श्रीमार्कण्डेय उवाच । (१।१)

ततो गच्छेद्धराधीश कोटितीर्थमनुत्तमम् । (१।२)

यत्र सिद्धा महाभागाः कोटिसंख्या महर्षयः ॥ (१।३)

तपः कृत्वा सुविपुलमृषिभिः स्थापितः शिवः । (२।१)

तथा कोटीश्वरी देवी चामुण्डा महिषार्दिनी ॥ (२।२)

कृष्णपक्षे चतुर्दश्यां मासि भाद्रपदे नृप । (३।१)

तीर्थकोटीः समाहूय मुनिभिः स्थापितः शिवः ॥ (३।२)

तस्यां तिथौ च हस्तर्क्षं सर्वपापप्रणाशनम् । (४।१)

तत्र तीर्थे तदा गत्वा स्नानं कृत्वा समाहितः ॥ (४।२)

नरकाद् उद्धरत्य् आशु पुरुषानेकविंशतिम् । (५।१)

तिलोदकप्रदानेन किमुत श्राद्धदो नरः ॥ (५।२)

स्नानं दानं जपो होमः स्वाध्यायो देवतार्चनम् । (६।१)

तस्य तीर्थस्य योगेन सर्वं कोटिगुणं भवेत् ॥ (६।२)

इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे कोटितीर्थमाहात्म्यवर्णनं नाम त्र्युत्तरद्विशततमो ऽध्यायः ॥ (७।१)