श्रीमार्कण्डेय उवाच । (१।१)

ततो गच्छेत्तु राजेन्द्र पारेश्वरम् अनुत्तमम् । (१।२)

पराशरो महात्मा वै नर्मदायास्तटे शुभे ॥ (१।३)

तपश्चचार विपुलं पुत्रार्थं पाण्डुनन्दन । (२।१)

हिमवद्दुहिता तेन गौरी नारायणी नृप ॥ (२।२)

तोषिता परया भक्त्या नर्मदोत्तरके तटे । (३।१)

तस्य तुष्टा महादेवी शङ्करार्धाङ्गधारिणी ॥ (३।२)

भोभो ऋषिवर श्रेष्ठ तुष्टाहं तव भक्तितः । (४।१)

वरं याचय मे विप्र पराशर महामते ॥ (४।२)

पराशर उवाच । (५।१)

परितुष्टासि मे देवि यदि देयो वरो मम । (५।२)

देहि पुत्रं भगवति सत्यशौचगुणान्वितम् ॥ (५।३)

वेदाभ्यसनशीलं हि सर्वशास्त्रविशारदम् । (६।१)

तीर्थे चात्र भवेद् देवि सन्निधानवरेण तु ॥ (६।२)

लोकोपकारहेतोश्च स्थीयतां गिरिनन्दिनि । (७।१)

पराशराभिधानेन नर्मदादक्षिणे तटे ॥ (७।२)

श्रीदेव्युवाच । (८।१)

एवं भवतु ते विप्र तत्रैवान्तरधीयत । (८।२)

पराशरो महात्मा वै स्थापयामास पार्वतीम् ॥ (८।३)

शङ्करं स्थापयामास सुरासुरनमस्कृतम् । (९।१)

अच्छेद्यम् अप्रतर्क्यं च देवानां तु दुरासदम् ॥ (९।२)

पराशरो महात्मा वै कृतार्थो ह्यभवन् नृप ॥ (१०।१)

तत्र तीर्थे तु यो भक्त्या शुचिः प्रयतमानसः । (११।१)

स्त्र्यथवा पुरुषो वापि कामक्रोधविवर्जितः ॥ (११।२)

माघे चैत्रे ऽथ वैशाखे श्रावणे नृपनन्दन । (१२।१)

मासि मार्गशिरे चैव शुक्लपक्षे तु सर्वदा ॥ (१२।२)

तत्र गत्वा शुभे स्थाने नर्मदादक्षिणे तटे ॥ (१३।१)

उपोष्य परया भक्त्या व्रतम् एतत् समाचरेत् । (१४।१)

रात्रौ जागरणं कृत्वा दीपदानं स्वशक्तितः ॥ (१४।२)

गीतं नृत्यं तथा वाद्यं कामक्रोधविवर्जितः । (१५।१)

प्रभाते विमले प्राप्ते द्विजाः पूज्याः स्वशक्तितः ॥ (१५।२)

सम्पूज्य ब्राह्मणान् पार्थ धनदानहिरण्यतः । (१६।१)

वस्त्रेण छत्रदानेन शय्याताम्बूलभोजनैः ॥ (१६।२)

प्रीणयेन्नर्मदातीरे ब्राह्मणाञ्छंसितव्रतान् । (१७।१)

श्राद्धं कार्यं नृपश्रेष्ठ आमैः पक्वैर्जलेन च ॥ (१७।२)

स्त्रीणां चैव तु शूद्राणाम् आमश्राद्धं प्रशस्यते । (१८।१)

आमं चतुर्गुणं देयं ब्राह्मणानां युधिष्ठिर ॥ (१८।२)

वेदोक्तेन विधानेन द्विजाः पूज्याः प्रयत्नतः । (१९।१)

हस्तमात्रैः कुशैश्चैव तिलैश्चैवाक्षतैर्नृप ॥ (१९।२)

विप्रा उदङ्मुखाः कार्याः स्वयं वै दक्षिणामुखः । (२०।१)

दर्भेषु निक्षिपेदन्नमित्युच्चार्य द्विजाग्रतः ॥ (२०।२)

प्रेता यान्तु परे लोके तीर्थस्यास्य प्रभावतः । (२१।१)

पापं मे प्रशमं यातु एतु वृद्धिं शुभं सदा ॥ (२१।२)

वृद्धिं यातु सदा वंशो ज्ञातिवर्गो द्विजोत्तम । (२२।१)

एवमुच्चार्य विप्राय दानं देयं स्वशक्तितः ॥ (२२।२)

गोभूतिसहिरण्यादि चान्नं वस्त्रं स्वशक्तितः । (२३।१)

दातव्यं पाण्डवश्रेष्ठ पारेश्वरवराश्रमे ॥ (२३।२)

ये शृण्वन्ति परं भक्त्या मुच्यन्ते सर्वपातकैः ॥ (२४।१)

इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे पारेश्वरतीर्थमाहात्म्यवर्णनं नाम षट्सप्ततितमो ऽध्यायः ॥ (२५।१)