मार्कण्डेय उवाच । (१।१)

ततो गच्छेत् तु राजेन्द्र अग्नितीर्थमनुत्तमम् । (१।२)

तत्र स्नात्वा तु पक्षादौ मुच्यते सर्वकिल्बिषैः ॥ (१।३)

तत्र तीर्थे तु यः कन्यां दद्यात् स्वयमलंकृताम् । (२।१)

तस्य यत्फलमुद्दिष्टं तच्छृणुष्व नरोत्तम ॥ (२।२)

अग्निष्टोमातिरात्राभ्यां शतं शतगुणीकृतम् । (३।१)

प्राप्नोति पुरुषो दत्त्वा यथाशक्त्या ह्यलंकृताम् ॥ (३।२)

तस्याः पुत्रप्रपौत्राणां या भवेद् रोमसंगतिः । (४।१)

स याति तेन मानेन शिवलोके परां गतिम् ॥ (४।२)

इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे अग्नितीर्थमाहात्म्यवर्णनं नाम सप्तविंशत्युत्तरशततमो ऽध्यायः ॥ (५।१)