कस्यचित्त्वथ कालस्य युधाजित् केकयो नृपः । (१।१)

स्वगुरुं प्रेषयामास राघवाय महात्मने ॥ (१।२)

गार्ग्यम् अङ्गिरसः पुत्रं ब्रह्मर्षिम् अमितप्रभम् । (२।१)

दश चाश्वसहस्राणि प्रीतिदानम् अनुत्तमम् ॥ (२।२)

कम्बलानि च रत्नानि चित्रवस्त्रम् अथोत्तमम् । (३।१)

रामाय प्रददौ राजा बहून्याभरणानि च ॥ (३।२)

श्रुत्वा तु राघवो गार्ग्यं महर्षिं समुपागतम् । (४।१)

मातुलस्याश्वपतिनः प्रियं दूतम् उपागतम् ॥ (४।२)

प्रत्युद्गम्य च काकुत्स्थः क्रोशमात्रं सहानुगः । (५।१)

गार्ग्यं संपूजयामास धनं तत् प्रतिगृह्य च ॥ (५।२)

पृष्ट्वा च प्रीतिदं सर्वं कुशलं मातुलस्य च । (६।१)

उपविष्टं महाभागं रामः प्रष्टुं प्रचक्रमे ॥ (६।२)

किम् आह मातुलो वाक्यं यदर्थं भगवान् इह । (७।१)

प्राप्तो वाक्यविदां श्रेष्ठ साक्षाद् इव बृहस्पतिः ॥ (७।२)

रामस्य भाषितं श्रुत्वा ब्रह्मर्षिः कार्यविस्तरम् । (८।१)

वक्तुम् अद्भुतसंकाशं राघवायोपचक्रमे ॥ (८।२)

मातुलस्ते महाबाहो वाक्यम् आह नरर्षभ । (९।१)

युधाजित् प्रीतिसंयुक्तं श्रूयतां यदि रोचते ॥ (९।२)

अयं गन्धर्वविषयः फलमूलोपशोभितः । (१०।१)

सिन्धोर् उभयतः पार्श्वे देशः परमशोभनः ॥ (१०।२)

तं च रक्षन्ति गन्धर्वाः सायुधा युद्धकोविदाः । (११।१)

शैलूषस्य सुता वीरास्तिस्रः कोट्यो महाबलाः ॥ (११।२)

तान् विनिर्जित्य काकुत्स्थ गन्धर्वविषयं शुभम् । (१२।१)

निवेशय महाबाहो द्वे पुरे सुसमाहितः ॥ (१२।२)

अन्यस्य न गतिस्तत्र देशश्चायं सुशोभनः । (१३।१)

रोचतां ते महाबाहो नाहं त्वाम् अनृतं वदे ॥ (१३।२)

तच्छ्रुत्वा राघवः प्रीतो महर्षेर्मातुलस्य च । (१४।१)

उवाच बाढम् इत्येवं भरतं चान्ववैक्षत ॥ (१४।२)

सो ऽब्रवीद् राघवः प्रीतः प्राञ्जलिप्रग्रहो द्विजम् । (१५।१)

इमौ कुमारौ तं देशं ब्रह्मर्षे विजयिष्यतः ॥ (१५।२)

भरतस्यात्मजौ वीरौ तक्षः पुष्कल एव च । (१६।१)

मातुलेन सुगुप्तौ तौ धर्मेण च समाहितौ ॥ (१६।२)

भरतं चाग्रतः कृत्वा कुमारौ सबलानुगौ । (१७।१)

निहत्य गन्धर्वसुतान् द्वे पुरे विभजिष्यतः ॥ (१७।२)

निवेश्य ते पुरवरे आत्मजौ संनिवेश्य च । (१८।१)

आगमिष्यति मे भूयः सकाशम् अतिधार्मिकः ॥ (१८।२)

ब्रह्मर्षिम् एवम् उक्त्वा तु भरतं सबलानुगम् । (१९।१)

आज्ञापयामास तदा कुमारौ चाभ्यषेचयत् ॥ (१९।२)

नक्षत्रेण च सौम्येन पुरस्कृत्याङ्गिरःसुतम् । (२०।१)

भरतः सह सैन्येन कुमाराभ्यां च निर्ययौ ॥ (२०।२)

सा सेना शक्रयुक्तेव नगरान्निर्ययावथ । (२१।१)

राघवानुगता दूरं दुराधर्षा सुरासुरैः ॥ (२१।२)

मांसाशीनि च सत्त्वानि रक्षांसि सुमहान्ति च । (२२।१)

अनुजग्मुश्च भरतं रुधिरस्य पिपासया ॥ (२२।२)

भूतग्रामाश्च बहवो मांसभक्षाः सुदारुणाः । (२३।१)

गन्धर्वपुत्रमांसानि भोक्तुकामाः सहस्रशः ॥ (२३।२)

सिंहव्याघ्रसृगालानां खेचराणां च पक्षिणाम् । (२४।१)

बहूनि वै सहस्राणि सेनाया ययुर् अग्रतः ॥ (२४।२)

अध्यर्धमासम् उषिता पथि सेना निरामया । (२५।१)

हृष्टपुष्टजनाकीर्णा केकयं समुपागमत् ॥ (२५।२)