तत् सर्वम् अखिलेनाशु प्रस्थाप्य भरताग्रजः । (१।१)

हयं लक्ष्मणसम्पन्नं कृष्णसारं मुमोच ह ॥ (१।२)

ऋत्विग्भिर् लक्ष्मणं सार्धम् अश्वे च विनियुज्य सः । (२।१)

ततो ऽभ्यगच्छत् काकुत्स्थः सह सैन्येन नैमिषम् ॥ (२।२)

यज्ञवाटं महाबाहुर् दृष्ट्वा परमम् अद्भुतम् । (३।१)

प्रहर्षम् अतुलं लेभे श्रीमान् इति च सो ऽब्रवीत् ॥ (३।२)

नैमिषे वसतस्तस्य सर्व एव नराधिपाः । (४।१)

आजग्मुः सर्वराष्ट्रेभ्यस्तान् रामः प्रत्यपूजयत् ॥ (४।२)

उपकार्यान्महार्हांश्च पार्थिवानां महात्मनाम् । (५।१)

सानुगानां नरश्रेष्ठो व्यादिदेश महाद्युतिः ॥ (५।२)

अन्नपानानि वस्त्राणि सानुगानां महात्मनाम् । (६।१)

भरतः संददावाशु शत्रुघ्नसहितस्तदा ॥ (६।२)

वानराश्च महात्मानः सुग्रीवसहितास्तदा । (७।१)

विप्राणां प्रणताः सर्वे चक्रिरे परिवेषणम् ॥ (७।२)

विभीषणश्च रक्षोभिः स्रग्विभिर् बहुभिर् वृतः । (८।१)

ऋषीणाम् उग्रतपसां किंकरः पर्युपस्थितः ॥ (८।२)

एवं सुविहितो यज्ञो हयमेधो ऽभ्यवर्तत । (९।१)

लक्ष्मणेनाभिगुप्ता च हयचर्या प्रवर्तिता ॥ (९।२)

नान्यः शब्दो ऽभवत् तत्र हयमेधे महात्मनः । (१०।१)

छन्दतो देहि विश्रब्धो यावत् तुष्यन्ति याचकाः । (१०।२)

तावद् वानररक्षोभिर् दत्तम् एवाभ्यदृश्यत ॥ (१०।३)

न कश्चिन्मलिनस्तत्र दीनो वाप्यथ वा कृशः । (११।१)

तस्मिन् यज्ञवरे राज्ञो हृष्टपुष्टजनावृते ॥ (११।२)

ये च तत्र महात्मानो मुनयश्चिरजीविनः । (१२।१)

नास्मरंस्तादृशं यज्ञं दानौघसमलंकृतम् ॥ (१२।२)

रजतानां सुवर्णानां रत्नानाम् अथ वाससाम् । (१३।१)

अनिशं दीयमानानां नान्तः समुपदृश्यते ॥ (१३।२)

न शक्रस्य न सोमस्य यमस्य वरुणस्य वा । (१४।१)

ईदृशो दृष्टपूर्वो न एवम् ऊचुस्तपोधनाः ॥ (१४।२)

सर्वत्र वानरास्तस्थुः सर्वत्रैव च राक्षसाः । (१५।१)

वासो धनानि कामिभ्यः पूर्णहस्ता ददुर् भृशम् ॥ (१५।२)

ईदृशो राजसिंहस्य यज्ञः सर्वगुणान्वितः । (१६।१)

संवत्सरम् अथो साग्रं वर्तते न च हीयते ॥ (१६।२)