तस्यालयवरिष्ठस्य मध्ये विपुलम् आयतम् । (१।१)

ददर्श भवनश्रेष्ठं हनूमान्मारुतात्मजः ॥ (१।२)

अर्धयोजनविस्तीर्णम् आयतं योजनं हि तत् । (२।१)

भवनं राक्षसेन्द्रस्य बहुप्रासादसंकुलम् ॥ (२।२)

मार्गमाणस्तु वैदेहीं सीताम् आयतलोचनाम् । (३।१)

सर्वतः परिचक्राम हनूमान् अरिसूदनः ॥ (३।२)

चतुर्विषाणैर् द्विरदैस्त्रिविषाणैस्तथैव च । (४।१)

परिक्षिप्तम् असंबाधं रक्ष्यमाणम् उदायुधैः ॥ (४।२)

राक्षसीभिश्च पत्नीभी रावणस्य निवेशनम् । (५।१)

आहृताभिश्च विक्रम्य राजकन्याभिर् आवृतम् ॥ (५।२)

तन्नक्रमकराकीर्णं तिमिंगिलझषाकुलम् । (६।१)

वायुवेगसमाधूतं पन्नगैर् इव सागरम् ॥ (६।२)

या हि वैश्रवणे लक्ष्मीर् या चेन्द्रे हरिवाहने । (७।१)

सा रावणगृहे सर्वा नित्यम् एवानपायिनी ॥ (७।२)

या च राज्ञः कुबेरस्य यमस्य वरुणस्य च । (८।१)

तादृशी तद्विशिष्टा वा ऋद्धी रक्षोगृहेष्विह ॥ (८।२)

तस्य हर्म्यस्य मध्यस्थं वेश्म चान्यत् सुनिर्मितम् । (९।१)

बहुनिर्यूहसंकीर्णं ददर्श पवनात्मजः ॥ (९।२)

ब्रह्मणो ऽर्थे कृतं दिव्यं दिवि यद् विश्वकर्मणा । (१०।१)

विमानं पुष्पकं नाम सर्वरत्नविभूषितम् ॥ (१०।२)

परेण तपसा लेभे यत् कुबेरः पितामहात् । (११।१)

कुबेरम् ओजसा जित्वा लेभे तद् राक्षसेश्वरः ॥ (११।२)

ईहामृगसमायुक्तैः कार्तस्वरहिरण्मयैः । (१२।१)

सुकृतैर् आचितं स्तम्भैः प्रदीप्तम् इव च श्रिया ॥ (१२।२)

मेरुमन्दरसंकाशैर् उल्लिखद्भिर् इवाम्बरम् । (१३।१)

कूटागारैः शुभाकारैः सर्वतः समलंकृतम् ॥ (१३।२)

ज्वलनार्कप्रतीकाशं सुकृतं विश्वकर्मणा । (१४।१)

हेमसोपानसंयुक्तं चारुप्रवरवेदिकम् ॥ (१४।२)

जालवातायनैर् युक्तं काञ्चनैः स्फाटिकैर् अपि । (१५।१)

इन्द्रनीलमहानीलमणिप्रवरवेदिकम् । (१५।२)

विमानं पुष्पकं दिव्यम् आरुरोह महाकपिः ॥ (१५।३)

तत्रस्थः स तदा गन्धं पानभक्ष्यान्नसंभवम् । (१६।१)

दिव्यं संमूर्छितं जिघ्रन् रूपवन्तम् इवानिलम् ॥ (१६।२)

स गन्धस्तं महासत्त्वं बन्धुर् बन्धुम् इवोत्तमम् । (१७।१)

इत एहीत्युवाचेव तत्र यत्र स रावणः ॥ (१७।२)

ततस्तां प्रस्थितः शालां ददर्श महतीं शुभाम् । (१८।१)

रावणस्य मनःकान्तां कान्ताम् इव वरस्त्रियम् ॥ (१८।२)

मणिसोपानविकृतां हेमजालविराजिताम् । (१९।१)

स्फाटिकैर् आवृततलां दन्तान्तरितरूपिकाम् ॥ (१९।२)

मुक्ताभिश्च प्रवालैश्च रूप्यचामीकरैर् अपि । (२०।१)

विभूषितां मणिस्तम्भैः सुबहुस्तम्भभूषिताम् ॥ (२०।२)

समैर् ऋजुभिर् अत्युच्चैः समन्तात् सुविभूषितैः । (२१।१)

स्तम्भैः पक्षैर् इवात्युच्चैर् दिवं सम्प्रस्थिताम् इव ॥ (२१।२)

महत्या कुथयास्तीर्णां पृथिवीलक्षणाङ्कया । (२२।१)

पृथिवीम् इव विस्तीर्णां सराष्ट्रगृहमालिनीम् ॥ (२२।२)

नादितां मत्तविहगैर् दिव्यगन्धाधिवासिताम् । (२३।१)

परार्ध्यास्तरणोपेतां रक्षोऽधिपनिषेविताम् ॥ (२३।२)

धूम्राम् अगरुधूपेन विमलां हंसपाण्डुराम् । (२४।१)

चित्रां पुष्पोपहारेण कल्माषीम् इव सुप्रभाम् ॥ (२४।२)

मनःसंह्लादजननीं वर्णस्यापि प्रसादिनीम् । (२५।१)

तां शोकनाशिनीं दिव्यां श्रियः संजननीम् इव ॥ (२५।२)

इन्द्रियाणीन्द्रियार्थैस्तु पञ्च पञ्चभिर् उत्तमैः । (२६।१)

तर्पयामास मातेव तदा रावणपालिता ॥ (२६।२)

स्वर्गो ऽयं देवलोको ऽयम् इन्द्रस्येयं पुरी भवेत् । (२७।१)

सिद्धिर् वेयं परा हि स्याद् इत्यमन्यत मारुतिः ॥ (२७।२)

प्रध्यायत इवापश्यत् प्रदीपांस्तत्र काञ्चनान् । (२८।१)

धूर्तान् इव महाधूर्तैर् देवनेन पराजितान् ॥ (२८।२)

दीपानां च प्रकाशेन तेजसा रावणस्य च । (२९।१)

अर्चिर्भिर् भूषणानां च प्रदीप्तेत्यभ्यमन्यत ॥ (२९।२)

ततो ऽपश्यत् कुथासीनं नानावर्णाम्बरस्रजम् । (३०।१)

सहस्रं वरनारीणां नानावेषविभूषितम् ॥ (३०।२)

परिवृत्ते ऽर्धरात्रे तु पाननिद्रावशं गतम् । (३१।१)

क्रीडित्वोपरतं रात्रौ सुष्वाप बलवत् तदा ॥ (३१।२)

तत् प्रसुप्तं विरुरुचे निःशब्दान्तरभूषणम् । (३२।१)

निःशब्दहंसभ्रमरं यथा पद्मवनं महत् ॥ (३२।२)

तासां संवृतदन्तानि मीलिताक्षाणि मारुतिः । (३३।१)

अपश्यत् पद्मगन्धीनि वदनानि सुयोषिताम् ॥ (३३।२)

प्रबुद्धानीव पद्मानि तासां भूत्वा क्षपाक्षये । (३४।१)

पुनःसंवृतपत्राणि रात्राविव बभुस्तदा ॥ (३४।२)

इमानि मुखपद्मानि नियतं मत्तषट्पदाः । (३५।१)

अम्बुजानीव फुल्लानि प्रार्थयन्ति पुनः पुनः ॥ (३५।२)

इति वामन्यत श्रीमान् उपपत्त्या महाकपिः । (३६।१)

मेने हि गुणतस्तानि समानि सलिलोद्भवैः ॥ (३६।२)

सा तस्य शुशुभे शाला ताभिः स्त्रीभिर् विराजिता । (३७।१)

शारदीव प्रसन्ना द्यौस्ताराभिर् अभिशोभिता ॥ (३७।२)

स च ताभिः परिवृतः शुशुभे राक्षसाधिपः । (३८।१)

यथा ह्युडुपतिः श्रीमांस्ताराभिर् अभिसंवृतः ॥ (३८।२)

याश्च्यवन्ते ऽम्बरात् ताराः पुण्यशेषसमावृताः । (३९।१)

इमास्ताः संगताः कृत्स्ना इति मेने हरिस्तदा ॥ (३९।२)

ताराणाम् इव सुव्यक्तं महतीनां शुभार्चिषाम् । (४०।१)

प्रभावर्णप्रसादाश्च विरेजुस्तत्र योषिताम् ॥ (४०।२)

व्यावृत्तगुरुपीनस्रक्प्रकीर्णवरभूषणाः । (४१।१)

पानव्यायामकालेषु निद्रापहृतचेतसः ॥ (४१।२)

व्यावृत्ततिलकाः काश्चित् काश्चिद् उद्भ्रान्तनूपुराः । (४२।१)

पार्श्वे गलितहाराश्च काश्चित् परमयोषितः ॥ (४२।२)

मुक्ताहारवृताश्चान्याः काश्चित् प्रस्रस्तवाससः । (४३।१)

व्याविद्धरशनादामाः किशोर्य इव वाहिताः ॥ (४३।२)

सुकुण्डलधराश्चान्या विच्छिन्नमृदितस्रजः । (४४।१)

गजेन्द्रमृदिताः फुल्ला लता इव महावने ॥ (४४।२)

चन्द्रांशुकिरणाभाश्च हाराः कासांचिद् उत्कटाः । (४५।१)

हंसा इव बभुः सुप्ताः स्तनमध्येषु योषिताम् ॥ (४५।२)

अपरासां च वैदूर्याः कादम्बा इव पक्षिणः । (४६।१)

हेमसूत्राणि चान्यासां चक्रवाका इवाभवन् ॥ (४६।२)

हंसकारण्डवाकीर्णाश्चक्रवाकोपशोभिताः । (४७।१)

आपगा इव ता रेजुर् जघनैः पुलिनैर् इव ॥ (४७।२)

किङ्किणीजालसंकाशास्ता हेमविपुलाम्बुजाः । (४८।१)

भावग्राहा यशस्तीराः सुप्ता नद्य इवाबभुः ॥ (४८।२)

मृदुष्वङ्गेषु कासांचित् कुचाग्रेषु च संस्थिताः । (४९।१)

बभूवुर् भूषणानीव शुभा भूषणराजयः ॥ (४९।२)

अंशुकान्ताश्च कासांचिन् मुखमारुतकम्पिताः । (५०।१)

उपर्युपरि वक्त्राणां व्याधूयन्ते पुनः पुनः ॥ (५०।२)

ताः पताका इवोद्धूताः पत्नीनां रुचिरप्रभाः । (५१।१)

नानावर्णसुवर्णानां वक्त्रमूलेषु रेजिरे ॥ (५१।२)

ववल्गुश्चात्र कासांचित् कुण्डलानि शुभार्चिषाम् । (५२।१)

मुखमारुतसंसर्गान्मन्दं मन्दं सुयोषिताम् ॥ (५२।२)

शर्करासवगन्धः स प्रकृत्या सुरभिः सुखः । (५३।१)

तासां वदननिःश्वासः सिषेवे रावणं तदा ॥ (५३।२)

रावणाननशङ्काश्च काश्चिद् रावणयोषितः । (५४।१)

मुखानि स्म सपत्नीनाम् उपाजिघ्रन् पुनः पुनः ॥ (५४।२)

अत्यर्थं सक्तमनसो रावणे ता वरस्त्रियः । (५५।१)

अस्वतन्त्राः सपत्नीनां प्रियम् एवाचरंस्तदा ॥ (५५।२)

बाहून् उपनिधायान्याः पारिहार्यविभूषिताः । (५६।१)

अंशुकानि च रम्याणि प्रमदास्तत्र शिश्यिरे ॥ (५६।२)

अन्या वक्षसि चान्यस्यास्तस्याः काचित् पुनर् भुजम् । (५७।१)

अपरा त्वङ्कम् अन्यस्यास्तस्याश्चाप्यपरा भुजौ ॥ (५७।२)

ऊरुपार्श्वकटीपृष्ठम् अन्योन्यस्य समाश्रिताः । (५८।१)

परस्परनिविष्टाङ्ग्यो मदस्नेहवशानुगाः ॥ (५८।२)

अन्योन्यस्याङ्गसंस्पर्शात् प्रीयमाणाः सुमध्यमाः । (५९।१)

एकीकृतभुजाः सर्वाः सुषुपुस्तत्र योषितः ॥ (५९।२)

अन्योन्यभुजसूत्रेण स्त्रीमाला ग्रथिता हि सा । (६०।१)

मालेव ग्रथिता सूत्रे शुशुभे मत्तषट्पदा ॥ (६०।२)

लतानां माधवे मासि फुल्लानां वायुसेवनात् । (६१।१)

अन्योन्यमालाग्रथितं संसक्तकुसुमोच्चयम् ॥ (६१।२)

व्यतिवेष्टितसुस्कन्धम् अन्योन्यभ्रमराकुलम् । (६२।१)

आसीद् वनम् इवोद्धूतं स्त्रीवनं रावणस्य तत् ॥ (६२।२)

उचितेष्वपि सुव्यक्तं न तासां योषितां तदा । (६३।१)

विवेकः शक्य आधातुं भूषणाङ्गाम्बरस्रजाम् ॥ (६३।२)

रावणे सुखसंविष्टे ताः स्त्रियो विविधप्रभाः । (६४।१)

ज्वलन्तः काञ्चना दीपाः प्रेक्षन्तानिमिषा इव ॥ (६४।२)

राजर्षिपितृदैत्यानां गन्धर्वाणां च योषितः । (६५।१)

रक्षसां चाभवन् कन्यास्तस्य कामवशं गताः ॥ (६५।२)

न तत्र काचित् प्रमदा प्रसह्य वीर्योपपन्नेन गुणेन लब्धा । (६६।१)

न चान्यकामापि न चान्यपूर्वा विना वरार्हां जनकात्मजां तु ॥ (६६।२)

न चाकुलीना न च हीनरूपा नादक्षिणा नानुपचारयुक्ता । (६७।१)

भार्याभवत् तस्य न हीनसत्त्वा न चापि कान्तस्य न कामनीया ॥ (६७।२)

बभूव बुद्धिस्तु हरीश्वरस्य यदीदृशी राघवधर्मपत्नी । (६८।१)

इमा यथा राक्षसराजभार्याः सुजातम् अस्येति हि साधुबुद्धेः ॥ (६८।२)

पुनश्च सो ऽचिन्तयद् आर्तरूपो ध्रुवं विशिष्टा गुणतो हि सीता । (६९।१)

अथायम् अस्यां कृतवान्महात्मा लङ्केश्वरः कष्टम् अनार्यकर्म ॥ (६९।२)