श्रुत्वा वस् तु समग्रं तद् धर्मात्मा धर्मसंहितम् । (१।१)

व्यक्तम् अन्वेषते भूयो यद् वृत्तं तस्य धीमतः ॥ (१।२)

उपस्पृश्योदकं संयन् मुनिः स्थित्वा कृताञ्जलिः । (२।१)

प्राचीनाग्रेषु दर्भेषु धर्मेणान्वेषते गतिम् ॥ (२।२)

जन्म रामस्य सुमहद् वीर्यं सर्वानुकूलताम् । (३।१)

लोकस्य प्रियतां क्षान्तिं सौम्यतां सत्यशीलताम् ॥ (३।२)

नानाचित्राः कथाश् चान्या विश्वामित्रसहायने । (४।१)

जानक्याश् च विवाहं च धनुषश् च विभेदनम् ॥ (४।२)

रामरामविवादं च गुणान् दाशरथेस् तथा । (५।१)

तथाभिषेकं रामस्य कैकेय्या दुष्टभावताम् ॥ (५।२)

व्याघातं चाभिषेकस्य रामस्य च विवासनम् । (६।१)

राज्ञः शोकं विलापं च परलोकस्य चाश्रयम् ॥ (६।२)

प्रकृतीनां विषादं च प्रकृतीनां विसर्जनम् । (७।१)

निषादाधिपसंवादं सूतोपावर्तनं तथा ॥ (७।२)

गङ्गायाश् चाभिसंतारं भरद्वाजस्य दर्शनम् । (८।१)

भरद्वाजाभ्यनुज्ञानाच् चित्रकूटस्य दर्शनम् ॥ (८।२)

वास्तुकर्मनिवेशं च भरतागमनं तथा । (९।१)

प्रसादनं च रामस्य पितुश् च सलिलक्रियाम् ॥ (९।२)

पादुकाग्र्याभिषेकं च नन्दिग्रामनिवासनम् । (१०।१)

दण्डकारण्यगमनं सुतीक्ष्णेन समागमम् ॥ (१०।२)

अनसूयासमस्यां च अङ्गरागस्य चार्पणम् । (११।१)

शूर्पणख्याश् च संवादं विरूपकरणं तथा ॥ (११।२)

वधं खरत्रिशिरसोर् उत्थानं रावणस्य च । (१२।१)

मारीचस्य वधं चैव वैदेह्या हरणं तथा ॥ (१२।२)

राघवस्य विलापं च गृध्रराजनिबर्हणम् । (१३।१)

कबन्धदर्शनं चैव पम्पायाश् चापि दर्शनम् ॥ (१३।२)

शबर्या दर्शनं चैव हनूमद्दर्शनं तथा । (१४।१)

विलापं चैव पम्पायां राघवस्य महात्मनः ॥ (१४।२)

ऋष्यमूकस्य गमनं सुग्रीवेण समागमम् । (१५।१)

प्रत्ययोत्पादनं सख्यं वालिसुग्रीवविग्रहम् ॥ (१५।२)

वालिप्रमथनं चैव सुग्रीवप्रतिपादनम् । (१६।१)

ताराविलापसमयं वर्षरात्रिनिवासनम् ॥ (१६।२)

कोपं राघवसिंहस्य बलानाम् उपसंग्रहम् । (१७।१)

दिशः प्रस्थापनं चैव पृथिव्याश् च निवेदनम् ॥ (१७।२)

अङ्गुलीयकदानं च ऋक्षस्य बिलदर्शनम् । (१८।१)

प्रायोपवेशनं चैव सम्पातेश् चापि दर्शनम् ॥ (१८।२)

पर्वतारोहणं चैव सागरस्य च लङ्घनम् । (१९।१)

रात्रौ लङ्काप्रवेशं च एकस्यापि विचिन्तनम् ॥ (१९।२)

आपानभूमिगमनम् अवरोधस्य दर्शनम् । (२०।१)

अशोकवनिकायानं सीतायाश् चापि दर्शनम् ॥ (२०।२)

अभिज्ञानप्रदानं च सीतायाश् चापि भाषणम् । (२१।१)

राक्षसीतर्जनं चैव त्रिजटास्वप्नदर्शनम् ॥ (२१।२)

मणिप्रदानं सीताया वृक्षभङ्गं तथैव च । (२२।१)

राक्षसीविद्रवं चैव किंकराणां निबर्हणम् ॥ (२२।२)

ग्रहणं वायुसूनोश् च लङ्कादाहाभिगर्जनम् । (२३।१)

प्रतिप्लवनम् एवाथ मधूनां हरणं तथा ॥ (२३।२)

राघवाश्वासनं चैव मणिनिर्यातनं तथा । (२४।१)

संगमं च समुद्रस्य नलसेतोश् च बन्धनम् ॥ (२४।२)

प्रतारं च समुद्रस्य रात्रौ लङ्कावरोधनम् । (२५।१)

विभीषणेन संसर्गं वधोपायनिवेदनम् ॥ (२५।२)

कुम्भकर्णस्य निधनं मेघनादनिबर्हणम् । (२६।१)

रावणस्य विनाशं च सीतावाप्तिम् अरेः पुरे ॥ (२६।२)

विभीषणाभिषेकं च पुष्पकस्य च दर्शनम् । (२७।१)

अयोध्यायाश् च गमनं भरतेन समागमम् ॥ (२७।२)

रामाभिषेकाभ्युदयं सर्वसैन्यविसर्जनम् । (२८।१)

स्वराष्ट्ररञ्जनं चैव वैदेह्याश् च विसर्जनम् ॥ (२८।२)

अनागतं च यत् किंचिद् रामस्य वसुधातले । (२९।१)

तच् चकारोत्तरे काव्ये वाल्मीकिर् भगवान् ऋषिः ॥ (२९।२)