ततो नीलाम्बुदनिभः प्रहस्तो नाम राक्षसः । (१।१)

अब्रवीत् प्राञ्जलिर् वाक्यं शूरः सेनापतिस्तदा ॥ (१।२)

देवदानवगन्धर्वाः पिशाचपतगोरगाः । (२।१)

न त्वां धर्षयितुं शक्ताः किं पुनर् वानरा रणे ॥ (२।२)

सर्वे प्रमत्ता विश्वस्ता वञ्चिताः स्म हनूमता । (३।१)

न हि मे जीवतो गच्छेज्जीवन् स वनगोचरः ॥ (३।२)

सर्वां सागरपर्यन्तां सशैलवनकाननाम् । (४।१)

करोम्यवानरां भूमिम् आज्ञापयतु मां भवान् ॥ (४।२)

रक्षां चैव विधास्यामि वानराद् रजनीचर । (५।१)

नागमिष्यति ते दुःखं किंचिद् आत्मापराधजम् ॥ (५।२)

अब्रवीच्च सुसंक्रुद्धो दुर्मुखो नाम राक्षसः । (६।१)

इदं न क्षमणीयं हि सर्वेषां नः प्रधर्षणम् ॥ (६।२)

अयं परिभवो भूयः पुरस्यान्तःपुरस्य च । (७।१)

श्रीमतो राक्षसेन्द्रस्य वानरेन्द्रप्रधर्षणम् ॥ (७।२)

अस्मिन्मुहूर्ते हत्वैको निवर्तिष्यामि वानरान् । (८।१)

प्रविष्टान् सागरं भीमम् अम्बरं वा रसातलम् ॥ (८।२)

ततो ऽब्रवीत् सुसंक्रुद्धो वज्रदंष्ट्रो महाबलः । (९।१)

प्रगृह्य परिघं घोरं मांसशोणितरूपितम् ॥ (९।२)

किं वो हनुमता कार्यं कृपणेन तपस्विना । (१०।१)

रामे तिष्ठति दुर्धर्षे सुग्रीवे सहलक्ष्मणे ॥ (१०।२)

अद्य रामं ससुग्रीवं परिघेण सलक्ष्मणम् । (११।१)

आगमिष्यामि हत्वैको विक्षोभ्य हरिवाहिनीम् ॥ (११।२)

कौम्भकर्णिस्ततो वीरो निकुम्भो नाम वीर्यवान् । (१२।१)

अब्रवीत् परमक्रुद्धो रावणं लोकरावणम् ॥ (१२।२)

सर्वे भवन्तस्तिष्ठन्तु महाराजेन संगताः । (१३।१)

अहम् एको हनिष्यामि राघवं सहलक्ष्मणम् ॥ (१३।२)

ततो वज्रहनुर् नाम राक्षसः पर्वतोपमः । (१४।१)

क्रुद्धः परिलिहन् वक्त्रं जिह्वया वाक्यम् अब्रवीत् ॥ (१४।२)

स्वैरं कुर्वन्तु कार्याणि भवन्तो विगतज्वराः । (१५।१)

एको ऽहं भक्षयिष्यामि तान् सर्वान् हरियूथपान् ॥ (१५।२)

स्वस्थाः क्रीडन्तु निश्चिन्ताः पिबन्तु मधुवारुणीम् । (१६।१)

अहम् एको हनिष्यामि सुग्रीवं सहलक्ष्मणम् । (१६।२)

साङ्गदं च हनूमन्तं रामं च रणकुञ्जरम् ॥ (१६।३)