स ननाद महानादं समुद्रम् अभिनादयन् । (१।१)

जनयन्न् इव निर्घातान् विधमन्न् इव पर्वतान् ॥ (१।२)

तम् अवध्यं मघवता यमेन वरुणेन च । (२।१)

प्रेक्ष्य भीमाक्षम् आयान्तं वानरा विप्रदुद्रुवुः ॥ (२।२)

तांस्तु विद्रवतो दृष्ट्वा वालिपुत्रो ऽङ्गदो ऽब्रवीत् । (३।१)

नलं नीलं गवाक्षं च कुमुदं च महाबलम् ॥ (३।२)

आत्मानम् अत्र विस्मृत्य वीर्याण्यभिजनानि च । (४।१)

क्व गच्छत भयत्रस्ताः प्राकृता हरयो यथा ॥ (४।२)

साधु सौम्या निवर्तध्वं किं प्राणान् परिरक्षथ । (५।१)

नालं युद्धाय वै रक्षो महतीयं विभीषिका ॥ (५।२)

महतीम् उत्थिताम् एनां राक्षसानां विभीषिकाम् । (६।१)

विक्रमाद् विधमिष्यामो निवर्तध्वं प्लवंगमाः ॥ (६।२)

कृच्छ्रेण तु समाश्वास्य संगम्य च ततस्ततः । (७।१)

वृक्षाद्रिहस्ता हरयः सम्प्रतस्थू रणाजिरम् ॥ (७।२)

ते निवृत्य तु संक्रुद्धाः कुम्भकर्णं वनौकसः । (८।१)

निजघ्नुः परमक्रुद्धाः समदा इव कुञ्जराः । (८।२)

प्रांशुभिर् गिरिशृङ्गैश्च शिलाभिश्च महाबलाः ॥ (८।३)

पादपैः पुष्पिताग्रैश्च हन्यमानो न कम्पते । (९।१)

तस्य गात्रेषु पतिता भिद्यन्ते शतशः शिलाः । (९।२)

पादपाः पुष्पिताग्राश्च भग्नाः पेतुर् महीतले ॥ (९।३)

सो ऽपि सैन्यानि संक्रुद्धो वानराणां महौजसाम् । (१०।१)

ममन्थ परमायत्तो वनान्यग्निर् इवोत्थितः ॥ (१०।२)

लोहितार्द्रास्तु बहवः शेरते वानरर्षभाः । (११।१)

निरस्ताः पतिता भूमौ ताम्रपुष्पा इव द्रुमाः ॥ (११।२)

लङ्घयन्तः प्रधावन्तो वानरा नावलोकयन् । (१२।१)

केचित् समुद्रे पतिताः केचिद् गगनम् आश्रिताः ॥ (१२।२)

वध्यमानास्तु ते वीरा राक्षसेन बलीयसा । (१३।१)

सागरं येन ते तीर्णाः पथा तेनैव दुद्रुवुः ॥ (१३।२)

ते स्थलानि तथा निम्नं विषण्णवदना भयात् । (१४।१)

ऋक्षा वृक्षान् समारूढाः केचित् पर्वतम् आश्रिताः ॥ (१४।२)

ममज्जुर् अर्णवे केचिद् गुहाः केचित् समाश्रिताः । (१५।१)

निषेदुः प्लवगाः केचित् केचिन् नैवावतस्थिरे ॥ (१५।२)

तान् समीक्ष्याङ्गदो भग्नान् वानरान् इदम् अब्रवीत् । (१६।१)

अवतिष्ठत युध्यामो निवर्तध्वं प्लवंगमाः ॥ (१६।२)

भग्नानां वो न पश्यामि परिगम्य महीम् इमाम् । (१७।१)

स्थानं सर्वे निवर्तध्वं किं प्राणान् परिरक्षथ ॥ (१७।२)

निरायुधानां द्रवताम् असंगगतिपौरुषाः । (१८।१)

दारा ह्यपहसिष्यन्ति स वै घातस्तु जीवताम् ॥ (१८।२)

कुलेषु जाताः सर्वे स्म विस्तीर्णेषु महत्सु च । (१९।१)

अनार्याः खलु यद् भीतास्त्यक्त्वा वीर्यं प्रधावत ॥ (१९।२)

विकत्थनानि वो यानि यदा वै जनसंसदि । (२०।१)

तानि वः क्व च यतानि सोदग्राणि महान्ति च ॥ (२०।२)

भीरुप्रवादाः श्रूयन्ते यस्तु जीवति धिक्कृतः । (२१।१)

मार्गः सत्पुरुषैर् जुष्टः सेव्यतां त्यज्यतां भयम् ॥ (२१।२)

शयामहे वा निहताः पृथिव्याम् अल्पजीविताः । (२२।१)

दुष्प्रापं ब्रह्मलोकं वा प्राप्नुमो युधि सूदिताः । (२२।२)

सम्प्राप्नुयामः कीर्तिं वा निहत्य शत्रुम् आहवे ॥ (२२।३)

न कुम्भकर्णः काकुत्स्थं दृष्ट्वा जीवन् गमिष्यति । (२३।१)

दीप्यमानम् इवासाद्य पतंगो ज्वलनं यथा ॥ (२३।२)

पलायनेन चोद्दिष्टाः प्राणान् रक्षामहे वयम् । (२४।१)

एकेन बहवो भग्ना यशो नाशं गमिष्यति ॥ (२४।२)

एवं ब्रुवाणं तं शूरम् अङ्गदं कनकाङ्गदम् । (२५।१)

द्रवमाणास्ततो वाक्यम् ऊचुः शूरविगर्हितम् ॥ (२५।२)

कृतं नः कदनं घोरं कुम्भकर्णेन रक्षसा । (२६।१)

न स्थानकालो गच्छामो दयितं जीवितं हि नः ॥ (२६।२)

एतावद् उक्त्वा वचनं सर्वे ते भेजिरे दिशः । (२७।१)

भीमं भीमाक्षम् आयान्तं दृष्ट्वा वानरयूथपाः ॥ (२७।२)

द्रवमाणास्तु ते वीरा अङ्गदेन वलीमुखाः । (२८।१)

सान्त्वैश्च बहुमानैश्च ततः सर्वे निवर्तिताः ॥ (२८।२)

ऋषभशरभमैन्दधूम्रनीलाः कुमुदसुषेणगवाक्षरम्भताराः । (२९।१)

द्विविदपनसवायुपुत्रमुख्यास् त्वरिततराभिमुखं रणं प्रयाताः ॥ (२९।२)