सर्वापूर्वम् इयं येषाम् आसीत् कृत्स्ना वसुंधरा । (१।१)

प्रजापतिम् उपादाय नृपाणां जयशालिनाम् ॥ (१।२)

येषां स सगरो नाम सागरो येन खानितः । (२।१)

षष्टिः पुत्रसहस्राणि यं यान्तं पर्यवारयन् ॥ (२।२)

इक्ष्वाकूणाम् इदं तेषां राज्ञां वंशे महात्मनाम् । (३।१)

महद् उत्पन्नम् आख्यानं रामायणम् इति श्रुतम् ॥ (३।२)

तद् इदं वर्तयिष्यामि सर्वं निखिलम् आदितः । (४।१)

धर्मकामार्थसहितं श्रोतव्यम् अनसूयया ॥ (४।२)

कोसलो नाम मुदितः स्फीतो जनपदो महान् । (५।१)

निविष्टः सरयूतीरे प्रभूतधनधान्यवान् ॥ (५।२)

अयोध्या नाम नगरी तत्रासील् लोकविश्रुता । (६।१)

मनुना मानवेन्द्रेण या पुरी निर्मिता स्वयम् ॥ (६।२)

आयता दश च द्वे च योजनानि महापुरी । (७।१)

श्रीमती त्रीणि विस्तीर्णा सुविभक्तमहापथा ॥ (७।२)

राजमार्गेण महता सुविभक्तेन शोभिता । (८।१)

मुक्तपुष्पावकीर्णेन जलसिक्तेन नित्यशः ॥ (८।२)

तां तु राजा दशरथो महाराष्ट्रविवर्धनः । (९।१)

पुरीम् आवासयामास दिवि देवपतिर् यथा ॥ (९।२)

कपाटतोरणवतीं सुविभक्तान्तरापणाम् । (१०।१)

सर्वयन्त्रायुधवतीम् उपेतां सर्वशिल्पिभिः ॥ (१०।२)

सूतमागधसम्बाधां श्रीमतीम् अतुलप्रभाम् । (११।१)

उच्चाट्टालध्वजवतीं शतघ्नीशतसंकुलाम् ॥ (११।२)

वधूनाटकसंघैश् च संयुक्तां सर्वतः पुरीम् । (१२।१)

उद्यानाम्रवणोपेतां महतीं सालमेखलाम् ॥ (१२।२)

दुर्गगम्भीरपरिघां दुर्गाम् अन्यैर् दुरासदाम् । (१३।१)

वाजिवारणसम्पूर्णां गोभिर् उष्ट्रैः खरैस् तथा ॥ (१३।२)

सामन्तराजसंघैश् च बलिकर्मभिर् आवृताम् । (१४।१)

नानादेशनिवासैश् च वणिग्भिर् उपशोभिताम् ॥ (१४।२)

प्रसादै रत्नविकृतैः पर्वतैर् उपशोभिताम् । (१५।१)

कूटागारैश् च सम्पूर्णाम् इन्द्रस्येवामरावतीम् ॥ (१५।२)

चित्राम् अष्टापदाकारां वरनारीगणैर् युताम् । (१६।१)

सर्वरत्नसमाकीर्णां विमानगृहशोभिताम् ॥ (१६।२)

गृहगाढाम् अविच्छिद्रां समभूमौ निवेशिताम् । (१७।१)

शालितण्डुलसम्पूर्णाम् इक्षुकाण्डरसोदकाम् ॥ (१७।२)

दुन्दुभीभिर् मृदङ्गैश् च वीणाभिः पणवैस् तथा । (१८।१)

नादितां भृशम् अत्यर्थं पृथिव्यां ताम् अनुत्तमाम् ॥ (१८।२)

विमानम् इव सिद्धानां तपसाधिगतं दिवि । (१९।१)

सुनिवेशितवेश्मान्तां नरोत्तमसमावृताम् ॥ (१९।२)

ये च बाणैर् न विध्यन्ति विविक्तम् अपरापरम् । (२०।१)

शब्दवेध्यं च विततं लघुहस्ता विशारदाः ॥ (२०।२)

सिंहव्याघ्रवराहाणां मत्तानां नदतां वने । (२१।१)

हन्तारो निशितैः शस्त्रैर् बलाद् बाहुबलैर् अपि ॥ (२१।२)

तादृशानां सहस्रैस् ताम् अभिपूर्णां महारथैः । (२२।१)

पुरीम् आवासयामास राजा दशरथस् तदा ॥ (२२।२)

ताम् अग्निमद्भिर् गुणवद्भिर् आवृतां द्विजोत्तमैर् वेदषडङ्गपारगैः । (२३।१)

सहस्रदैः सत्यरतैर् महात्मभिर् महर्षिकल्पैर् ऋषिभिश् च केवलैः ॥ (२३।२)