तया महत्या यायिन्या ध्वजिन्या वनवासिनः । (१।१)

अर्दिता यूथपा मत्ताः सयूथाः सम्प्रदुद्रुवुः ॥ (१।२)

ऋक्षाः पृषतसंघाश् च रुरवश् च समन्ततः । (२।१)

दृश्यन्ते वनराजीषु गिरिष्व् अपि नदीषु च ॥ (२।२)

स सम्प्रतस्थे धर्मात्मा प्रीतो दशरथात्मजः । (३।१)

वृतो महत्या नादिन्या सेनया चतुरङ्गया ॥ (३।२)

सागरौघनिभा सेना भरतस्य महात्मनः । (४।१)

महीं संछादयामास प्रावृषि द्याम् इवाम्बुदः ॥ (४।२)

तुरंगौघैर् अवतता वारणैश् च महाजवैः । (५।१)

अनालक्ष्या चिरं कालं तस्मिन् काले बभूव भूः ॥ (५।२)

स यात्वा दूरम् अध्वानं सुपरिश्रान्तवाहनः । (६।१)

उवाच भरतः श्रीमान् वसिष्ठं मन्त्रिणां वरम् ॥ (६।२)

यादृशं लक्ष्यते रूपं यथा चैव श्रुतं मया । (७।१)

व्यक्तं प्राप्ताः स्म तं देशं भरद्वाजो यम् अब्रवीत् ॥ (७।२)

अयं गिरिश् चित्रकूटस् तथा मन्दाकिनी नदी । (८।१)

एतत् प्रकाशते दूरान् नीलमेघनिभं वनम् ॥ (८।२)

गिरेः सानूनि रम्याणि चित्रकूटस्य सम्प्रति । (९।१)

वारणैर् अवमृद्यन्ते मामकैः पर्वतोपमैः ॥ (९।२)

मुञ्चन्ति कुसुमान्य् एते नगाः पर्वतसानुषु । (१०।१)

नीला इवातपापाये तोयं तोयधरा घनाः ॥ (१०।२)

किंनराचरितोद्देशं पश्य शत्रुघ्न पर्वतम् । (११।१)

हयैः समन्ताद् आकीर्णं मकरैर् इव सागरम् ॥ (११।२)

एते मृगगणा भान्ति शीघ्रवेगाः प्रचोदिताः । (१२।१)

वायुप्रविद्धाः शरदि मेघराजिर् इवाम्बरे ॥ (१२।२)

कुर्वन्ति कुसुमापीडाञ् शिरःसु सुरभीन् अमी । (१३।१)

मेघप्रकाशैः फलकैर् दाक्षिणात्या यथा नराः ॥ (१३।२)

निष्कूजम् इव भूत्वेदं वनं घोरप्रदर्शनम् । (१४।१)

अयोध्येव जनाकीर्णा सम्प्रति प्रतिभाति मा ॥ (१४।२)

खुरैर् उदीरितो रेणुर् दिवं प्रच्छाद्य तिष्ठति । (१५।१)

तं वहत्य् अनिलः शीघ्रं कुर्वन्न् इव मम प्रियम् ॥ (१५।२)

स्यन्दनांस् तुरगोपेतान् सूतमुख्यैर् अधिष्ठितान् । (१६।१)

एतान् संपततः शीघ्रं पश्य शत्रुघ्न कानने ॥ (१६।२)

एतान् वित्रासितान् पश्य बर्हिणः प्रियदर्शनान् । (१७।१)

एतम् आविशतः शैलम् अधिवासं पतत्रिणाम् ॥ (१७।२)

अतिमात्रम् अयं देशो मनोज्ञः प्रतिभाति मा । (१८।१)

तापसानां निवासो ऽयं व्यक्तं स्वर्गपथो यथा ॥ (१८।२)

मृगा मृगीभिः सहिता बहवः पृषता वने । (१९।१)

मनोज्ञरूपा लक्ष्यन्ते कुसुमैर् इव चित्रिताः ॥ (१९।२)

साधु सैन्याः प्रतिष्ठन्तां विचिन्वन्तु च काननम् । (२०।१)

यथा तौ पुरुषव्याघ्रौ दृश्येते रामलक्ष्मणौ ॥ (२०।२)

भरतस्य वचः श्रुत्वा पुरुषाः शस्त्रपाणयः । (२१।१)

विविशुस् तद् वनं शूरा धूमं च ददृशुस् ततः ॥ (२१।२)

ते समालोक्य धूमाग्रम् ऊचुर् भरतम् आगताः । (२२।१)

नामनुष्ये भवत्य् अग्निर् व्यक्तम् अत्रैव राघवौ ॥ (२२।२)

अथ नात्र नरव्याघ्रौ राजपुत्रौ परंतपौ । (२३।१)

अन्ये रामोपमाः सन्ति व्यक्तम् अत्र तपस्विनः ॥ (२३।२)

तच् छ्रुत्वा भरतस् तेषां वचनं साधुसंमतम् । (२४।१)

सैन्यान् उवाच सर्वांस् तान् अमित्रबलमर्दनः ॥ (२४।२)

यत्ता भवन्तस् तिष्ठन्तु नेतो गन्तव्यम् अग्रतः । (२५।१)

अहम् एव गमिष्यामि सुमन्त्रो गुरुर् एव च ॥ (२५।२)

एवम् उक्तास् ततः सर्वे तत्र तस्थुः समन्ततः । (२६।१)

भरतो यत्र धूमाग्रं तत्र दृष्टिं समादधात् ॥ (२६।२)

व्यवस्थिता या भरतेन सा चमूर् निरीक्षमाणापि च धूमम् अग्रतः । (२७।१)

बभूव हृष्टा नचिरेण जानती प्रियस्य रामस्य समागमं तदा ॥ (२७।२)