प्रविश्य तु महारण्यं दण्डकारण्यम् आत्मवान् । (१।१)

ददर्श रामो दुर्धर्षस् तापसाश्रममण्डलम् ॥ (१।२)

कुशचीरपरिक्षिप्तं ब्राह्म्या लक्ष्म्या समावृतम् । (२।१)

यथा प्रदीप्तं दुर्धर्षं गगने सूर्यमण्डलम् ॥ (२।२)

शरण्यं सर्वभूतानां सुसंमृष्टाजिरं सदा । (३।१)

पूजितं चोपनृत्तं च नित्यम् अप्सरसां गणैः ॥ (३।२)

विशालैर् अग्निशरणैः स्रुग्भाण्डैर् अजिनैः कुशैः । (४।१)

समिद्भिस् तोयकलशैः फलमूलैश् च शोभितम् ॥ (४।२)

आरण्यैश् च महावृक्षैः पुण्यैः स्वादुफलैर् वृतम् । (५।१)

बलिहोमार्चितं पुण्यं ब्रह्मघोषनिनादितम् ॥ (५।२)

पुष्पैर् वन्यैः परिक्षिप्तं पद्मिन्या च सपद्मया । (६।१)

फलमूलाशनैर् दान्तैश् चीरकृष्णाजिनाम्बरैः ॥ (६।२)

सूर्यवैश्वानराभैश् च पुराणैर् मुनिभिर् वृतम् । (७।१)

पुण्यैश् च नियताहारैः शोभितं परमर्षिभिः ॥ (७।२)

तद् ब्रह्मभवनप्रख्यं ब्रह्मघोषनिनादितम् । (८।१)

ब्रह्मविद्भिर् महाभागैर् ब्राह्मणैर् उपशोभितम् ॥ (८।२)

तद् दृष्ट्वा राघवः श्रीमांस् तापसाश्रममण्डलम् । (९।१)

अभ्यगच्छन् महातेजा विज्यं कृत्वा महद् धनुः ॥ (९।२)

दिव्यज्ञानोपपन्नास् ते रामं दृष्ट्वा महर्षयः । (१०।१)

अभ्यगच्छंस् तदा प्रीता वैदेहीं च यशस्विनीम् ॥ (१०।२)

ते तं सोमम् इवोद्यन्तं दृष्ट्वा वै धर्मचारिणः । (११।१)

मङ्गलानि प्रयुञ्जानाः प्रत्यगृह्णन् दृढव्रताः ॥ (११।२)

रूपसंहननं लक्ष्मीं सौकुमार्यं सुवेषताम् । (१२।१)

ददृशुर् विस्मिताकारा रामस्य वनवासिनः ॥ (१२।२)

वैदेहीं लक्ष्मणं रामं नेत्रैर् अनिमिषैर् इव । (१३।१)

आश्चर्यभूतान् ददृशुः सर्वे ते वनचारिणः ॥ (१३।२)

अत्रैनं हि महाभागाः सर्वभूतहिते रताः । (१४।१)

अतिथिं पर्णशालायां राघवं संन्यवेशयन् ॥ (१४।२)

ततो रामस्य सत्कृत्य विधिना पावकोपमाः । (१५।१)

आजह्रुस् ते महाभागाः सलिलं धर्मचारिणः ॥ (१५।२)

मूलं पुष्पं फलं वन्यम् आश्रमं च महात्मनः । (१६।१)

निवेदयित्वा धर्मज्ञास् ततः प्राञ्जलयो ऽब्रुवन् ॥ (१६।२)

धर्मपालो जनस्यास्य शरण्यश् च महायशाः । (१७।१)

पूजनीयश् च मान्यश् च राजा दण्डधरो गुरुः ॥ (१७।२)

इन्द्रस्येव चतुर्भागः प्रजा रक्षति राघव । (१८।१)

राजा तस्माद् वरान् भोगान् भुङ्क्ते लोकनमस्कृतः ॥ (१८।२)

ते वयं भवता रक्ष्या भवद्विषयवासिनः । (१९।१)

नगरस्थो वनस्थो वा त्वं नो राजा जनेश्वरः ॥ (१९।२)

न्यस्तदण्डा वयं राजञ् जितक्रोधा जितेन्द्रियाः । (२०।१)

रक्षितव्यास् त्वया शश्वद् गर्भभूतास् तपोधनाः ॥ (२०।२)

एवम् उक्त्वा फलैर् मूलैः पुष्पैर् वन्यैश् च राघवम् । (२१।१)

अन्यैश् च विविधाहारैः सलक्ष्मणम् अपूजयन् ॥ (२१।२)

तथान्ये तापसाः सिद्धा रामं वैश्वानरोपमाः । (२२।१)

न्यायवृत्ता यथान्यायं तर्पयामासुर् ईश्वरम् ॥ (२२।२)