धूम्राक्षं प्रेक्ष्य निर्यान्तं राक्षसं भीमनिस्वनम् । (१।१)

विनेदुर् वानराः सर्वे प्रहृष्टा युद्धकाङ्क्षिणः ॥ (१।२)

तेषां तु तुमुलं युद्धं संजज्ञे हरिरक्षसाम् । (२।१)

अन्योन्यं पादपैर् घोरैर् निघ्नतां शूलमुद्गरैः ॥ (२।२)

राक्षसैर् वानरा घोरा विनिकृत्ताः समन्ततः । (३।१)

वानरै राक्षसाश्चापि द्रुमैर् भूमौ समीकृताः ॥ (३।२)

राक्षसाश्चापि संक्रुद्धा वानरान्निशितैः शरैः । (४।१)

विव्यधुर् घोरसंकाशैः कङ्कपत्रैर् अजिह्मगैः ॥ (४।२)

ते गदाभिश्च भीमाभिः पट्टसैः कूटमुद्गरैः । (५।१)

घोरैश्च परिघैश्चित्रैस्त्रिशूलैश्चापि संशितैः ॥ (५।२)

विदार्यमाणा रक्षोभिर् वानरास्ते महाबलाः । (६।१)

अमर्षाज्जनितोद्धर्षाश्चक्रुः कर्माण्यभीतवत् ॥ (६।२)

शरनिर्भिन्नगात्रास्ते शूलनिर्भिन्नदेहिनः । (७।१)

जगृहुस्ते द्रुमांस्तत्र शिलाश्च हरियूथपाः ॥ (७।२)

ते भीमवेगा हरयो नर्दमानास्ततस्ततः । (८।१)

ममन्थू राक्षसान् भीमान्नामानि च बभाषिरे ॥ (८।२)

तद् बभूवाद्भुतं घोरं युद्धं वानररक्षसाम् । (९।१)

शिलाभिर् विविधाभिश्च बहुशाखैश्च पादपैः ॥ (९।२)

राक्षसा मथिताः केचिद् वानरैर् जितकाशिभिः । (१०।१)

ववर्षू रुधिरं केचिन् मुखै रुधिरभोजनाः ॥ (१०।२)

पार्श्वेषु दारिताः केचित् केचिद् राशीकृता द्रुमैः । (११।१)

शिलाभिश्चूर्णिताः केचित् केचिद् दन्तैर् विदारिताः ॥ (११।२)

ध्वजैर् विमथितैर् भग्नैः खरैश्च विनिपातितैः । (१२।१)

रथैर् विध्वंसितैश्चापि पतितै रजनीचरैः ॥ (१२।२)

वानरैर् भीमविक्रान्तैर् आप्लुत्याप्लुत्य वेगितैः । (१३।१)

राक्षसाः करजैस्तीक्ष्णैर् मुखेषु विनिकर्तिताः ॥ (१३।२)

विवर्णवदना भूयो विप्रकीर्णशिरोरुहाः । (१४।१)

मूढाः शोणितगन्धेन निपेतुर् धरणीतले ॥ (१४।२)

अन्ये तु परमक्रुद्धा राक्षसा भीमविक्रमाः । (१५।१)

तलैर् एवाभिधावन्ति वज्रस्पर्शसमैर् हरीन् ॥ (१५।२)

वानरैर् आपतन्तस्ते वेगिता वेगवत्तरैः । (१६।१)

मुष्टिभिश्चरणैर् दन्तैः पादपैश्चापपोथिताः ॥ (१६।२)

सैन्यं तु विद्रुतं दृष्ट्वा धूम्राक्षो राक्षसर्षभः । (१७।१)

क्रोधेन कदनं चक्रे वानराणां युयुत्सताम् ॥ (१७।२)

प्रासैः प्रमथिताः केचिद् वानराः शोणितस्रवाः । (१८।१)

मुद्गरैर् आहताः केचित् पतिता धरणीतले ॥ (१८।२)

परिघैर् मथितः केचिद् भिण्डिपालैर् विदारिताः । (१९।१)

पट्टसैर् आहताः केचिद् विह्वलन्तो गतासवः ॥ (१९।२)

केचिद् विनिहता भूमौ रुधिरार्द्रा वनौकसः । (२०।१)

केचिद् विद्राविता नष्टाः संक्रुद्धै राक्षसैर् युधि ॥ (२०।२)

विभिन्नहृदयाः केचिद् एकपार्श्वेन शायिताः । (२१।१)

विदारितास्त्रिशूलैश्च केचिद् आन्त्रैर् विनिस्रुताः ॥ (२१।२)

तत् सुभीमं महद् युद्धं हरिराक्षससंकुलम् । (२२।१)

प्रबभौ शस्त्रबहुलं शिलापादपसंकुलम् ॥ (२२।२)

धनुर्ज्यातन्त्रिमधुरं हिक्कातालसमन्वितम् । (२३।१)

मन्द्रस्तनितसंगीतं युद्धगान्धर्वम् आबभौ ॥ (२३।२)

धूम्राक्षस्तु धनुष्पाणिर् वानरान् रणमूर्धनि । (२४।१)

हसन् विद्रावयामास दिशस्ताञ् शरवृष्टिभिः ॥ (२४।२)

धूम्राक्षेणार्दितं सैन्यं व्यथितं दृश्य मारुतिः । (२५।१)

अभ्यवर्तत संक्रुद्धः प्रगृह्य विपुलां शिलाम् ॥ (२५।२)

क्रोधाद् द्विगुणताम्राक्षः पितृतुल्यपराक्रमः । (२६।१)

शिलां तां पातयामास धूम्राक्षस्य रथं प्रति ॥ (२६।२)

आपतन्तीं शिलां दृष्ट्वा गदाम् उद्यम्य संभ्रमात् । (२७।१)

रथाद् आप्लुत्य वेगेन वसुधायां व्यतिष्ठत ॥ (२७।२)

सा प्रमथ्य रथं तस्य निपपात शिला भुवि । (२८।१)

सचक्रकूबरं साश्वं सध्वजं सशरासनम् ॥ (२८।२)

स भङ्क्त्वा तु रथं तस्य हनूमान्मारुतात्मजः । (२९।१)

रक्षसां कदनं चक्रे सस्कन्धविटपैर् द्रुमैः ॥ (२९।२)

विभिन्नशिरसो भूत्वा राक्षसाः शोणितोक्षिताः । (३०।१)

द्रुमैः प्रमथिताश्चान्ये निपेतुर् धरणीतले ॥ (३०।२)

विद्राव्य राक्षसं सैन्यं हनूमान्मारुतात्मजः । (३१।१)

गिरेः शिखरम् आदाय धूम्राक्षम् अभिदुद्रुवे ॥ (३१।२)

तम् आपतन्तं धूम्राक्षो गदाम् उद्यम्य वीर्यवान् । (३२।१)

विनर्दमानः सहसा हनूमन्तम् अभिद्रवत् ॥ (३२।२)

ततः क्रुद्धस्तु वेगेन गदां तां बहुकण्टकाम् । (३३।१)

पातयामास धूम्राक्षो मस्तके तु हनूमतः ॥ (३३।२)

ताडितः स तया तत्र गदया भीमरूपया । (३४।१)

स कपिर् मारुतबलस्तं प्रहारम् अचिन्तयन् । (३४।२)

धूम्राक्षस्य शिरोमध्ये गिरिशृङ्गम् अपातयत् ॥ (३४।३)

स विह्वलितसर्वाङ्गो गिरिशृङ्गेण ताडितः । (३५।१)

पपात सहसा भूमौ विकीर्ण इव पर्वतः ॥ (३५।२)

धूम्राक्षं निहतं दृष्ट्वा हतशेषा निशाचराः । (३६।१)

त्रस्ताः प्रविविशुर् लङ्कां वध्यमानाः प्लवंगमैः ॥ (३६।२)

स तु पवनसुतो निहत्य शत्रुं क्षतजवहाः सरितश्च संविकीर्य । (३७।१)

रिपुवधजनितश्रमो महात्मा मुदम् अगमत् कपिभिश्च पूज्यमानः ॥ (३७।२)