श्रीमार्कण्डेय उवाच । (१।१)

पुनर् अन्यत् प्रवक्ष्यामि देवस्य चरितं महत् । (१।२)

श्रुतमात्रेण येनैव सर्वपापैः प्रमुच्यते ॥ (१।३)

अबालो बालरूपेण ग्रामण्यैर् बालकैः सह । (२।१)

आमलैः क्रीडते शम्भुस्तत्ते वक्ष्यामि भारत ॥ (२।२)

सर्वैस्तैर् आमलाः क्षिप्ता ये ते देवेन पाण्डव । (३।१)

आनीतास्तत्क्षणादेव ततः पश्चात् क्षिपेद्धरः ॥ (३।२)

यावद्गत्वा दिशो दिग्भ्य आगच्छन्ति पृथक्पृथक् । (४।१)

तावत्तमामलं भूतं पश्यन्ति परमेश्वरम् ॥ (४।२)

तृतीये चैव यत्कर्म देवदेवस्य धीमतः । (५।१)

स्थानानां परमं स्थानम् आमलेश्वरमुत्तमम् ॥ (५।२)

तेन पूजितमात्रेण प्राप्यते परमं पदम् ॥ (६।१)

इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे आमलेश्वरतीर्थमाहात्म्यवर्णनं नाम त्रयोदशोत्तरद्विशततमो ऽध्यायः ॥ (७।१)