देवदेवे गते तस्मिन् सो ऽङ्गुष्ठाग्रनिपीडिताम् । (१।१)

कृत्वा वसुमतीं राम संवत्सरम् उपासत ॥ (१।२)

अथ संवत्सरे पूर्णे सर्वलोकनमस्कृतः । (२।१)

उमापतिः पशुपती राजानम् इदम् अब्रवीत् ॥ (२।२)

प्रीतस् ते ऽहं नरश्रेष्ठ करिष्यामि तव प्रियम् । (३।१)

शिरसा धारयिष्यामि शैलराजसुताम् अहम् ॥ (३।२)

ततो हैमवती ज्येष्ठा सर्वलोकनमस्कृता । (४।१)

तदा सातिमहद् रूपं कृत्वा वेगं च दुःसहम् । (४।२)

आकाशाद् अपतद् राम शिवे शिवशिरस्य् उत ॥ (४।३)

नैव सा निर्गमं लेभे जटामण्डलमोहिता । (५।१)

तत्रैवाबभ्रमद् देवी संवत्सरगणान् बहून् ॥ (५।२)

अनेन तोषितश् चासीद् अत्यर्थं रघुनन्दन । (६।१)

विससर्ज ततो गङ्गां हरो बिन्दुसरः प्रति ॥ (६।२)

गगनाच् छंकरशिरस् ततो धरणिम् आगता । (७।१)

व्यसर्पत जलं तत्र तीव्रशब्दपुरस्कृतम् ॥ (७।२)

ततो देवर्षिगन्धर्वा यक्षाः सिद्धगणास् तथा । (८।१)

व्यलोकयन्त ते तत्र गगनाद् गां गतां तदा ॥ (८।२)

विमानैर् नगराकारैर् हयैर् गजवरैस् तथा । (९।१)

पारिप्लवगताश् चापि देवतास् तत्र विष्ठिताः ॥ (९।२)

तद् अद्भुततमं लोके गङ्गापतनम् उत्तमम् । (१०।१)

दिदृक्षवो देवगणाः समेयुर् अमितौजसः ॥ (१०।२)

संपतद्भिः सुरगणैस् तेषां चाभरणौजसा । (११।१)

शतादित्यम् इवाभाति गगनं गततोयदम् ॥ (११।२)

शिंशुमारोरगगणैर् मीनैर् अपि च चञ्चलैः । (१२।१)

विद्युद्भिर् इव विक्षिप्तैर् आकाशम् अभवत् तदा ॥ (१२।२)

पाण्डुरैः सलिलोत्पीडैः कीर्यमाणैः सहस्रधा । (१३।१)

शारदाभ्रैर् इवाकीर्णं गगनं हंससम्प्लवैः ॥ (१३।२)

क्वचिद् द्रुततरं याति कुटिलं क्वचिद् आयतम् । (१४।१)

विनतं क्वचिद् उद्धूतं क्वचिद् याति शनैः शनैः ॥ (१४।२)

सलिलेनैव सलिलं क्वचिद् अभ्याहतं पुनः । (१५।१)

मुहुर् ऊर्ध्वपथं गत्वा पपात वसुधां पुनः ॥ (१५।२)

तच् छंकरशिरोभ्रष्टं भ्रष्टं भूमितले पुनः । (१६।१)

व्यरोचत तदा तोयं निर्मलं गतकल्मषम् ॥ (१६।२)

तत्रर्षिगणगन्धर्वा वसुधातलवासिनः । (१७।१)

भवाङ्गपतितं तोयं पवित्रम् इति पस्पृशुः ॥ (१७।२)

शापात् प्रपतिता ये च गगनाद् वसुधातलम् । (१८।१)

कृत्वा तत्राभिषेकं ते बभूवुर् गतकल्मषाः ॥ (१८।२)

धूतपापाः पुनस् तेन तोयेनाथ सुभास्वता । (१९।१)

पुनर् आकाशम् आविश्य स्वांल् लोकान् प्रतिपेदिरे ॥ (१९।२)

मुमुदे मुदितो लोकस् तेन तोयेन भास्वता । (२०।१)

कृताभिषेको गङ्गायां बभूव विगतक्लमः ॥ (२०।२)

भगीरथो ऽपि राजर्षिर् दिव्यं स्यन्दनम् आस्थितः । (२१।१)

प्रायाद् अग्रे महातेजास् तं गङ्गा पृष्ठतो ऽन्वगात् ॥ (२१।२)

देवाः सर्षिगणाः सर्वे दैत्यदानवराक्षसाः । (२२।१)

गन्धर्वयक्षप्रवराः सकिंनरमहोरगाः ॥ (२२।२)

सर्वाश् चाप्सरसो राम भगीरथरथानुगाः । (२३।१)

गङ्गाम् अन्वगमन् प्रीताः सर्वे जलचराश् च ये ॥ (२३।२)

यतो भगीरथो राजा ततो गङ्गा यशस्विनी । (२४।१)

जगाम सरितां श्रेष्ठा सर्वपापविनाशिनी ॥ (२४।२)