सूत उवाच । (१।१)

इति वः कथितं विप्रा रेवामाहात्म्यमुत्तमम् । (१।२)

यथोपदिष्टं पार्थाय मार्कण्डेयेन वै पुरा ॥ (१।३)

तथा तीर्थकदम्बाश्च तेषु तीर्थविशेषतः । (२।१)

प्राधान्येन मया ख्याता यथासङ्ख्यं यथाक्रमम् ॥ (२।२)

एतत्पवित्रमतुलं ह्येतत्पापहरं परम् । (३।१)

नर्मदाचरितं पुण्यं माहात्म्यं मुनिभाषितम् ॥ (३।२)

सप्तकल्पानुगो विप्रो नर्मदायां मुनीश्वराः । (४।१)

मृकण्डतनयो धीमान्परमार्थविदुत्तमः ॥ (४।२)

संसेव्य सर्वतीर्थानि नदीः सर्वाश्च वै पुरा । (५।१)

बहुकल्पस्मरां रेवामालक्ष्य शिवदेहजाम् ॥ (५।२)

मे कलेति च शर्वोक्तां शरणं शर्वजां ययौ । (६।१)

अजराममरां देवीं दैत्यध्वंसकरीं पराम् ॥ (६।२)

महाविभवसंयुक्तां भवघ्नीं भवजाह्नवीम् । (७।१)

तस्यामाबध्य सत्प्रेम जातः सो ऽप्यजरामरः ॥ (७।२)

षष्टितीर्थसहस्राणि षष्टिकोट्यश्च सत्तमाः । (८।१)

व्यवस्थितानि रेवायास्तीरयुग्मे पदे पदे ॥ (८।२)

सारितः परितः सन्ति सतीर्थास्तु सहस्रशः । (९।१)

न तुलां यान्ति रेवायास्ताश्च मन्ये मुनीश्वराः ॥ (९।२)

एतद्वः कथितं सर्वं यत्पृष्टमखिलं द्विजाः । (१०।१)

यन्महेशमुखाच्छ्रुत्वा वायुराह ऋषीन्प्रति ॥ (१०।२)

तद्वन्मृकण्डतनयो ऽप्यनुभूयाखिलां नदीम् । (११।१)

सतीर्थां पदशः प्राह पाण्डुपुत्राय पावनीम् ॥ (११।२)

एतच्च कथितं सर्वं संक्षेपेण द्विजोत्तमाः । (१२।१)

नर्मदाचरितं पुण्यं त्रिषु लोकेषु दुर्लभम् ॥ (१२।२)

किमन्यैः सरितां तोयैः सेवितैस् तु सहस्रशः । (१३।१)

यदि संसेव्यते तोयं रेवायाः पापनाशनम् ॥ (१३।२)

मेकलाजलसंसेवी मुक्तिमाप्नोति शाश्वतीम् ॥ (१४।१)

यथा यथा भजेन्मर्त्यो यद्यदिच्छति तीर्थगः । (१५।१)

तत्तदाप्नोति नियतं श्रद्धयाश्रद्धयापि च ॥ (१५।२)

इदं ब्रह्मा हरिरिदमिदं साक्षात्परो हरः । (१६।१)

इदं ब्रह्म निराकारं कैवल्यं नर्मदाजलम् ॥ (१६।२)

तावद्गर्जन्ति तीर्थानि नद्यो हृदयफलप्रदाः । (१७।१)

यावन्न स्मर्यते रेवा सेवाहेवा कलौ नरैः ॥ (१७।२)

ध्रुवं लोके हितार्थाय शिवेन स्वशरीरतः । (१८।१)

शक्तिः कापि सरिद्रूपा रेवेयमवतारिता ॥ (१८।२)

तावद्गर्जन्ति यज्ञाश्च वनक्षेत्रादयो भृशम् । (१९।१)

यावन्न नर्मदानामकीर्तनं क्रियते कलौ ॥ (१९।२)

गरिमा गाण्यते तावत्तपोदानव्रतादिषु । (२०।१)

नरैर्वा प्राप्यते यावद्भुवि भर्गभवा धुनी ॥ (२०।२)

ये वसन्त्युत्तरे कूले रुद्रस्यानुचरा हि ते । (२१।१)

वसन्ति याम्यतीरे ये लोकं ते यान्ति वैष्णवम् ॥ (२१।२)

धन्यास्ते देशवर्यास्ते येषु देशेषु नर्मदा । (२२।१)

नरकान्तकरी शश्वत्संश्रिता शर्वनिर्मिता ॥ (२२।२)

कृतपुण्याश्च ते लोकाः शोकाय न भवन्ति ते । (२३।१)

ये पिबन्ति जलं पुण्यं पार्वतीपतिसिन्धुजम् ॥ (२३।२)

इदं पवित्रमतुलं रेवायाश्चरितं द्विजाः । (२४।१)

शृणोति यः कीर्तयते मुच्यते सर्वपातकः ॥ (२४।२)

यत्फलं सर्ववेदैश्च सषडङ्गपदक्रमैः । (२५।१)

श्रुतैश्च पठितैस्तस्मात्फलमष्टगुणं भवेत् ॥ (२५।२)

सत्रयाजी फलं यच्च लभते द्वादशाब्दिकम् । (२६।१)

श्रुत्वा सकृच्च रेवायाश्चरितं तत्फलं लभेत् ॥ (२६।२)

सर्वतीर्थावगाहाच्च यत्फलं सागरादिषु । (२७।१)

सकृच्छ्रुत्वा च माहात्म्यं रेवायास् तत्फलं लभेत् ॥ (२७।२)

एतद्धर्म्यमुपाख्यानं सर्वशास्त्रेष्वनुत्तमम् । (२८।१)

देशे वा मण्डले वापि नगरे ग्राममध्यतः ॥ (२८।२)

गृहे वा तिष्ठते यस्य लिखितं सार्ववार्णिकम् । (२९।१)

स ब्रह्मा स शिवः साक्षात्स च देवो जनार्दनः ॥ (२९।२)

धर्मार्थकाममोक्षाणां मार्गे ऽयं देवसेवितः । (३०।१)

गुरूणां च गुरुः शास्त्रं परमं सिद्धिकारणम् ॥ (३०।२)

यश्चेदं शृणुयान्नित्यं पुराणं देवभाषितम् । (३१।१)

ब्राह्मणो वेदवान्भूयात्क्षत्रियो विजयी भवेत् ॥ (३१।२)

धनाढ्यो जायते वैश्यः शूद्रो वै धर्मभाग् भवेत् ॥ (३२।१)

सौभाग्यसन्ततिं नारी श्रुत्वैतत्समवाप्नुयात् । (३३।१)

श्रियं सौख्यं स्वर्गवासं जन्म चैवोत्तमे कुले ॥ (३३।२)

रसभेदी कृतघ्नश्च स्वामिध्रुङ् मित्रवञ्चकः । (३४।१)

गोघ्नश्च गरदश्चैव कन्याविक्रयकारकः ॥ (३४।२)

ब्रह्मघ्नश्च सुरापी च स्तेयी च गुरुतल्पगः । (३५।१)

नर्मदाचरितं शृण्वंस्तामब्दं यो ऽभिषेवते ॥ (३५।२)

सर्वपापविनिर्मुक्तो जायते नात्र संशयः । (३६।१)

पाकभेदी वृथापाकी देवब्राह्मणनिन्दकः ॥ (३६।२)

परीवादी गुरोः पित्रोः साधूनां नृपतेस्तथा । (३७।१)

ते ऽपि श्रुत्वा च पापेभ्यो मुच्यन्ते नात्र संशयः ॥ (३७।२)

ये पुनर्भावितात्मानः शस्त्रं शृण्वन्ति नित्यशः । (३८।१)

पूजयन्ति च तच्छास्त्रं नार्मदं वस्त्रभूषणैः ॥ (३८।२)

पुष्पैः फलैश् चन्दनाद्यैर् भोजनैर् विविधैर् अपि । (३९।१)

शास्त्रे ऽस्मिन्पूजिते देवाः पूजिता गुरवस्तथा ॥ (३९।२)

इह लोके परे चैव नात्र कार्या विचारणा । (४०।१)

तस्मात्सर्वप्रयत्नेन गन्धवस्त्रादिभूषणैः ॥ (४०।२)

पूजयेत्परया भक्त्या वाचकं शास्त्रमेव च । (४१।१)

वेदपाठैश्च यत्पुण्यमग्निहोत्रैश्च पालितैः ॥ (४१।२)

तत्फलं समवाप्नोति नर्मदाचरिते शुभे । (४२।१)

कुरुक्षेत्रे च यत्पुण्यं प्रभासे पुष्करे तथा ॥ (४२।२)

रुद्रावर्ते गयायां च वाराणस्यां विशेषतः । (४३।१)

गङ्गाद्वारे प्रयागे च गङ्गासागरसङ्गमे ॥ (४३।२)

एवमादिषु तीर्थेषु यत्पुण्यं जायते नृणाम् । (४४।१)

नर्मदाचरितं श्रुत्वा तत्पुण्यं सकलं लभेत् ॥ (४४।२)

आदिमध्यावसानेषु नर्मदाचरितं शुभम् । (४५।१)

यः शृणोति नरो भक्त्या शृणुध्वं तत्फलं महत् ॥ (४५।२)

समाप्य शिवसंस्थानं देवकन्यासमावृतः । (४६।१)

रुद्रस्यानुचरो भूत्वा शिवेन सह मोदते ॥ (४६।२)

धर्माख्यानमिदं पुण्यं सर्वाख्यानेष्वनुत्तमम् । (४७।१)

गृहे ऽपि पठ्यते यस्य चतुर्वर्णस्य सत्तमाः ॥ (४७।२)

धन्यं तस्य गृहं मन्ये गृहस्थं चापि तत्कुलम् । (४८।१)

पुस्तकं पूजयेद्यस्तु नर्मदाचरितस्य तु ॥ (४८।२)

नर्मदा पूजिता तेन भगवांश्च महेश्वरः । (४९।१)

वाचके पूजिते तद्वद्देवाश्च ऋषयो ऽर्चिताः ॥ (४९।२)

लेखयित्वा च सकलं रेवाचरितमुत्तमम् । (५०।१)

भूषणं सर्वशास्त्राणां यो ददाति द्विजन्मने ॥ (५०।२)

नर्मदासर्वतीर्थेषु स्नानदानेन यत्फलम् । (५१।१)

तत्फलं समवाप्नोति स नरो नात्र संशयः ॥ (५१।२)

एतत्पुराणं रुद्रोक्तं महापुण्यफलप्रदम् । (५२।१)

स्वर्गदं पुत्रदं धन्यं यशस्यं कीर्त्तिवर्धनम् ॥ (५२।२)

धर्म्यमायुष्यमतुलं दुःखदुःस्वप्ननाशनम् । (५३।१)

पठतां शृण्वतां चापि सर्वकामार्थसिद्धिदम् ॥ (५३।२)

यत्प्रदत्तमिदं पुण्यं पुराणं वाच्यते द्विजैः । (५४।१)

शिवलोके स्थितिस् तस्य पुराणाक्षरवत्सरी ॥ (५४।२)

इति निगदितमेतन्नर्मदायाश्चरित्रं पवनगदितमग्र्यं शर्ववक्त्रादवाप्य । (५५।१)

त्रिभुवनजनवन्द्यं त्वेतदादौ मुनीनां कुलपतिपुरतस् तत् सूतमुख्येन साधु ॥ (५५।२)

इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे रेवाखण्डसमाप्तिरेवाखण्डपुस्तकदानादिमाहात्म्यवर्णनं नाम द्वात्रिंशदधिकद्विशततमो ऽध्यायः ॥ (५६।१)