यस्मिंस् तु दिवसे राजा चक्रे गोदानम् उत्तमम् । (१।१)

तस्मिंस् तु दिवसे शूरो युधाजित् समुपेयिवान् ॥ (१।२)

पुत्रः केकयराजस्य साक्षाद् भरतमातुलः । (२।१)

दृष्ट्वा पृष्ट्वा च कुशलं राजानम् इदम् अब्रवीत् ॥ (२।२)

केकयाधिपती राजा स्नेहात् कुशलम् अब्रवीत् । (३।१)

येषां कुशलकामो ऽसि तेषां सम्प्रत्य् अनामयम् ॥ (३।२)

स्वस्रीयं मम राजेन्द्र द्रष्टुकामो महीपते । (४।१)

तदर्थम् उपयातो ऽहम् अयोध्यां रघुनन्दन ॥ (४।२)

श्रुत्वा त्व् अहम् अयोध्यायां विवाहार्थं तवात्मजान् । (५।१)

मिथिलाम् उपयातास् तु त्वया सह महीपते ॥ (५।२)

त्वरयाभ्युपयातो ऽहं द्रष्टुकामः स्वसुः सुतम् । (६।१)

अथ राजा दशरथः प्रियातिथिम् उपस्थितम् ॥ (६।२)

दृष्ट्वा परमसत्कारैः पूजार्हं समपूजयत् । (७।१)

ततस् ताम् उषितो रात्रिं सह पुत्रैर् महात्मभिः ॥ (७।२)

ऋषींस् तदा पुरस्कृत्य यज्ञवाटम् उपागमत् । (८।१)

युक्ते मुहूर्ते विजये सर्वाभरणभूषितैः । (८।२)

भ्रातृभिः सहितो रामः कृतकौतुकमङ्गलः ॥ (८।३)

वसिष्ठं पुरतः कृत्वा महर्षीन् अपरान् अपि ॥ (९।१)

राजा दशरथो राजन् कृतकौतुकमङ्गलैः । (१०।१)

पुत्रैर् नरवरश्रेष्ठ दातारम् अभिकाङ्क्षते ॥ (१०।२)

दातृप्रतिग्रहीतृभ्यां सर्वार्थाः प्रभवन्ति हि । (११।१)

स्वधर्मं प्रतिपद्यस्व कृत्वा वैवाह्यम् उत्तमम् ॥ (११।२)

इत्य् उक्तः परमोदारो वसिष्ठेन महात्मना । (१२।१)

प्रत्युवाच महातेजा वाक्यं परमधर्मवित् ॥ (१२।२)

कः स्थितः प्रतिहारो मे कस्याज्ञा सम्प्रतीक्ष्यते । (१३।१)

स्वगृहे को विचारो ऽस्ति यथा राज्यम् इदं तव ॥ (१३।२)

कृतकौतुकसर्वस्वा वेदिमूलम् उपागताः । (१४।१)

मम कन्या मुनिश्रेष्ठ दीप्ता वह्नेर् इवार्चिषः ॥ (१४।२)

सज्जो ऽहं त्वत्प्रतीक्षो ऽस्मि वेद्याम् अस्यां प्रतिष्ठितः । (१५।१)

अविघ्नं कुरुतां राजा किमर्थं हि विलम्ब्यते ॥ (१५।२)

तद्वाक्यं जनकेनोक्तं श्रुत्वा दशरथस् तदा । (१६।१)

प्रवेशयामास सुतान् सर्वान् ऋषिगणान् अपि ॥ (१६।२)

अब्रवीज् जनको राजा कौसल्यानन्दवर्धनम् । (१७।१)

इयं सीता मम सुता सहधर्मचरी तव । (१७।२)

प्रतीच्छ चैनां भद्रं ते पाणिं गृह्णीष्व पाणिना ॥ (१७।३)

लक्ष्मणागच्छ भद्रं ते ऊर्मिलाम् उद्यतां मया । (१८।१)

प्रतीच्छ पाणिं गृह्णीष्व मा भूत् कालस्य पर्ययः ॥ (१८।२)

तम् एवम् उक्त्वा जनको भरतं चाभ्यभाषत । (१९।१)

गृहाण पाणिं माण्डव्याः पाणिना रघुनन्दन ॥ (१९।२)

शत्रुघ्नं चापि धर्मात्मा अब्रवीज् जनकेश्वरः । (२०।१)

श्रुतकीर्त्या महाबाहो पाणिं गृह्णीष्व पाणिना ॥ (२०।२)

सर्वे भवन्तः सौम्याश् च सर्वे सुचरितव्रताः । (२१।१)

पत्नीभिः सन्तु काकुत्स्था मा भूत् कालस्य पर्ययः ॥ (२१।२)

जनकस्य वचः श्रुत्वा पाणीन् पाणिभिर् अस्पृशन् । (२२।१)

चत्वारस् ते चतसृणां वसिष्ठस्य मते स्थिताः ॥ (२२।२)

अग्निं प्रदक्षिणं कृत्वा वेदिं राजानम् एव च । (२३।१)

ऋषींश् चैव महात्मानः सहभार्या रघूत्तमाः । (२३।२)

यथोक्तेन तथा चक्रुर् विवाहं विधिपूर्वकम् ॥ (२३।३)

पुष्पवृष्टिर् महत्य् आसीद् अन्तरिक्षात् सुभास्वरा । (२४।१)

दिव्यदुन्दुभिनिर्घोषैर् गीतवादित्रनिस्वनैः ॥ (२४।२)

ननृतुश् चाप्सरःसंघा गन्धर्वाश् च जगुः कलम् । (२५।१)

विवाहे रघुमुख्यानां तद् अद्भुतम् इवाभवत् ॥ (२५।२)

ईदृशे वर्तमाने तु तूर्योद्घुष्टनिनादिते । (२६।१)

त्रिर् अग्निं ते परिक्रम्य ऊहुर् भार्या महौजसः ॥ (२६।२)

अथोपकार्यां जग्मुस् ते सदारा रघुनन्दनाः । (२७।१)

राजाप्य् अनुययौ पश्यन् सर्षिसंघः सबान्धवः ॥ (२७।२)