मार्कण्डेय उवाच । (१।१)

ततः क्रोशान्तरे पार्थ तीर्थं कोटीश्वरं परम् । (१।२)

यत्र स्नानं च दानं च जपहोमार्चनादिकम् । (१।३)

भक्त्या कृतं नरैस्तत्र सर्वं कोटिगुणं भवेत् ॥ (१।४)

तत्र देवाः सगन्धर्वा ऋषयः सिद्धचारणाः । (२।१)

जलधिं प्रतिगच्छन्ति नर्मदां वीक्षितुं किल ॥ (२।२)

मिलिताः कोटिशो राजन्रेवासागरसङ्गमे । (३।१)

विनोदमतुलं दृष्ट्वा रेवार्णवसमागमे ॥ (३।२)

स्नात्वा शिवं च संस्थाप्य पूजयित्वा महेश्वरम् । (४।१)

कोटीश्वराभिधानं तु स्वस्वभक्त्या विधानतः ॥ (४।२)

कोटीतीर्थे परां सिद्धिं सम्प्राप्ताः सर्वतोषणात् । (५।१)

तेन तत्पुण्यमतुलं सर्वतीर्थेषु चोत्तमम् ॥ (५।२)

तत्र तीर्थे तु यत्किंचिच्छुभं वा यदि वाशुभम् । (६।१)

क्रियते नृपशार्दूल सर्वं कोटिगुणं भवेत् ॥ (६।२)

तत्र तीर्थे तु मार्गस्था ये केचिदृषिसत्तमाः । (७।१)

सिद्धामृतपदं यान्ति पितृलोकं तथोत्तमम् ॥ (७।२)

उत्तरे नर्मदातीरे दक्षिणे चाश्रिताश्च ये । (८।१)

देवलोकं गतास् तत्र इति मे निश्चिता मतिः ॥ (८।२)

बिल्वार्कपुष्पैर् धत्तूरकुशकाशप्रसूनकैः । (९।१)

ऋतूद्भवैस्तथान्यैश्च पूजयित्वा महेश्वरम् ॥ (९।२)

नानोपचारैर् विधिवन् मन्त्रपूर्वं युधिष्ठिर । (१०।१)

धूपदीपार्धनैवेद्यैस्तोषयित्वा च धूर्जटिम् ॥ (१०।२)

शिवलोकमवाप्नोति यावदिन्द्राश्चतुर्दश । (११।१)

पौषकृष्णाष्टमीयोगे विशेषः पूजने स्मृतः ॥ (११।२)

नित्यं च नृपतिश्रेष्ठ चतुर्दश्यष्टमीषु च । (१२।१)

शिवमभ्यर्च्य विप्रांश्च भोजयेद् भक्तितो वरान् ॥ (१२।२)

इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे कोटीश्वरतीर्थमाहात्म्यवर्णनं नाम चतुर्विंशत्यधिकद्विशततमो ऽध्यायः ॥ (१३।१)