स च वाग्भिः प्रशस्ताभिर् गमिष्यन् पूजितस्तया । (१।१)

तस्माद् देशाद् अपक्रम्य चिन्तयामास वानरः ॥ (१।२)

अल्पशेषम् इदं कार्यं दृष्टेयम् असितेक्षणा । (२।१)

त्रीन् उपायान् अतिक्रम्य चतुर्थ इह दृश्यते ॥ (२।२)

न साम रक्षःसु गुणाय कल्पते न दानम् अर्थोपचितेषु वर्तते । (३।१)

न भेदसाध्या बलदर्पिता जनाः पराक्रमस्त्वेष ममेह रोचते ॥ (३।२)

न चास्य कार्यस्य पराक्रमाद् ऋते विनिश्चयः कश्चिद् इहोपपद्यते । (४।१)

हृतप्रवीरास्तु रणे हि राक्षसाः कथंचिद् ईयुर् यद् इहाद्य मार्दवम् ॥ (४।२)

कार्ये कर्मणि निर्दिष्टो यो बहून्यपि साधयेत् । (५।१)

पूर्वकार्यविरोधेन स कार्यं कर्तुम् अर्हति ॥ (५।२)

न ह्येकः साधको हेतुः स्वल्पस्यापीह कर्मणः । (६।१)

यो ह्यर्थं बहुधा वेद स समर्थो ऽर्थसाधने ॥ (६।२)

इहैव तावत् कृतनिश्चयो ह्यहं यदि व्रजेयं प्लवगेश्वरालयम् । (७।१)

परात्मसम्मर्दविशेषतत्त्ववित् ततः कृतं स्यान्मम भर्तृशासनम् ॥ (७।२)

कथं नु खल्वद्य भवेत् सुखागतं प्रसह्य युद्धं मम राक्षसैः । (८।१)

तथैव खल्वात्मबलं च सारवत् समानयेन्मां च रणे दशाननः ॥ (८।२)

इदम् अस्य नृशंसस्य नन्दनोपमम् उत्तमम् । (९।१)

वनं नेत्रमनःकान्तं नानाद्रुमलतायुतम् ॥ (९।२)

इदं विध्वंसयिष्यामि शुष्कं वनम् इवानलः । (१०।१)

अस्मिन् भग्ने ततः कोपं करिष्यति स रावणः ॥ (१०।२)

ततो महत् साश्वमहारथद्विपं बलं समानेष्यति राक्षसाधिपः । (११।१)

त्रिशूलकालायसपट्टिशायुधं ततो महद् युद्धम् इदं भविष्यति ॥ (११।२)

अहं तु तैः संयति चण्डविक्रमैः समेत्य रक्षोभिर् असंगविक्रमः । (१२।१)

निहत्य तद् रावणचोदितं बलं सुखं गमिष्यामि कपीश्वरालयम् ॥ (१२।२)

ततो मारुतवत् क्रुद्धो मारुतिर् भीमविक्रमः । (१३।१)

ऊरुवेगेन महता द्रुमान् क्षेप्तुम् अथारभत् ॥ (१३।२)

ततस्तद्धनुमान् वीरो बभञ्ज प्रमदावनम् । (१४।१)

मत्तद्विजसमाघुष्टं नानाद्रुमलतायुतम् ॥ (१४।२)

तद् वनं मथितैर् वृक्षैर् भिन्नैश्च सलिलाशयैः । (१५।१)

चूर्णितैः पर्वताग्रैश्च बभूवाप्रियदर्शनम् ॥ (१५।२)

लतागृहैश्चित्रगृहैश्च नाशितैर् महोरगैर् व्यालमृगैश्च निर्धुतैः । (१६।१)

शिलागृहैर् उन्मथितैस्तथा गृहैः प्रनष्टरूपं तद् अभून्महद् वनम् ॥ (१६।२)

स तस्य कृत्वार्थपतेर् महाकपिर् महद् व्यलीकं मनसो महात्मनः । (१७।१)

युयुत्सुर् एको बहुभिर् महाबलैः श्रिया ज्वलंस्तोरणम् आश्रितः कपिः ॥ (१७।२)