श्रुत्वा सेनापतिं प्राप्तं भरतं केकयाधिपः । (१।१)

युधाजिद् गार्ग्यसहितं परां प्रीतिम् उपागमत् ॥ (१।२)

स निर्ययौ जनौघेन महता केकयाधिपः । (२।१)

त्वरमाणो ऽभिचक्राम गन्धर्वान् देवरूपिणः ॥ (२।२)

भरतश्च युधाजिच्च समेतौ लघुविक्रमौ । (३।१)

गन्धर्वनगरं प्राप्तौ सबलौ सपदानुगौ ॥ (३।२)

श्रुत्वा तु भरतं प्राप्तं गन्धर्वास्ते समागताः । (४।१)

योद्धुकामा महावीर्या विनदन्तः समन्ततः ॥ (४।२)

ततः समभवद् युद्धं तुमुलं लोमहर्षणम् । (५।१)

सप्तरात्रं महाभीमं न चान्यतरयोर् जयः ॥ (५।२)

ततो रामानुजः क्रुद्धः कालस्यास्त्रं सुदारुणम् । (६।१)

संवर्तं नाम भरतो गन्धर्वेष्वभ्ययोजयत् ॥ (६।२)

ते बद्धाः कालपाशेन संवर्तेन विदारिताः । (७।१)

क्षणेनाभिहतास्तिस्रस्तत्र कोट्यो महात्मना ॥ (७।२)

तं घातं घोरसंकाशं न स्मरन्ति दिवौकसः । (८।१)

निमेषान्तरमात्रेण तादृशानां महात्मनाम् ॥ (८।२)

हतेषु तेषु वीरेषु भरतः कैकयीसुतः । (९।१)

निवेशयामास तदा समृद्धे द्वे पुरोत्तमे । (९।२)

तक्षं तक्षशिलायां तु पुष्करं पुष्करावतौ ॥ (९।३)

गन्धर्वदेशो रुचिरो गान्धारविषयश्च सः । (१०।१)

वर्षैः पञ्चभिर् आकीर्णो विषयैर् नागरैस्तथा ॥ (१०।२)

धनरत्नौघसम्पूर्णे काननैर् उपशोभिते । (११।१)

अन्योन्यसंघर्षकृते स्पर्धया गुणविस्तरे ॥ (११।२)

उभे सुरुचिरप्रख्ये व्यवहारैर् अकल्मषैः । (१२।१)

उद्यानयानौघवृते सुविभक्तान्तरापणे ॥ (१२।२)

उभे पुरवरे रम्ये विस्तरैर् उपशोभिते । (१३।१)

गृहमुख्यैः सुरुचिरैर् विमानैः समवर्णिभिः ॥ (१३।२)

शोभिते शोभनीयैश्च देवायतनविस्तरैः । (१४।१)

निवेश्य पञ्चभिर् वर्षैर् भरतो राघवानुजः । (१४।२)

पुनर् आयान्महाबाहुर् अयोध्यां कैकयीसुतः ॥ (१४।३)

सो ऽभिवाद्य महात्मानं साक्षाद् धर्मम् इवापरम् । (१५।१)

राघवं भरतः श्रीमान् ब्रह्माणम् इव वासवः ॥ (१५।२)

शशंस च यथावृत्तं गन्धर्ववधम् उत्तमम् । (१६।१)

निवेशनं च देशस्य श्रुत्वा प्रीतो ऽस्य राघवः ॥ (१६।२)