǀ su-vṛtā ǀ rathena ǀ ā ǀ devān ǀ vakṣi ǀ ni ǀ sada ǀ iha ǀ hotā ǁ

   10.70.3 Aṣṭaka 8.2.21.3Anuvāka 10.6.15Interpretations

4. Ṛk 4

   वि प्र॑थतां दे॒वजु॑ष्टं तिर॒श्चा दी॒र्घं द्रा॒घ्मा सु॑र॒भि भू॑त्व॒स्मे ।
   अहे॑ळता॒ मन॑सा देव बर्हि॒रिंद्र॑ज्येष्ठाँ उश॒तो य॑क्षि दे॒वान् ॥

   वि प्रथतां देवजुष्टं तिरश्चा दीर्घं द्राघ्मा सुरभि भूत्व् अस्मे |
   अहेऌअता मनसा देव बर्हिर् इन्द्रज्येष्ठां उशतो यक्षि देवान् ||

   ví prathatām devájuṣṭam tiraścā́ dīrghám drāghmā́ surabhí bhūtvasmé ǀ
   áheḷatā mánasā deva barhiríndrajyeṣṭhām̐ uśató yakṣi devā́n ǁ

   vi prathatāṃ devajuṣṭaṃ tiraścā dīrghaṃ drāghmā surabhi bhūtv asme |
   aheḷatā manasā deva barhir indrajyeṣṭhāṃ uśato yakṣi devān ||

   वि । प्र॒थ॒ता॒म् । दे॒वऽजु॑ष्टम् । ति॒र॒श्चा । दी॒र्घम् । द्रा॒घ्मा । सु॒र॒भि । भू॒तु॒ । अ॒स्मे इति॑ ।
   अहे॑ळता । मन॑सा । दे॒व॒ । ब॒र्हिः॒ । इन्द्र॑ऽज्येष्ठान् । उ॒श॒तः । य॒क्षि॒ । दे॒वान् ॥

   वि । प्रथताम् । देवऽजुष्टम् । तिरश्चा । दीर्घम् । द्राघ्मा । सुरभि । भूतु । अस्मे इति ।
   अहेळता । मनसा । देव । बर्हिः । इन्द्रऽज्येष्ठान् । उशतः । यक्षि । देवान् ॥

   ví ǀ prathatām ǀ devá-juṣṭam ǀ tiraścā́ ǀ dīrghám ǀ drāghmā́ ǀ surabhí ǀ bhūtu ǀ asmé íti ǀ
   áheḷatā ǀ mánasā ǀ deva ǀ barhiḥ ǀ índra-jyeṣṭhān ǀ uśatáḥ ǀ yakṣi ǀ devā́n ǁ

   vi ǀ prathatām ǀ deva-juṣṭam ǀ tiraścā ǀ dīrgham ǀ drāghmā ǀ surabhi ǀ bhūtu ǀ asme iti ǀ
   aheḷatā ǀ manasā ǀ deva ǀ barhiḥ ǀ indra-jyeṣṭhān ǀ uśataḥ ǀ yakṣi ǀ devān ǁ

   10.70.4 Aṣṭaka 8.2.21.4Anuvāka 10.6.16Interpretations

5. Ṛk 5

   दि॒वो वा॒ सानु॑ स्पृ॒शता॒ वरी॑यः पृथि॒व्या वा॒ मात्र॑या॒ वि श्र॑यध्वं ।
   उ॒श॒तीर्द्वा॑रो महि॒ना म॒हद्भि॑र्दे॒वं रथं॑ रथ॒युर्धा॑रयध्वं ॥

   दिवो वा सानु स्पृशता वरीयः पृथिव्या वा मात्रया वि श्रयध्वम् |
   उशतीर् द्वारो महिना महद्भिर् देवं रथं रथयुर् धारयध्वम् ||

   divó vā sā́nu spṛśátā várīyaḥ pṛthivyā́ vā mā́trayā ví śrayadhvam ǀ
   uśatī́rdvāro mahinā́ mahádbhirdevám rátham rathayúrdhārayadhvam ǁ

   divo vā sānu spṛśatā varīyaḥ pṛthivyā vā mātrayā vi śrayadhvam |
   uśatīr dvāro mahinā mahadbhir devaṃ rathaṃ rathayur dhārayadhvam ||

   दि॒वः । वा॒ । सानु॑ । स्पृ॒शत॑ । वरी॑यः । पृ॒थि॒व्या । वा॒ । मात्र॑या । वि । श्र॒य॒ध्व॒म् ।
   उ॒श॒तीः । द्वा॒रः॒ । म॒हि॒ना । म॒हत्ऽभिः॑ । दे॒वम् । रथ॑म् । र॒थ॒ऽयुः । धा॒र॒य॒ध्व॒म् ॥

   दिवः । वा । सानु । स्पृशत । वरीयः । पृथिव्या । वा । मात्रया । वि । श्रयध्वम् ।
   उशतीः । द्वारः । महिना । महत्ऽभिः । देवम् । रथम् । रथऽयुः । धारयध्वम् ॥

   diváḥ ǀ vā ǀ sā́nu ǀ spṛśáta ǀ várīyaḥ ǀ pṛthivyā́ ǀ vā ǀ mā́trayā ǀ ví ǀ śrayadhvam ǀ
   uśatī́ḥ ǀ dvāraḥ ǀ mahinā́ ǀ mahát-bhiḥ ǀ devám ǀ rátham ǀ ratha-yúḥ ǀ dhārayadhvam ǁ

   divaḥ ǀ vā ǀ sānu ǀ spṛśata ǀ varīyaḥ ǀ pṛthivyā ǀ vā ǀ mātrayā ǀ vi ǀ śrayadhvam ǀ
   uśatīḥ ǀ dvāraḥ ǀ mahinā ǀ mahat-bhiḥ ǀ devam ǀ ratham ǀ ratha-yuḥ ǀ dhārayadhvam ǁ

   10.70.5 Aṣṭaka 8.2.21.5Anuvāka 10.6.17Interpretations

6. Ṛk 6

   दे॒वी दि॒वो दु॑हि॒तरा॑ सुशि॒ल्पे उ॒षासा॒नक्ता॑ सदतां॒ नि योनौ॑ ।
   आ वां॑ दे॒वास॑ उशती उ॒शंत॑ उ॒रौ सी॑दंतु सुभगे उ॒पस्थे॑ ॥

   देवी दिवो दुहितरा सुशिल्पे उषासानक्ता सदतां नि योनौ |
   आ वां देवास उशती उशन्त उरौ सीदन्तु सुभगे उपस्थे ||

   devī́ divó duhitárā suśilpé uṣā́sānáktā sadatām ní yónau ǀ
   ā́ vām devā́sa uśatī uśánta uráu sīdantu subhage upásthe ǁ

   devī divo duhitarā suśilpe uṣāsānaktā sadatāṃ ni yonau |
   ā vāṃ devāsa uśatī uśanta urau sīdantu subhage upasthe ||

   दे॒वी इति॑ । दि॒वः । दु॒हि॒तरा॑ । सु॒शि॒ल्पे इति॑ सु॒ऽशि॒ल्पे । उ॒षसा॒नक्ता॑ । स॒द॒ता॒म् । नि । योनौ॑ ।
   आ । वा॒म् । दे॒वासः॑ । उ॒श॒ती॒ इति॑ । उ॒शन्तः॑ । उ॒रौ । सी॒द॒न्तु॒ । सु॒भ॒गे॒ इति॑ सुऽभगे । उ॒पऽस्थे॑ ॥

   देवी इति । दिवः । दुहितरा । सुशिल्पे इति सुऽशिल्पे । उषसानक्ता । सदताम् । नि । योनौ ।
   आ । वाम् । देवासः । उशती इति । उशन्तः । उरौ । सीदन्तु । सुभगे इति सुऽभगे । उपऽस्थे ॥

   devī́ íti ǀ diváḥ ǀ duhitárā ǀ suśilpé íti su-śilpé ǀ uṣásānáktā ǀ sadatām ǀ ní ǀ yónau ǀ
   ā́ ǀ vām ǀ devā́saḥ ǀ uśatī íti ǀ uśántaḥ ǀ uráu ǀ sīdantu ǀ subhage íti su-bhage ǀ upá-sthe ǁ

   devī iti ǀ divaḥ ǀ duhitarā ǀ suśilpe iti su-śilpe ǀ uṣasānaktā ǀ sadatām ǀ ni ǀ yonau ǀ
   ā ǀ vām ǀ devāsaḥ ǀ uśatī iti ǀ uśantaḥ ǀ urau ǀ sīdantu ǀ subhage iti su-bhage ǀ upa-sthe ǁ

   10.70.6 Aṣṭaka 8.2.22.1Anuvāka 10.6.18Interpretations

7. Ṛk 7

   ऊ॒र्ध्वो ग्रावा॑ बृ॒हद॒ग्निः समि॑द्धः प्रि॒या धामा॒न्यदि॑तेरु॒पस्थे॑ ।
   पु॒रोहि॑तावृत्विजा य॒ज्ञे अ॒स्मिन्वि॒दुष्ट॑रा॒ द्रवि॑ण॒मा य॑जेथां ॥

   ऊर्ध्वो ग्रावा बृहद् अग्निः समिद्धः प्रिया धामान्य् अदितेर् उपस्थे |
   पुरोहिताव् ऋत्विजा यज्ञे अस्मिन् विदुष्टरा द्रविणम् आ यजेथाम् ||

   ūrdhvó grā́vā bṛhádagníḥ sámiddhaḥ priyā́ dhā́mānyáditerupásthe ǀ
   puróhitāvṛtvijā yajñé asmínvidúṣṭarā dráviṇamā́ yajethām ǁ

   ūrdhvo grāvā bṛhad agniḥ samiddhaḥ priyā dhāmāny aditer upasthe |
   purohitāv ṛtvijā yajñe asmin viduṣṭarā draviṇam ā yajethām ||

   ऊ॒र्ध्वः । ग्रावा॑ । बृ॒हत् । अ॒ग्निः । सम्ऽइ॑द्धः । प्रि॒या । धामा॑नि । अदि॑तेः । उ॒पऽस्थे॑ ।
   पु॒रःऽहि॑तौ । ऋ॒त्वि॒जा॒ । य॒ज्ञे । अ॒स्मिन् । वि॒दुःऽत॑रा । द्रवि॑णम् । आ । य॒जे॒था॒म् ॥

   ऊर्ध्वः । ग्रावा । बृहत् । अग्निः । सम्ऽइद्धः । प्रिया । धामानि । अदितेः । उपऽस्थे ।
   पुरःऽहितौ । ऋत्विजा । यज्ञे । अस्मिन् । विदुःऽतरा । द्रविणम् । आ । यजेथाम् ॥

   ūrdhváḥ ǀ grā́vā ǀ bṛhát ǀ agníḥ ǀ sám-iddhaḥ ǀ priyā́ ǀ dhā́māni ǀ áditeḥ ǀ upá-sthe ǀ
   puráḥ-hitau ǀ ṛtvijā ǀ yajñé ǀ asmín ǀ vidúḥ-tarā ǀ dráviṇam ǀ ā́ ǀ yajethām ǁ

   ūrdhvaḥ ǀ grāvā ǀ bṛhat ǀ agniḥ ǀ sam-iddhaḥ ǀ priyā ǀ dhāmāni ǀ aditeḥ ǀ upa-sthe ǀ
   puraḥ-hitau ǀ ṛtvijā ǀ yajñe ǀ asmin ǀ viduḥ-tarā ǀ draviṇam ǀ ā ǀ yajethām ǁ

   10.70.7 Aṣṭaka 8.2.22.2Anuvāka 10.6.19Interpretations

8. Ṛk 8

   तिस्रो॑ देवीर्ब॒र्हिरि॒दं वरी॑य॒ आ सी॑दत चकृ॒मा वः॑ स्यो॒नं ।
   म॒नु॒ष्वद्य॒ज्ञं सुधि॑ता ह॒वींषीळा॑ दे॒वी घृ॒तप॑दी जुषंत ॥

   तिस्रो देवीर् बर्हिर् इदं वरीय आ सीदत चकृमा वः स्योनम् |
   मनुष्वद् यज्ञं सुधिता हवींषीऌआ देवी घृतपदी जुषन्त ||

   tísro devīrbarhíridám várīya ā́ sīdata cakṛmā́ vaḥ syonám ǀ
   manuṣvádyajñám súdhitā havī́ṃṣī́ḷā devī́ ghṛtápadī juṣanta ǁ

   tisro devīr barhir idaṃ varīya ā sīdata cakṛmā vaḥ syonam |
   manuṣvad yajñaṃ sudhitā havīṃṣīḷā devī ghṛtapadī juṣanta ||

   तिस्रः॑ । दे॒वीः॒ । ब॒र्हिः । इ॒दम् । वरी॑यः । आ । सी॒द॒त॒ । च॒कृ॒म । वः॒ । स्यो॒नम् ।
   म॒नु॒ष्वत् । य॒ज्ञम् । सुऽधि॑ता । ह॒वींषि॑ । इळा॑ । दे॒वी । घृ॒तऽप॑दी । जु॒ष॒न्त॒ ॥

   तिस्रः । देवीः । बर्हिः । इदम् । वरीयः । आ । सीदत । चकृम । वः । स्योनम् ।
   मनुष्वत् । यज्ञम् । सुऽधिता । हवींषि । इळा । देवी । घृतऽपदी । जुषन्त ॥

   tísraḥ ǀ devīḥ ǀ barhíḥ ǀ idám ǀ várīyaḥ ǀ ā́ ǀ sīdata ǀ cakṛmá ǀ vaḥ ǀ syonám ǀ
   manuṣvát ǀ yajñám ǀ sú-dhitā ǀ havī́ṃṣi ǀ íḷā ǀ devī́ ǀ ghṛtá-padī ǀ juṣanta ǁ

   tisraḥ ǀ devīḥ ǀ barhiḥ ǀ idam ǀ varīyaḥ ǀ ā ǀ sīdata ǀ cakṛma ǀ vaḥ ǀ syonam ǀ
   manuṣvat ǀ yajñam ǀ su-dhitā ǀ havīṃṣi ǀ iḷā ǀ devī ǀ ghṛta-padī ǀ juṣanta ǁ

   10.70.8 Aṣṭaka 8.2.22.3Anuvāka 10.6.20Interpretations

9. Ṛk 9

   देव॑ त्वष्ट॒र्यद्ध॑ चारु॒त्वमान॒ड्यदंगि॑रसा॒मभ॑वः सचा॒भूः ।
   स दे॒वानां॒ पाथ॒ उप॒ प्र वि॒द्वाँ उ॒शन्य॑क्षि द्रविणोदः सु॒रत्नः॑ ॥

   देव त्वष्टर् यद् ध चारुत्वम् आनड् यद् अङ्गिरसाम् अभवः सचाभूः |
   स देवानाम् पाथ उप प्र विद्वां उशन् यक्षि द्रविणोदः सुरत्नः ||

   déva tvaṣṭaryáddha cārutvámā́naḍyádáṅgirasāmábhavaḥ sacābhū́ḥ ǀ
   sá devā́nām pā́tha úpa prá vidvā́m̐ uśányakṣi draviṇodaḥ surátnaḥ ǁ

   deva tvaṣṭar yad dha cārutvam ānaḍ yad aṅgirasām abhavaḥ sacābhūḥ |
   sa devānām pātha upa pra vidvāṃ uśan yakṣi draviṇodaḥ suratnaḥ ||

   देव॑ । त्व॒ष्टः॒ । यत् । ह॒ । चा॒रु॒ऽत्वम् । आन॑ट् । यत् । अङ्गि॑रसाम् । अभ॑वः । स॒चा॒ऽभूः ।
   सः । दे॒वाना॑म् । पाथः॑ । उप॑ । प्र । वि॒द्वान् । उ॒शन् । य॒क्षि॒ । द्र॒वि॒णः॒ऽदः॒ । सु॒ऽरत्नः॑ ॥

   देव । त्वष्टः । यत् । ह । चारुऽत्वम् । आनट् । यत् । अङ्गिरसाम् । अभवः । सचाऽभूः ।
   सः । देवानाम् । पाथः । उप । प्र । विद्वान् । उशन् । यक्षि । द्रविणःऽदः । सुऽरत्नः ॥

   déva ǀ tvaṣṭaḥ ǀ yát ǀ ha ǀ cāru-tvám ǀ ā́naṭ ǀ yát ǀ áṅgirasām ǀ ábhavaḥ ǀ sacā-bhū́ḥ ǀ
   sáḥ ǀ devā́nām ǀ pā́thaḥ ǀ úpa ǀ prá ǀ vidvā́n ǀ uśán ǀ yakṣi ǀ draviṇaḥ-daḥ ǀ su-rátnaḥ ǁ

   deva ǀ tvaṣṭaḥ ǀ yat ǀ ha ǀ cāru-tvam ǀ ānaṭ ǀ yat ǀ aṅgirasām ǀ abhavaḥ ǀ sacā-bhūḥ ǀ
   saḥ ǀ devānām ǀ pāthaḥ ǀ upa ǀ pra ǀ vidvān ǀ uśan ǀ yakṣi ǀ draviṇaḥ-daḥ ǀ su-ratnaḥ ǁ

   10.70.9 Aṣṭaka 8.2.22.4Anuvāka 10.6.21Interpretations

10. Ṛk 10

    वन॑स्पते रश॒नया॑ नि॒यूया॑ दे॒वानां॒ पाथ॒ उप॑ वक्षि वि॒द्वान् ।
    स्वदा॑ति दे॒वः कृ॒णव॑द्ध॒वींष्यव॑तां॒ द्यावा॑पृथि॒वी हवं॑ मे ॥

    वनस्पते रशनया नियूया देवानाम् पाथ उप वक्षि विद्वान् |
    स्वदाति देवः कृणवद् धवींष्य् अवतां द्यावापृथिवी हवम् मे ||

    vánaspate raśanáyā niyū́yā devā́nām pā́tha úpa vakṣi vidvā́n ǀ
    svádāti deváḥ kṛṇávaddhavī́ṃṣyávatām dyā́vāpṛthivī́ hávam me ǁ

    vanaspate raśanayā niyūyā devānām pātha upa vakṣi vidvān |
    svadāti devaḥ kṛṇavad dhavīṃṣy avatāṃ dyāvāpṛthivī havam me ||

    वन॑स्पते । र॒श॒नया॑ । नि॒ऽयूय॑ । दे॒वाना॑म् । पाथः॑ । उप॑ । व॒क्षि॒ । वि॒द्वान् ।
    स्वदा॑ति । दे॒वः । कृ॒णव॑त् । ह॒वींषि॑ । अव॑ताम् । द्यावा॑पृथि॒वी इति॑ । हव॑म् । मे॒ ॥

    वनस्पते । रशनया । निऽयूय । देवानाम् । पाथः । उप । वक्षि । विद्वान् ।
    स्वदाति । देवः । कृणवत् । हवींषि । अवताम् । द्यावापृथिवी इति । हवम् । मे ॥

    vánaspate ǀ raśanáyā ǀ ni-yū́ya ǀ devā́nām ǀ pā́thaḥ ǀ úpa ǀ vakṣi ǀ vidvā́n ǀ
    svádāti ǀ deváḥ ǀ kṛṇávat ǀ havī́ṃṣi ǀ ávatām ǀ dyā́vāpṛthivī́ íti ǀ hávam ǀ me ǁ

    vanaspate ǀ raśanayā ǀ ni-yūya ǀ devānām ǀ pāthaḥ ǀ upa ǀ vakṣi ǀ vidvān ǀ
    svadāti ǀ devaḥ ǀ kṛṇavat ǀ havīṃṣi ǀ avatām ǀ dyāvāpṛthivī iti ǀ havam ǀ me ǁ

    10.70.10 Aṣṭaka 8.2.22.5Anuvāka 10.6.22Interpretations

11. Ṛk 11

    आग्ने॑ वह॒ वरु॑णमि॒ष्टये॑ न॒ इंद्रं॑ दि॒वो म॒रुतो॑ अं॒तरि॑क्षात् ।
    सीदं॑तु ब॒र्हिर्विश्व॒ आ यज॑त्राः॒ स्वाहा॑ दे॒वा अ॒मृता॑ मादयंतां ॥

    आग्ने वह वरुणम् इष्टये न इन्द्रं दिवो मरुतो अन्तरिक्षात् |
    सीदन्तु बर्हिर् विश्व आ यजत्राः स्वाहा देवा अमृता मादयन्ताम् ||

    ā́gne vaha váruṇamiṣṭáye na índram divó marúto antárikṣāt ǀ
    sī́dantu barhírvíśva ā́ yájatrāḥ svā́hā devā́ amṛ́tā mādayantām ǁ

    āgne vaha varuṇam iṣṭaye na indraṃ divo maruto antarikṣāt |
    sīdantu barhir viśva ā yajatrāḥ svāhā devā amṛtā mādayantām ||

    आ । अ॒ग्ने॒ । व॒ह॒ । वरु॑णम् । इ॒ष्टये॑ । नः॒ । इन्द्र॑म् । दि॒वः । म॒रुतः॑ । अ॒न्तरि॑क्षात् ।
    सीद॑न्तु । ब॒र्हिः । विश्वे॑ । आ । यज॑त्राः । स्वाहा॑ । दे॒वाः । अ॒मृताः॑ । मा॒द॒य॒न्ता॒म् ॥

    आ । अग्ने । वह । वरुणम् । इष्टये । नः । इन्द्रम् । दिवः । मरुतः । अन्तरिक्षात् ।
    सीदन्तु । बर्हिः । विश्वे । आ । यजत्राः । स्वाहा । देवाः । अमृताः । मादयन्ताम् ॥

    ā́ ǀ agne ǀ vaha ǀ váruṇam ǀ iṣṭáye ǀ naḥ ǀ índram ǀ diváḥ ǀ marútaḥ ǀ antárikṣāt ǀ
    sī́dantu ǀ barhíḥ ǀ víśve ǀ ā́ ǀ yájatrāḥ ǀ svā́hā ǀ devā́ḥ ǀ amṛ́tāḥ ǀ mādayantām ǁ

    ā ǀ agne ǀ vaha ǀ varuṇam ǀ iṣṭaye ǀ naḥ ǀ indram ǀ divaḥ ǀ marutaḥ ǀ antarikṣāt ǀ
    sīdantu ǀ barhiḥ ǀ viśve ǀ ā ǀ yajatrāḥ ǀ svāhā ǀ devāḥ ǀ amṛtāḥ ǀ mādayantām ǁ

    10.70.11 Aṣṭaka 8.2.22.6Anuvāka 10.6.23Interpretations

Text, recitation and interpretations from the Ṛgveda database of theveda.org.in.