स प्रविश्य सभां राजा दीनः परमदुःखितः । (१।१)

निषसादासने मुख्ये सिंहः क्रुद्ध इव श्वसन् ॥ (१।२)

अब्रवीच्च तदा सर्वान् बलमुख्यान् महाबलः । (२।१)

रावणः प्राञ्जलीन् वाक्यं पुत्रव्यसनकर्शितः ॥ (२।२)

सर्वे भवन्तः सर्वेण हस्त्यश्वेन समावृताः । (३।१)

निर्यान्तु रथसंघैश्च पादातैश्चोपशोभिताः ॥ (३।२)

एकं रामं परिक्षिप्य समरे हन्तुम् अर्हथ । (४।१)

प्रहृष्टा शरवर्षेण प्रावृट्काल इवाम्बुदाः ॥ (४।२)

अथवाहं शरैस् तीक्ष्णैर् भिन्नगात्रं महारणे । (५।१)

भवद्भिः श्वो निहन्तास्मि रामं लोकस्य पश्यतः ॥ (५।२)

इत्येवं राक्षसेन्द्रस्य वाक्यम् आदाय राक्षसाः । (६।१)

निर्ययुस्ते रथैः शीघ्रं नागानीकैश्च संवृताः ॥ (६।२)

स संग्रामो महाभीमः सूर्यस्योदयनं प्रति । (७।१)

रक्षसां वानराणां च तुमुलः समपद्यत ॥ (७।२)

ते गदाभिर् विचित्राभिः प्रासैः खड्गैः परश्वधैः । (८।१)

अन्योन्यं समरे जघ्नुस्तदा वानरराक्षसाः ॥ (८।२)

मातंगरथकूलाश्च वाजिमत्स्या ध्वजद्रुमाः । (९।१)

शरीरसंघाटवहाः प्रसस्रुः शोणितापगाः ॥ (९।२)

ध्वजवर्मरथान् अश्वान्नानाप्रहरणानि च । (१०।१)

आप्लुत्याप्लुत्य समरे वानरेन्द्रा बभञ्जिरे ॥ (१०।२)

केशान् कर्णललाटांश्च नासिकाश्च प्लवंगमाः । (११।१)

रक्षसां दशनैस्तीक्ष्णैर् नखैश्चापि व्यकर्तयन् ॥ (११।२)

एकैकं राक्षसं संख्ये शतं वानरपुंगवाः । (१२।१)

अभ्यधावन्त फलिनं वृक्षं शकुनयो यथा ॥ (१२।२)

तथा गदाभिर् गुर्वीभिः प्रासैः खड्गैः परश्वधैः । (१३।१)

निर्जघ्नुर् वानरान् घोरान् राक्षसाः पर्वतोपमाः ॥ (१३।२)

राक्षसैर् वध्यमानानां वानराणां महाचमूः । (१४।१)

शरण्यं शरणं याता रामं दशरथात्मजम् ॥ (१४।२)

ततो रामो महातेजा धनुर् आदाय वीर्यवान् । (१५।१)

प्रविश्य राक्षसं सैन्यं शरवर्षं ववर्ष ह ॥ (१५।२)

प्रविष्टं तु तदा रामं मेघाः सूर्यम् इवाम्बरे । (१६।१)

नाभिजग्मुर् महाघोरं निर्दहन्तं शराग्निना ॥ (१६।२)

कृतान्येव सुघोराणि रामेण रजनीचराः । (१७।१)

रणे रामस्य ददृशुः कर्माण्यसुकराणि च ॥ (१७।२)

चालयन्तं महानीकं विधमन्तं महारथान् । (१८।१)

ददृशुस्ते न वै रामं वातं वनगतं यथा ॥ (१८।२)

छिन्नं भिन्नं शरैर् दग्धं प्रभग्नं शस्त्रपीडितम् । (१९।१)

बलं रामेण ददृशुर् न रामं शीघ्रकारिणम् ॥ (१९।२)

प्रहरन्तं शरीरेषु न ते पश्यन्ति राघवम् । (२०।१)

इन्द्रियार्थेषु तिष्ठन्तं भूतात्मानम् इव प्रजाः ॥ (२०।२)

एष हन्ति गजानीकम् एष हन्ति महारथान् । (२१।१)

एष हन्ति शरैस्तीक्ष्णैः पदातीन् वाजिभिः सह ॥ (२१।२)

इति ते राक्षसाः सर्वे रामस्य सदृशान् रणे । (२२।१)

अन्योन्यकुपिता जघ्नुः सादृश्याद् राघवस्य ते ॥ (२२।२)

न ते ददृशिरे रामं दहन्तम् अरिवाहिनीम् । (२३।१)

मोहिताः परमास्त्रेण गान्धर्वेण महात्मना ॥ (२३।२)

ते तु रामसहस्राणि रणे पश्यन्ति राक्षसाः । (२४।१)

पुनः पश्यन्ति काकुत्स्थम् एकम् एव महाहवे ॥ (२४।२)

भ्रमन्तीं काञ्चनीं कोटिं कार्मुकस्य महात्मनः । (२५।१)

अलातचक्रप्रतिमां ददृशुस्ते न राघवम् ॥ (२५।२)

शरीरनाभि सत्त्वार्चिः शरारं नेमिकार्मुकम् । (२६।१)

ज्याघोषतलनिर्घोषं तेजोबुद्धिगुणप्रभम् ॥ (२६।२)

दिव्यास्त्रगुणपर्यन्तं निघ्नन्तं युधि राक्षसान् । (२७।१)

ददृशू रामचक्रं तत् कालचक्रम् इव प्रजाः ॥ (२७।२)

अनीकं दशसाहस्रं रथानां वातरंहसाम् । (२८।१)

अष्टादशसहस्राणि कुञ्जराणां तरस्विनाम् ॥ (२८।२)

चतुर्दशसहस्राणि सारोहाणां च वाजिनाम् । (२९।१)

पूर्णे शतसहस्रे द्वे राक्षसानां पदातिनाम् ॥ (२९।२)

दिवसस्याष्टमे भागे शरैर् अग्निशिखोपमैः । (३०।१)

हतान्येकेन रामेण रक्षसां कामरूपिणाम् ॥ (३०।२)

ते हताश्वा हतरथाः श्रान्ता विमथितध्वजाः । (३१।१)

अभिपेतुः पुरीं लङ्कां हतशेषा निशाचराः ॥ (३१।२)

हतैर् गजपदात्यश्वैस्तद् बभूव रणाजिरम् । (३२।१)

आक्रीडभूमी रुद्रस्य क्रुद्धस्येव पिनाकिनः ॥ (३२।२)

ततो देवाः सगन्धर्वाः सिद्धाश्च परमर्षयः । (३३।१)

साधु साध्विति रामस्य तत् कर्म समपूजयन् ॥ (३३।२)

अब्रवीच्च तदा रामः सुग्रीवं प्रत्यनन्तरम् । (३४।१)

एतद् अस्त्रबलं दिव्यं मम वा त्र्यम्बकस्य वा ॥ (३४।२)

निहत्य तां राक्षसवाहिनीं तु रामस्तदा शक्रसमो महात्मा । (३५।१)

अस्त्रेषु शस्त्रेषु जितक्लमश्च संस्तूयते देवगणैः प्रहृष्टैः ॥ (३५।२)