ततः स कर्मणा तस्य विस्मितो भीमविक्रमः । (१।१)

हनुमान् रोषताम्राक्षो रक्षोऽधिपम् अवैक्षत ॥ (१।२)

भ्राजमानं महार्हेण काञ्चनेन विराजता । (२।१)

मुक्ताजालावृतेनाथ मुकुटेन महाद्युतिम् ॥ (२।२)

वज्रसंयोगसंयुक्तैर् महार्हमणिविग्रहैः । (३।१)

हैमैर् आभरणैश्चित्रैर् मनसेव प्रकल्पितैः ॥ (३।२)

महार्हक्षौमसंवीतं रक्तचन्दनरूषितम् । (४।१)

स्वनुलिप्तं विचित्राभिर् विविधाभिश्च भक्तिभिः ॥ (४।२)

विपुलैर् दर्शनीयैश्च रक्ताक्षैर् भीमदर्शनैः । (५।१)

दीप्ततीक्ष्णमहादंष्ट्रैः प्रलम्बदशनच्छदैः ॥ (५।२)

शिरोभिर् दशभिर् वीरं भ्राजमानं महौजसम् । (६।१)

नानाव्यालसमाकीर्णैः शिखरैर् इव मन्दरम् ॥ (६।२)

नीलाञ्जनचयप्रख्यं हारेणोरसि राजता । (७।१)

पूर्णचन्द्राभवक्त्रेण सबलाकम् इवाम्बुदम् ॥ (७।२)

बाहुभिर् बद्धकेयूरैश्चन्दनोत्तमरूषितैः । (८।१)

भ्राजमानाङ्गदैः पीनैः पञ्चशीर्षैर् इवोरगैः ॥ (८।२)

महति स्फाटिके चित्रे रत्नसंयोगसंस्कृते । (९।१)

उत्तमास्तरणास्तीर्णे उपविष्टं वरासने ॥ (९।२)

अलंकृताभिर् अत्यर्थं प्रमदाभिः समन्ततः । (१०।१)

वालव्यजनहस्ताभिर् आरात् समुपसेवितम् ॥ (१०।२)

दुर्धरेण प्रहस्तेन महापार्श्वेन रक्षसा । (११।१)

मन्त्रिभिर् मन्त्रतत्त्वज्ञैर् निकुम्भेन च मन्त्रिणा ॥ (११।२)

उपोपविष्टं रक्षोभिश्चतुर्भिर् बलदर्पितैः । (१२।१)

कृत्स्नैः परिवृतं लोकं चतुर्भिर् इव सागरैः ॥ (१२।२)

मन्त्रिभिर् मन्त्रतत्त्वज्ञैर् अन्यैश्च शुभबुद्धिभिः । (१३।१)

अन्वास्यमानं सचिवैः सुरैर् इव सुरेश्वरम् ॥ (१३।२)

अपश्यद् राक्षसपतिं हनूमान् अतितेजसम् । (१४।१)

विष्ठितं मेरुशिखरे सतोयम् इव तोयदम् ॥ (१४।२)

स तैः सम्पीड्यमानो ऽपि रक्षोभिर् भीमविक्रमैः । (१५।१)

विस्मयं परमं गत्वा रक्षोऽधिपम् अवैक्षत ॥ (१५।२)

भ्राजमानं ततो दृष्ट्वा हनुमान् राक्षसेश्वरम् । (१६।१)

मनसा चिन्तयामास तेजसा तस्य मोहितः ॥ (१६।२)

अहो रूपम् अहो धैर्यम् अहो सत्त्वम् अहो द्युतिः । (१७।१)

अहो राक्षसराजस्य सर्वलक्षणयुक्तता ॥ (१७।२)

यद्यधर्मो न बलवान् स्याद् अयं राक्षसेश्वरः । (१८।१)

स्याद् अयं सुरलोकस्य सशक्रस्यापि रक्षिता ॥ (१८।२)

तेन बिभ्यति खल्वस्माल् लोकाः सामरदानवाः । (१९।१)

अयं ह्युत्सहते क्रुद्धः कर्तुम् एकार्णवं जगत् ॥ (१९।२)

इति चिन्तां बहुविधाम् अकरोन्मतिमान् कपिः । (२०।१)

दृष्ट्वा राक्षसराजस्य प्रभावम् अमितौजसः ॥ (२०।२)