श्रीमार्कण्डेय उवाच । (१।१)

समातृभिर्भूतगणश्च घोरैर्वृतः समन्तात्स ननर्त शूली । (१।२)

गजेन्द्रचर्मावरणे वसानः संहर्तुकामश्च जगत्समस्तम् ॥ (१।३)

महेश्वरः सर्वसुरेश्वराणां मन्त्रैर् अनेकेखबद्धमाली । (२।१)

मेदोवसारक्तविचर्चिताङ्गस्त्रैलोक्यदाहे प्रणनर्त शम्भुः ॥ (२।२)

स कालरात्र्या सहितो महात्मा काले त्रिलोकीं सकलां जहार । (३।१)

संवर्तकाख्यः सहभानुभावः शम्भुर्महात्मा जगतो वरिष्ठः ॥ (३।२)

स विस्फुलिङ्गोत्करधूममिश्रं महोल्कवज्राशनिवाततुल्यम् । (४।१)

ततो ऽट्टहासं प्रमुमोच घोरं विवृत्य वक्त्रं वडवामुखाभम् ॥ (४।२)

सहस्रवज्राशनिसंनिभेन तेनाट्टहासेन हरोद्गतेन । (५।१)

आपूरितास्तत्र दिशो दशैव संक्षोभिताः सर्वमहार्णवाश्च ॥ (५।२)

स ब्रह्मलोकं प्रजगाम शब्दो ब्रह्माण्डभाण्डं प्रचचाल सर्वम् । (६।१)

किमेतदित्याकुलचेतनास्ते वित्रस्तरूपा ऋषयो बभूवुः ॥ (६।२)

प्रणम्य सर्वे सहसैव भीता ब्रह्माणमूचुः परमेश्वरेशम् । (७।१)

भीताश्च सर्वे ऋषयस्ततस्ते सुरासुरैश्चैव महोरगैश्च ॥ (७।२)

विद्युत्प्रभाभासुरभीषणाङ्गः क एष चिक्रीडति भूतलस्थः । (८।१)

कालानलं गात्रमिदं दधानो यस्याट्टहासेन जगद्विमूढम् ॥ (८।२)

वित्रस्तरूपं प्रबभौ क्षणेन संहर्तुमिच्छेत्किमयं त्रिलोकीम् । (९।१)

सार्धं त्वया सप्तभिरर्णकैश्च जनस्तपः सत्यमभिप्रयाति ॥ (९।२)

संहर्तुकामो हि क एष देव एतत्समस्तं कथयाप्रमेय । (१०।१)

न दृष्टमेतद् विषमं कदापि जानासि तत्त्वं परमो मतो नः ॥ (१०।२)

निशम्य तद्वाक्यमथाबभाषे ब्रह्मा समाश्वास्य सुरादिसङ्घान् ॥ (११।१)

श्रीब्रह्मोवाच । (१२।१)

स एष कालस्त्रिदिवं त्वशेषं संहर्तुकामो जगदक्षयात्मा । (१२।२)

पूर्णे च शेते परिवत्सराणां भविष्यतीशानविभुर्न चित्रम् ॥ (१२।३)

संवत्सरो ऽयं परिवत्सरश्च उद्वत्सरो वत्सर एष देवः । (१३।१)

दृष्टो ऽप्यदृष्टः प्रहुतः प्रकाशी स्थूलश्च सूक्ष्मः परमाणुरेषः ॥ (१३।२)

नातः परं किंचिदिहास्ति लोके परापरो ऽयं प्रभुरात्मवादी । (१४।१)

तुष्येत मे कालसमानरूप इत्येवमुक्त्वा भगवान्सुरेशः ॥ (१४।२)

सनत्कुमारप्रमुखैः समेतः संतोषयामास ततो यतात्मा ॥ (१५।१)

ब्रह्मोवाच । (१६।१)

नमो ऽस्तु सर्वाय सुशान्तमूर्ताये ह्यघोररूपाय नमोनमस्ते । (१६।२)

सर्वात्मने सर्व नमोनमस्ते महात्मने भूतपते नमस्ते ॥ (१६।३)

ओङ्कार हुङ्कारपरिष्कृताय स्वधावषट्कार नमोनमस्ते । (१७।१)

गुणत्रयेशाय महेश्वराय ते त्रयीमयाय त्रिगुणात्मने नमः ॥ (१७।२)

त्वं शङ्करत्वं हि महेश्वरो ऽसि प्रधानमग्र्यं त्वमसि प्रविष्टः । (१८।१)

त्वं विष्णुरीशः प्रपितामहश्च त्वं सप्तजिह्वस्त्वमनन्तजिह्वः ॥ (१८।२)

स्रष्टासि सृष्टिश्च विभो त्वमेव विश्वस्य वेद्यं च परं निधानम् । (१९।१)

आहुर्द्विजा वेदविदो वरेण्यं परात्परस्त्वं परतः परो ऽसि ॥ (१९।२)

सूक्ष्मातिसूक्ष्मं प्रवदन्ति यच्च वाचो निवर्तन्ति मनो यतश्च ॥ (२०।१)

श्रीमहादेव उवाच । (२१।१)

त्वया स्तुतोऽहं विविधैश्च मन्त्रैः पुष्णामि शान्तिं तव पद्मयोने । (२१।२)

ईक्षस्व मां लोकमिमं ज्वलन्तं वक्त्रैरनेकैः प्रसभं हरन्तम् ॥ (२१।३)

एवमुक्त्वा स देवेशो देव्या सह जगत्पतिः । (२२।१)

पितामहं समाश्वास्य तत्रैवान्तरधीयत ॥ (२२।२)

इदं महत्पुण्यतमं वरिष्ठं स्तोत्रं निशम्येह गतिं लभन्ते । (२३।१)

पापैरनेकैः परिवेष्टिता ये प्रयान्ति रुद्रं विमलैर्विमानैः ॥ (२३।२)

भयं च तेषां न भवेत्कदाचित्पठन्ति ये तात इदं द्विजाग्र्याः । (२४।१)

सङ्ग्रामचौराग्निवने तथाब्धौ तेषां शिवस्त्राति न संशयो ऽत्र ॥ (२४।२)

इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे नर्मदामाहात्म्ये ब्रह्मकृतशिवस्तुतिवर्णनं नाम षोडशो ऽध्यायः ॥ (२५।१)