वसतस् तस्य तु सुखं राघवस्य महात्मनः । (१।१)

शरद्व्यपाये हेमन्त ऋतुर् इष्टः प्रवर्तते ॥ (१।२)

स कदाचित् प्रभातायां शर्वर्यां रघुनन्दनः । (२।१)

प्रययाव् अभिषेकार्थं रम्यां गोदावरीं नदीम् ॥ (२।२)

प्रह्वः कलशहस्तस् तं सीतया सह वीर्यवान् । (३।१)

पृष्ठतो ऽनुव्रजन् भ्राता सौमित्रिर् इदम् अब्रवीत् ॥ (३।२)

अयं स कालः सम्प्राप्तः प्रियो यस् ते प्रियंवद । (४।१)

अलंकृत इवाभाति येन संवत्सरः शुभः ॥ (४।२)

नीहारपरुषो लोकः पृथिवी सस्यमालिनी । (५।१)

जलान्य् अनुपभोग्यानि सुभगो हव्यवाहनः ॥ (५।२)

नवाग्रयणपूजाभिर् अभ्यर्च्य पितृदेवताः । (६।१)

कृताग्रयणकाः काले सन्तो विगतकल्मषाः ॥ (६।२)

प्राज्यकामा जनपदाः सम्पन्नतरगोरसाः । (७।१)

विचरन्ति महीपाला यात्रार्थं विजिगीषवः ॥ (७।२)

सेवमाने दृढं सूर्ये दिशम् अन्तकसेविताम् । (८।१)

विहीनतिलकेव स्त्री नोत्तरा दिक् प्रकाशते ॥ (८।२)

प्रकृत्या हिमकोशाढ्यो दूरसूर्यश् च साम्प्रतम् । (९।१)

यथार्थनामा सुव्यक्तं हिमवान् हिमवान् गिरिः ॥ (९।२)

अत्यन्तसुखसंचारा मध्याह्ने स्पर्शतः सुखाः । (१०।१)

दिवसाः सुभगादित्याश् छायासलिलदुर्भगाः ॥ (१०।२)

मृदुसूर्याः सनीहाराः पटुशीताः समारुताः । (११।१)

शून्यारण्या हिमध्वस्ता दिवसा भान्ति साम्प्रतम् ॥ (११।२)

निवृत्ताकाशशयनाः पुष्यनीता हिमारुणाः । (१२।१)

शीता वृद्धतरायामास् त्रियामा यान्ति साम्प्रतम् ॥ (१२।२)

रविसंक्रान्तसौभाग्यस् तुषारारुणमण्डलः । (१३।१)

निःश्वासान्ध इवादर्शश् चन्द्रमा न प्रकाशते ॥ (१३।२)

ज्योत्स्ना तुषारमलिना पौर्णमास्यां न राजते । (१४।१)

सीतेव चातपश्यामा लक्ष्यते न तु शोभते ॥ (१४।२)

प्रकृत्या शीतलस्पर्शो हिमविद्धश् च साम्प्रतम् । (१५।१)

प्रवाति पश्चिमो वायुः काले द्विगुणशीतलः ॥ (१५।२)

बाष्पच्छन्नान्यरण्यानि यवगोधूमवन्ति च । (१६।१)

शोभन्ते ऽभ्युदिते सूर्ये नदद्भिः क्रौञ्चसारसैः ॥ (१६।२)

खर्जूरपुष्पाकृतिभिः शिरोभिः पूर्णतण्डुलैः । (१७।१)

शोभन्ते किंचिदालम्बाः शालयः कनकप्रभाः ॥ (१७।२)

मयूखैर् उपसर्पद्भिर् हिमनीहारसंवृतैः । (१८।१)

दूरम् अभ्युदितः सूर्यः शशाङ्क इव लक्ष्यते ॥ (१८।२)

अग्राह्यवीर्यः पूर्वाह्णे मध्याह्ने स्पर्शतः सुखः । (१९।१)

संरक्तः किंचिद् आपाण्डुर् आतपः शोभते क्षितौ ॥ (१९।२)

अवश्यायनिपातेन किंचित् प्रक्लिन्नशाद्वला । (२०।१)

वनानां शोभते भूमिर् निविष्टतरुणातपा ॥ (२०।२)

अवश्यायतमोनद्धा नीहारतमसावृताः । (२१।१)

प्रसुप्ता इव लक्ष्यन्ते विपुष्पा वनराजयः ॥ (२१।२)

बाष्पसंछन्नसलिला रुतविज्ञेयसारसाः । (२२।१)

हिमार्द्रवालुकैस् तीरैः सरितो भान्ति साम्प्रतम् ॥ (२२।२)

तुषारपतनाच् चैव मृदुत्वाद् भास्करस्य च । (२३।१)

शैत्याद् अगाग्रस्थम् अपि प्रायेण रसवज् जलम् ॥ (२३।२)

जराजर्जरितैः पर्णैः शीर्णकेसरकर्णिकैः । (२४।१)

नालशेषा हिमध्वस्ता न भान्ति कमलाकराः ॥ (२४।२)

अस्मिंस् तु पुरुषव्याघ्र काले दुःखसमन्वितः । (२५।१)

तपश् चरति धर्मात्मा त्वद्भक्त्या भरतः पुरे ॥ (२५।२)

त्यक्त्वा राज्यं च मानं च भोगांश् च विविधान् बहून् । (२६।१)

तपस्वी नियताहारः शेते शीते महीतले ॥ (२६।२)

सो ऽपि वेलाम् इमां नूनम् अभिषेकार्थम् उद्यतः । (२७।१)

वृतः प्रकृतिभिर् नित्यं प्रयाति सरयूं नदीम् ॥ (२७।२)

अत्यन्तसुखसंवृद्धः सुकुमारो हिमार्दितः । (२८।१)

कथं त्व् अपररात्रेषु सरयूम् अवगाहते ॥ (२८।२)

पद्मपत्त्रेक्षणः श्यामः श्रीमान् निरुदरो महान् । (२९।१)

धर्मज्ञः सत्यवादी च ह्रीनिषेधो जितेन्द्रियः ॥ (२९।२)

प्रियाभिभाषी मधुरो दीर्घबाहुर् अरिंदमः । (३०।१)

संत्यज्य विविधान् भोगान् आर्यं सर्वात्मनाश्रितः ॥ (३०।२)

जितः स्वर्गस् तव भ्रात्रा भरतेन महात्मना । (३१।१)

वनस्थम् अपि तापस्ये यस् त्वाम् अनुविधीयते ॥ (३१।२)

न पित्र्यम् अनुवर्तन्ते मातृकं द्विपदा इति । (३२।१)

ख्यातो लोकप्रवादो ऽयं भरतेनान्यथाकृतः ॥ (३२।२)

भर्ता दशरथो यस्याः साधुश् च भरतः सुतः । (३३।१)

कथं नु साम्बा कैकेयी तादृशी क्रूरदर्शिनी ॥ (३३।२)

इत्य् एवं लक्ष्मणे वाक्यं स्नेहाद् ब्रुवति धार्मिके । (३४।१)

परिवादं जनन्यास् तम् असहन् राघवो ऽब्रवीत् ॥ (३४।२)

न ते ऽम्बा मध्यमा तात गर्हितव्या कथंचन । (३५।१)

ताम् एवेक्ष्वाकुनाथस्य भरतस्य कथां कुरु ॥ (३५।२)

निश्चितापि हि मे बुद्धिर् वनवासे दृढव्रता । (३६।१)

भरतस्नेहसंतप्ता बालिशी क्रियते पुनः ॥ (३६।२)

इत्य् एवं विलपंस् तत्र प्राप्य गोदावरीं नदीम् । (३७।१)

चक्रे ऽभिषेकं काकुत्स्थः सानुजः सह सीतया ॥ (३७।२)

तर्पयित्वाथ सलिलैस् ते पितॄन् दैवतानि च । (३८।१)

स्तुवन्ति स्मोदितं सूर्यं देवताश् च समाहिताः ॥ (३८।२)

कृताभिषेकः स रराज रामः सीताद्वितीयः सह लक्ष्मणेन । (३९।१)

कृताभिषेकस् त्व् अगराजपुत्र्या रुद्रः सनन्दी भगवान् इवेशः ॥ (३९।२)