तेषां समुपविष्टानां सर्वेषां दीनचेतसाम् । (१।१)

उवाच वाक्यं काकुत्स्थो मुखेन परिशुष्यता ॥ (१।२)

सर्वे शृणुत भद्रं वो मा कुरुध्वं मनो ऽन्यथा । (२।१)

पौराणां मम सीतायां यादृशी वर्तते कथा ॥ (२।२)

पौरापवादः सुमहांस्तथा जनपदस्य च । (३।१)

वर्तते मयि बीभत्सः स मे मर्माणि कृन्तति ॥ (३।२)

अहं किल कुले जात इक्ष्वाकूणां महात्मनाम् । (४।१)

सीतां पापसमाचाराम् आनयेयं कथं पुरे ॥ (४।२)

जानासि हि यथा सौम्य दण्डके विजने वने । (५।१)

रावणेन हृता सीता स च विध्वंसितो मया ॥ (५।२)

प्रत्यक्षं तव सौमित्रे देवानां हव्यवाहनः । (६।१)

अपापां मैथिलीम् आह वायुश्चाकाशगोचरः ॥ (६।२)

चन्द्रादित्यौ च शंसेते सुराणां संनिधौ पुरा । (७।१)

ऋषीणां चैव सर्वेषाम् अपापां जनकात्मजाम् ॥ (७।२)

एवं शुद्धसमाचारा देवगन्धर्वसंनिधौ । (८।१)

लङ्काद्वीपे महेन्द्रेण मम हस्ते निवेशिता ॥ (८।२)

अन्तरात्मा च मे वेत्ति सीतां शुद्धां यशस्विनीम् । (९।१)

ततो गृहीत्वा वैदेहीम् अयोध्याम् अहम् आगतः ॥ (९।२)

अयं तु मे महान् वादः शोकश्च हृदि वर्तते । (१०।१)

पौरापवादः सुमहांस्तथा जनपदस्य च ॥ (१०।२)

अकीर्तिर् यस्य गीयेत लोके भूतस्य कस्यचित् । (११।१)

पतत्येवाधमांल्लोकान् यावच्छब्दः स कीर्त्यते ॥ (११।२)

अकीर्तिर् निन्द्यते दैवैः कीर्तिर् देवेषु पूज्यते । (१२।१)

कीर्त्यर्थं च समारम्भः सर्व एव महात्मनाम् ॥ (१२।२)

अप्यहं जीवितं जह्यां युष्मान् वा पुरुषर्षभाः । (१३।१)

अपवादभयाद् भीताः किं पुनर् जनकात्मजाम् ॥ (१३।२)

तस्माद् भवन्तः पश्यन्तु पतितं शोकसागरे । (१४।१)

न हि पश्याम्यहं भूयः किंचिद् दुःखम् अतो ऽधिकम् ॥ (१४।२)

श्वस्त्वं प्रभाते सौमित्रे सुमन्त्राधिष्ठितं रथम् । (१५।१)

आरुह्य सीताम् आरोप्य विषयान्ते समुत्सृज ॥ (१५।२)

गङ्गायास्तु परे पारे वाल्मीकेः सुमहात्मनः । (१६।१)

आश्रमो दिव्यसंकाशस्तमसातीरम् आश्रितः ॥ (१६।२)

तत्रैनां विजने कक्षे विसृज्य रघुनन्दन । (१७।१)

शीघ्रम् आगच्छ सौमित्रे कुरुष्व वचनं मम ॥ (१७।२)

न चास्मि प्रतिवक्तव्यः सीतां प्रति कथंचन । (१८।१)

अप्रीतिः परमा मह्यं भवेत् तु प्रतिवारिते ॥ (१८।२)

शापिताश्च मया यूयं भुजाभ्यां जीवितेन च । (१९।१)

ये मां वाक्यान्तरे ब्रूयुर् अनुनेतुं कथंचन ॥ (१९।२)

मानयन्तु भवन्तो मां यदि मच्छासने स्थिताः । (२०।१)

इतो ऽद्य नीयतां सीता कुरुष्व वचनं मम ॥ (२०।२)

पूर्वम् उक्तो ऽहम् अनया गङ्गातीरे महाश्रमान् । (२१।१)

पश्येयम् इति तस्याश्च कामः संवर्त्यताम् अयम् ॥ (२१।२)

एवम् उक्त्वा तु काकुत्स्थो बाष्पेण पिहितेक्षणः । (२२।१)

प्रविवेश स धर्मात्मा भ्रातृभिः परिवारितः ॥ (२२।२)