तच् छ्रुत्वा वचनं तस्य स्नेहपर्याकुलाक्षरम् । (१।१)

समन्युः कौशिको वाक्यं प्रत्युवाच महीपतिम् ॥ (१।२)

पूर्वम् अर्थं प्रतिश्रुत्य प्रतिज्ञां हातुम् इच्छसि । (२।१)

राघवाणाम् अयुक्तो ऽयं कुलस्यास्य विपर्ययः ॥ (२।२)

यद् इदं ते क्षमं राजन् गमिष्यामि यथागतम् । (३।१)

मिथ्याप्रतिज्ञः काकुत्स्थ सुखी भव सबान्धवः ॥ (३।२)

तस्य रोषपरीतस्य विश्वामित्रस्य धीमतः । (४।१)

चचाल वसुधा कृत्स्ना विवेश च भयं सुरान् ॥ (४।२)

त्रस्तरूपं तु विज्ञाय जगत् सर्वं महान् ऋषिः । (५।१)

नृपतिं सुव्रतो धीरो वसिष्ठो वाक्यम् अब्रवीत् ॥ (५।२)

इक्ष्वाकूणां कुले जातः साक्षाद् धर्म इवापरः । (६।१)

धृतिमान्सुव्रतः श्रीमान् न धर्मं हातुम् अर्हसि ॥ (६।२)

त्रिषु लोकेषु विख्यातो धर्मात्मा इति राघवः । (७।१)

स्वधर्मं प्रतिपद्यस्व नाधर्मं वोढुम् अर्हसि ॥ (७।२)

संश्रुत्यैवं करिष्यामीत्य् अकुर्वाणस्य राघव । (८।१)

इष्टापूर्तवधो भूयात् तस्माद् रामं विसर्जय ॥ (८।२)

कृतास्त्रम् अकृतास्त्रं वा नैनं शक्ष्यन्ति राक्षसाः । (९।१)

गुप्तं कुशिकपुत्रेण ज्वलनेनामृतं यथा ॥ (९।२)

एष विग्रहवान् धर्म एष वीर्यवतां वरः । (१०।१)

एष बुद्ध्याधिको लोके तपसश् च परायणम् ॥ (१०।२)

एषो ऽस्त्रान् विविधान् वेत्ति त्रैलोक्ये सचराचरे । (११।१)

नैनम् अन्यः पुमान् वेत्ति न च वेत्स्यन्ति केचन ॥ (११।२)

न देवा नर्षयः केचिन् नासुरा न च राक्षसाः । (१२।१)

गन्धर्वयक्षप्रवराः सकिंनरमहोरगाः ॥ (१२।२)

सर्वास्त्राणि कृशाश्वस्य पुत्राः परमधार्मिकाः । (१३।१)

कौशिकाय पुरा दत्ता यदा राज्यं प्रशासति ॥ (१३।२)

ते ऽपि पुत्राः कृशाश्वस्य प्रजापतिसुतासुताः । (१४।१)

नकरूपा महावीर्या दीप्तिमन्तो जयावहाः ॥ (१४।२)

जया च सुप्रभा चैव दक्षकन्ये सुमध्यमे । (१५।१)

ते सुवाते ऽस्त्रशस्त्राणि शतं परमभास्वरम् ॥ (१५।२)

पञ्चाशतं सुतांल् लेभे जया नाम वरान् पुरा । (१६।१)

वधायासुरसैन्यानाम् अमेयान् कामरूपिणः ॥ (१६।२)

सुप्रभाजनयच् चापि पुत्रान् पञ्चाशतं पुनः । (१७।१)

संहारान् नाम दुर्धर्षान् दुराक्रामान् बलीयसः ॥ (१७।२)

तानि चास्त्राणि वेत्त्य् एष यथावत् कुशिकात्मजः । (१८।१)

अपूर्वाणां च जनने शक्तो भूयश् च धर्मवित् ॥ (१८।२)

एवंवीर्यो महातेजा विश्वामित्रो महातपाः । (१९।१)

न रामगमने राजन् संशयं गन्तुम् अर्हसि ॥ (१९।२)