श्रीमार्कण्डेय उवाच । (१।१)

ततो गच्छेत्तु राजेन्द्र करोडीश्वरम् उत्तमम् । (१।२)

यत्र वै निहतास्तात दानवाः सपदानुगाः ॥ (१।३)

इन्द्रादिदेवैः संहृष्टैः सततं जयबुद्धिभिः । (२।१)

तेषां ये पुत्रपौत्राश्च पूर्ववैरम् अनुस्मरम् ॥ (२।२)

क्रुद्धैर्देवसमूहैश्च दानवा निहता रणे । (३।१)

तेषां शिरांसि संगृह्य सर्वे देवाः सवासवाः ॥ (३।२)

निक्षिप्य नर्मदातोये बन्धुभावम् अनुस्मरम् । (४।१)

तत्र स्नात्वा सुराः सर्वे स्थापयित्वा उमापतिम् ॥ (४।२)

इन्द्रेण सहिताः सर्वे ऽपूजयंल्लोकसिद्धये । (५।१)

हृष्टचित्ताः सुराः सर्वे जग्मुराकाशमण्डलम् ॥ (५।२)

दानवानां महाभाग सूदिता कोटिरुत्तमा । (६।१)

तदा प्रभृति तत्तीर्थं करोडीति महीतले ॥ (६।२)

विख्यातं तु तदा लोके पापघ्नं पाण्डुनन्दन । (७।१)

अष्टम्यां च चतुर्दश्याम् उभौ पक्षौ च भक्तितः । (७।२)

उपोष्य शूलिनश्चाग्रे रात्रौ कुर्वीत जागरम् ॥ (७।३)

सत्कथापाठसंयुक्तो वेदाध्ययनसंयुतः । (८।१)

प्रभाते विमले प्राप्ते पूजयेत् त्रिदशेश्वरम् ॥ (८।२)

पञ्चामृतेन संस्नाप्य श्रीखण्डेन च गुण्ठयेत् । (९।१)

शस्तैः पल्लवपुष्पैश्च पूजयेत्तु प्रयत्नतः ॥ (९।२)

बहुरूपं जपन्मन्त्रं दक्षिणाशां व्यवस्थितः । (१०।१)

यथोक्तेन विधानेन नाभिमात्रे जले क्षिपेत् ॥ (१०।२)

तिलाञ्जलिं तु प्रेताय दक्षिणाशाम् उपस्थितः । (११।१)

श्राद्धं तत्रैव विप्राय कारयेद् विजितेन्द्रियः ॥ (११।२)

विषमैरग्रजातैश्च वेदाभ्यसनतत्परैः । (१२।१)

गोहिरण्येन सम्पूज्य ताम्बूलैर्भोजनैस्तथा ॥ (१२।२)

भूषणैः पादुकाभिश्च ब्राह्मणान्पाण्डुनन्दन । (१३।१)

भवेत्कोटिगुणं तस्य नात्र कार्या विचारणा ॥ (१३।२)

तस्मिंस् तीर्थे तु यः कश्चित् त्यजेद् देहं विधानतः । (१४।१)

तस्य भवति यत्पुण्यं तच्छृणुष्व नराधिप ॥ (१४।२)

यावदस्थीनि तिष्ठन्ति मर्त्यस्य नर्मदाजले । (१५।१)

तावद्वसति धर्मात्मा शिवलोके सुदुर्लभे ॥ (१५।२)

ततः कालाच्च्युतस्तस्मादिह मानुषतां गतः । (१६।१)

कोटिधनपतिः श्रीमाञ्जायते राजपूजितः ॥ (१६।२)

सर्वधर्मसमायुक्तो मेधावी बीजपुत्रकः । (१७।१)

विख्यातो वसुधापृष्ठे दीर्घायुर्मानवो भवेत् ॥ (१७।२)

पुनः स्मरति तत्तीर्थं तत्र गत्वा नृपोत्तम । (१८।१)

करोडेश्वरमभ्यर्च्य प्राप्नोति परमां गतिम् ॥ (१८।२)

इन्द्रचन्द्रयमैर् रुद्रैरादित्यैर्वसुभिस्तथा । (१९।१)

विश्वेदेवैस्तथा सर्वैः स्थापितस्त्रिदशेश्वरः ॥ (१९।२)

रेवाया उत्तरे कूले लोकानां हितकाम्यया । (२०।१)

मानवो भक्तिसंयुक्तः प्रासादं कारयेत्तु यः ॥ (२०।२)

तस्मिंस्तीर्थे नरश्रेष्ठ सद्गतिं समवाप्नुयात् । (२१।१)

न्यायोपात्तधनेनैव दारुपाषाणकेष्टकैः ॥ (२१।२)

ब्राह्मणः क्षत्रियैर्वैश्यैः शूद्रैः स्त्रीभिश्च शक्तितः । (२२।१)

ते ऽपि यान्ति नरा लोके शांकरे सुरपूजिते ॥ (२२।२)

यः शृणोति सदा भक्त्या माहात्म्यं तीर्थजं नृप । (२३।१)

तस्य पापं प्रणश्येत षण्मासाभ्यन्तरं च यत् ॥ (२३।२)

इति श्रीस्कान्दे महापुराण एकाशीतिसाहस्र्यां संहितायां पञ्चम आवन्त्यखण्डे रेवाखण्डे करोडीश्वरतीर्थमाहात्म्यवर्णनं नाम द्विषष्टितमो ऽध्यायः ॥ (२४।१)