श्रीमार्कण्डेय उवाच । (१।१)

ततो गच्छेद् धराधीश हंसतीर्थमनुत्तमम् । (१।२)

यत्र हंसस्तपस्तप्त्वा ब्रह्मवाहनतां गतः ॥ (१।३)

हंसतीर्थे नरः स्नात्वा दानं दत्त्वा च काञ्चनम् । (२।१)

सर्वपापविनिर्मुक्तो ब्रह्मलोकं स गच्छति ॥ (२।२)

हंसयुक्तेन यानेन तरुणादित्यवर्चसा । (३।१)

सर्वकामसमृद्धेन सेव्यमानो ऽप्सरोगणैः ॥ (३।२)

तत्र भुक्त्वा यथाकामं सर्वान् भोगान् यथेप्सितान् । (४।१)

जातिस्मरो हि जायेत पुनर्मानुष्यम् आगतः ॥ (४।२)

संन्यासेन त्यजेद् देहं मोक्षम् आप्नोति भारत ॥ (५।१)

एतत्ते कथितं पार्थ हंसतीर्थस्य यत्फलम् । (६।१)

सर्वपापहरं पुण्यं सर्वदुःखविनाशनम् ॥ (६।२)

इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे हंसतीर्थमाहात्म्यवर्णनं नाम षण्णवत्युत्तरशततमो ऽध्यायः ॥ (७।१)