श्रीमार्कण्डेय उवाच । (१।१)

एवं ते कथितं राजन्पुराणं धर्मसंहितम् । (१।२)

शिवप्रीत्या यथा प्रोक्तं वायुना देवसंसदि ॥ (१।३)

षष्टितीर्थसहस्राणि षष्टिकोटिस्तथैव च । (२।१)

आदिमध्यावसानेषु नर्मदायां पदे पदे ॥ (२।२)

मया द्वादशसाहस्री संहिता या श्रुता पुरा । (३।१)

देवदेवस्य गदतः साम्प्रतं कथिता तव ॥ (३।२)

पृष्टस्त्वयाहं भूपाल पर्वते ऽमरकण्टके । (४।१)

स्थितः संक्षेपतः सर्वं मया तत्कथितं तव ॥ (४।२)

नर्मदाचरितं पुण्यं शृणु तस्यास्ति यत्फलम् । (५।१)

यत्फलं सर्ववेदैः स्यात् सषडङ्गपदक्रमैः ॥ (५।२)

पठितैश्च श्रुतैर् वापि तस्माद् बहुतरं भवेत् । (६।१)

सत्रयाजी फलं यत्र लभते द्वादशाब्दिकम् ॥ (६।२)

चरिते तु श्रुते देव्या लभते तादृशं फलम् । (७।१)

सर्वतीर्थेषु यत्पुण्यं स्नात्वा सागरमादितः ॥ (७।२)

सकृत्स्नात्वा तथा श्रुत्वा नर्मदायां फलं हि तत् । (८।१)

आदिमध्यावसानेन नर्मदाचरितं शुभम् ॥ (८।२)

यः शृणोति नरो भक्त्या तस्य पुण्यफलं शृणु । (९।१)

स प्राप्य शिवसंस्थानं रुद्रकन्यासमावृतः ॥ (९।२)

रुद्रस्यानुचरो भूत्वा तेनैव सह मोदते । (१०।१)

एतद् धर्ममुपाख्यानं सर्वशास्त्रेषु सत्तमम् ॥ (१०।२)

देशे वा मण्डले वापि वा ग्रामे नगरे ऽपि वा । (११।१)

गृहे वा तिष्ठते यस्य चातुर्वर्ण्यस्य भारत ॥ (११।२)

स ब्रह्मा स शिवः साक्षात्स च देवो जनार्दनः । (१२।१)

त्रिविधं कारणं लोके धर्मपन्थानमुत्तमम् ॥ (१२।२)

देवतानां गुरुं शास्त्रं परमं सिद्धिकारणम् । (१३।१)

श्रुत्वेश्वरमुखात्पार्थ मयापि तव कीर्तितम् ॥ (१३।२)

दक्षिणे चोत्तरे कूले यानि तीर्थानि कानिचित् । (१४।१)

प्रधानतः सुपुण्यानि कथितानि विशेषतः ॥ (१४।२)

स्पर्शनाद् दर्शनात् तेषां कीर्तनाच्छ्रवणात् तथा । (१५।१)

मुच्यते सर्वपापेभ्यो रुद्रलोकं स गच्छति ॥ (१५।२)

इदं यः शृणुयान् नित्यं पुराणं शिवभाषितम् । (१६।१)

ब्राह्मणो वेदविद्यावान् क्षत्रियो विजयी भवेत् ॥ (१६।२)

धनभागी भवेद् वैश्यः शूद्रो वै धर्मभाग्भवेत् । (१७।१)

सौभाग्यं सन्ततिं स्वर्गं नारी श्रुत्वाप्नुयाद्धनम् ॥ (१७।२)

ब्रह्मघ्नश्च सुरापश्च स्तेयी च गुरुतल्पगः । (१८।१)

माहात्म्यं नर्मदायास्तु श्रुत्वा पापबहिष्कृताः ॥ (१८।२)

पापभेदी कृतघ्नश्च स्वामिविश्वासघातकः । (१९।१)

गोघ्नश्च गरदश्चैव कन्याविक्रयकारकः ॥ (१९।२)

एते श्रुत्वैव पापेभ्यो मुच्यन्ते नात्र संशयः । (२०।१)

ये पुनर्भावितात्मानः शृण्वन्ति सततं नृप ॥ (२०।२)

पूजयन्त इदं देवाः पूजिता गुरवश्च तैः । (२१।१)

नर्मदा पूजिता तेन भगवांश्च महेश्वरः ॥ (२१।२)

तस्मात्सर्वप्रयत्नेन गन्धपुष्पविभूषणैः । (२२।१)

पूजितं परया भक्त्या शास्त्रमेतत्फलप्रदम् ॥ (२२।२)

लेखापयित्वा सकलं नर्मदाचरितं शुभम् । (२३।१)

उत्तमं सर्वशास्त्रेभ्यो यो ददाति द्विजन्मने ॥ (२३।२)

नर्मदासर्वतीर्थेषु स्नाने दाने च यत्फलम् । (२४।१)

तत्फलं समवाप्नोति स नरो नात्र संशयः ॥ (२४।२)

एतत्पुराणं रुद्रोक्तं महापुण्यफलप्रदम् । (२५।१)

स्वर्गदं पुत्रदं धन्यं यशस्यं कीर्तिवर्धनम् ॥ (२५।२)

सर्वपापहरं पार्थ दुःखदुःस्वप्ननाशनम् । (२६।१)

पठतां शृण्वतां राजन् सर्वकामार्थसिद्धिदम् ॥ (२६।२)

शान्तिरस्तु शिवं चास्तु लोकाः सन्तु निरामयाः । (२७।१)

गोब्राह्मणेभ्यः स्वस्त्यस्तु धर्मं धर्मात्मजाश्रयः ॥ (२७।२)

नरकान्तकरी रेवा सतीर्था विश्वपावनी । (२८।१)

नर्मदा धर्मदा चास्तु शर्मदा पार्थ ते सदा ॥ (२८।२)

इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे मार्कण्डेययुधिष्ठिरसंवादे रेवाखण्डपठनश्रवणदानादिफलश्रुतिवर्णनं नामैकोनत्रिंशदधिकद्विशततमो ऽध्यायः ॥ (२९।१)