ततस्ते राक्षसास्तत्र गत्वा रावणमन्दिरम् । (१।१)

न्यवेदयन् पुरीं रुद्धां रामेण सह वानरैः ॥ (१।२)

रुद्धां तु नगरीं श्रुत्वा जातक्रोधो निशाचरः । (२।१)

विधानं द्विगुणं श्रुत्वा प्रासादं सो ऽध्यरोहत ॥ (२।२)

स ददर्शावृतां लङ्कां सशैलवनकाननाम् । (३।१)

असंख्येयैर् हरिगणैः सर्वतो युद्धकाङ्क्षिभिः ॥ (३।२)

स दृष्ट्वा वानरैः सर्वां वसुधां कवलीकृताम् । (४।१)

कथं क्षपयितव्याः स्युर् इति चिन्तापरो ऽभवत् ॥ (४।२)

स चिन्तयित्वा सुचिरं धैर्यम् आलम्ब्य रावणः । (५।१)

राघवं हरियूथांश्च ददर्शायतलोचनः ॥ (५।२)

प्रेक्षतो राक्षसेन्द्रस्य तान्यनीकानि भागशः । (६।१)

राघवप्रियकामार्थं लङ्काम् आरुरुहुस्तदा ॥ (६।२)

ते ताम्रवक्त्रा हेमाभा रामार्थे त्यक्तजीविताः । (७।१)

लङ्काम् एवाभ्यवर्तन्त सालतालशिलायुधाः ॥ (७।२)

ते द्रुमैः पर्वताग्रैश्च मुष्टिभिश्च प्लवंगमाः । (८।१)

प्रासादाग्राणि चोच्चानि ममन्थुस्तोरणानि च ॥ (८।२)

परिखाः पूरयन्ति स्म प्रसन्नसलिलायुताः । (९।१)

पांसुभिः पर्वताग्रैश्च तृणैः काष्ठैश्च वानराः ॥ (९।२)

ततः सहस्रयूथाश्च कोटियूथाश्च यूथपाः । (१०।१)

कोटीशतयुताश्चान्ये लङ्काम् आरुरुहुस्तदा ॥ (१०।२)

काञ्चनानि प्रमृद्नन्तस्तोरणानि प्लवंगमाः । (११।१)

कैलासशिखराभानि गोपुराणि प्रमथ्य च ॥ (११।२)

आप्लवन्तः प्लवन्तश्च गर्जन्तश्च प्लवंगमाः । (१२।१)

लङ्कां ताम् अभ्यवर्तन्त महावारणसंनिभाः ॥ (१२।२)

जयत्यतिबलो रामो लक्ष्मणश्च महाबलः । (१३।१)

राजा जयति सुग्रीवो राघवेणाभिपालितः ॥ (१३।२)

इत्येवं घोषयन्तश्च गर्जन्तश्च प्लवंगमाः । (१४।१)

अभ्यधावन्त लङ्कायाः प्राकारं कामरूपिणः ॥ (१४।२)

वीरबाहुः सुबाहुश्च नलश्च वनगोचरः । (१५।१)

निपीड्योपनिविष्टास्ते प्राकारं हरियूथपाः ॥ (१५।२)

एतस्मिन्न् अन्तरे चक्रुः स्कन्धावारनिवेशनम् ॥ (१६।१)

पूर्वद्वारं तु कुमुदः कोटिभिर् दशभिर् वृतः । (१७।१)

आवृत्य बलवांस्तस्थौ हरिभिर् जितकाशिभिः ॥ (१७।२)

दक्षिणद्वारम् आगम्य वीरः शतबलिः कपिः । (१८।१)

आवृत्य बलवांस्तस्थौ विंशत्या कोटिभिर् वृतः ॥ (१८।२)

सुषेणः पश्चिमद्वारं गतस्तारापिता हरिः । (१९।१)

आवृत्य बलवांस्तस्थौ षष्टिकोटिभिर् आवृतः ॥ (१९।२)

उत्तरद्वारम् आसाद्य रामः सौमित्रिणा सह । (२०।१)

आवृत्य बलवांस्तस्थौ सुग्रीवश्च हरीश्वरः ॥ (२०।२)

गोलाङ्गूलो महाकायो गवाक्षो भीमदर्शनः । (२१।१)

वृतः कोट्या महावीर्यस्तस्थौ रामस्य पार्श्वतः ॥ (२१।२)

ऋक्षाणां भीमवेगानां धूम्रः शत्रुनिबर्हणः । (२२।१)

वृतः कोट्या महावीर्यस्तस्थौ रामस्य पार्श्वतः ॥ (२२।२)

संनद्धस्तु महावीर्यो गदापाणिर् विभीषणः । (२३।१)

वृतो यस्तैस्तु सचिवैस्तस्थौ तत्र महाबलः ॥ (२३।२)

गजो गवाक्षो गवयः शरभो गन्धमादनः । (२४।१)

समन्तात् परिधावन्तो ररक्षुर् हरिवाहिनीम् ॥ (२४।२)

ततः कोपपरीतात्मा रावणो राक्षसेश्वरः । (२५।१)

निर्याणं सर्वसैन्यानां द्रुतम् आज्ञापयत् तदा ॥ (२५।२)

निष्पतन्ति ततः सैन्या हृष्टा रावणचोदिताः । (२६।१)

समये पूर्यमाणस्य वेगा इव महोदधेः ॥ (२६।२)

एतस्मिन्न् अन्तरे घोरः संग्रामः समपद्यत । (२७।१)

रक्षसां वानराणां च यथा देवासुरे पुरा ॥ (२७।२)

ते गदाभिः प्रदीप्ताभिः शक्तिशूलपरश्वधैः । (२८।१)

निजघ्नुर् वानरान् घोराः कथयन्तः स्वविक्रमान् ॥ (२८।२)

तथा वृक्षैर् महाकायाः पर्वताग्रैश्च वानराः । (२९।१)

निजघ्नुस्तानि रक्षांसि नखैर् दन्तैश्च वेगिताः ॥ (२९।२)

राक्षसास्त्वपरे भीमाः प्राकारस्था महीगतान् । (३०।१)

भिण्डिपालैश्च खड्गैश्च शूलैश्चैव व्यदारयन् ॥ (३०।२)

वानराश्चापि संक्रुद्धाः प्राकारस्थान्महीगताः । (३१।१)

राक्षसान् पातयामासुः समाप्लुत्य प्लवंगमाः ॥ (३१।२)

स संप्रहारस्तुमुलो मांसशोणितकर्दमः । (३२।१)

रक्षसां वानराणां च संबभूवाद्भुतोपमः ॥ (३२।२)