श्रीमार्कण्डेय उवाच । (१।१)

ततो गच्छेत्तु राजेन्द्र तीर्थं कोटीश्वरं परम् । (१।२)

ऋषिकोटिः समायाता यत्र वै कुरुनन्दन ॥ (१।३)

कृष्णद्वैपायनस्यैव क्षेमार्थं मुनिपुंगवाः । (२।१)

मन्त्रयित्वा द्विजैः सर्वैर् वेदमङ्गलपाठकैः ॥ (२।२)

स्थापितः शङ्करस्तत्र कारणं बन्धनाशनम् । (३।१)

संसारच्छेदकरणं प्राणिनामार्तिनाशनम् ॥ (३।२)

कोटीश्वरमिति प्रोक्तं पृथिव्यां नृपनन्दन । (४।१)

स्नापयेत्तं तु यो भक्त्या पूर्णिमायां नृपोत्तम ॥ (४।२)

पितॄणां तर्पणं कृत्वा पिण्डदानं यथाविधि । (५।१)

श्रावणस्य विशेषेण पूर्णिमायां युधिष्ठिर ॥ (५।२)

पितॄणाम् अक्षया तृप्तिर्यावदाभूतसम्प्लवम् । (६।१)

पितॄणां परमं गुह्यं रेवातटसमाश्रितम् । (६।२)

मोक्षदं सर्वजन्तूनां निर्मितं मुनिसत्तमैः ॥ (६।३)

इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे कोटीश्वरतीर्थमाहात्म्यवर्णनं नाम षण्णवतितमो ऽध्यायः ॥ (७।१)