1.1१.१तस्य रामस्य सुप्तस्य कुशास्तीर्णे महीतले । (१।१)
tasya rāmasya suptasya kuśāstīrṇe mahītale |
1.2१.२नियमाद् अप्रमत्तस्य निशास्तिस्रो ऽतिचक्रमुः ॥ (१।२)
niyamād apramattasya niśāstisro 'ticakramuḥ ||
2.1२.१न च दर्शयते मन्दस्तदा रामस्य सागरः । (२।१)
na ca darśayate mandastadā rāmasya sāgaraḥ |
2.2२.२प्रयतेनापि रामेण यथार्हम् अभिपूजितः ॥ (२।२)
prayatenāpi rāmeṇa yathārham abhipūjitaḥ ||
3.1३.१समुद्रस्य ततः क्रुद्धो रामो रक्तान्तलोचनः । (३।१)
samudrasya tataḥ kruddho rāmo raktāntalocanaḥ |
3.2३.२समीपस्थम् उवाचेदं लक्ष्मणं शुभलक्षणम् ॥ (३।२)
samīpastham uvācedaṃ lakṣmaṇaṃ śubhalakṣaṇam ||
4.1४.१पश्य तावद् अनार्यस्य पूज्यमानस्य लक्ष्मण । (४।१)
paśya tāvad anāryasya pūjyamānasya lakṣmaṇa |
4.2४.२अवलेपं समुद्रस्य न दर्शयति यत् स्वयम् ॥ (४।२)
avalepaṃ samudrasya na darśayati yat svayam ||
5.1५.१प्रशमश्च क्षमा चैव आर्जवं प्रियवादिता । (५।१)
praśamaśca kṣamā caiva ārjavaṃ priyavāditā |
5.2५.२असामर्थ्यं फलन्त्येते निर्गुणेषु सतां गुणाः ॥ (५।२)
asāmarthyaṃ phalantyete nirguṇeṣu satāṃ guṇāḥ ||
6.1६.१आत्मप्रशंसिनं दुष्टं धृष्टं विपरिधावकम् । (६।१)
ātmapraśaṃsinaṃ duṣṭaṃ dhṛṣṭaṃ viparidhāvakam |
6.2६.२सर्वत्रोत्सृष्टदण्डं च लोकः सत्कुरुते नरम् ॥ (६।२)
sarvatrotsṛṣṭadaṇḍaṃ ca lokaḥ satkurute naram ||
7.1७.१न साम्ना शक्यते कीर्तिर् न साम्ना शक्यते यशः । (७।१)
na sāmnā śakyate kīrtir na sāmnā śakyate yaśaḥ |
7.2७.२प्राप्तुं लक्ष्मण लोके ऽस्मिञ् जयो वा रणमूर्धनि ॥ (७।२)
prāptuṃ lakṣmaṇa loke 'smiñ jayo vā raṇamūrdhani ||
8.1८.१अद्य मद्बाणनिर्भिन्नैर् मकरैर् मकरालयम् । (८।१)
adya madbāṇanirbhinnair makarair makarālayam |
8.2८.२निरुद्धतोयं सौमित्रे प्लवद्भिः पश्य सर्वतः ॥ (८।२)
niruddhatoyaṃ saumitre plavadbhiḥ paśya sarvataḥ ||
9.1९.१महाभोगानि मत्स्यानां करिणां च करान् इह । (९।१)
mahābhogāni matsyānāṃ kariṇāṃ ca karān iha |
9.2९.२भोगांश्च पश्य नागानां मया भिन्नानि लक्ष्मण ॥ (९।२)
bhogāṃśca paśya nāgānāṃ mayā bhinnāni lakṣmaṇa ||
10.1१०.१सशङ्खशुक्तिकाजालं समीनमकरं शरैः । (१०।१)
saśaṅkhaśuktikājālaṃ samīnamakaraṃ śaraiḥ |
10.2१०.२अद्य युद्धेन महता समुद्रं परिशोषये ॥ (१०।२)
adya yuddhena mahatā samudraṃ pariśoṣaye ||
11.1११.१क्षमया हि समायुक्तं माम् अयं मकरालयः । (११।१)
kṣamayā hi samāyuktaṃ mām ayaṃ makarālayaḥ |
11.2११.२असमर्थं विजानाति धिक् क्षमाम् ईदृशे जने ॥ (११।२)
asamarthaṃ vijānāti dhik kṣamām īdṛśe jane ||
12.1१२.१चापम् आनय सौमित्रे शरांश्चाशीविषोपमान् । (१२।१)
cāpam ānaya saumitre śarāṃścāśīviṣopamān |
12.2१२.२अद्याक्षोभ्यम् अपि क्रुद्धः क्षोभयिष्यामि सागरम् ॥ (१२।२)
adyākṣobhyam api kruddhaḥ kṣobhayiṣyāmi sāgaram ||
13.1१३.१वेलासु कृतमर्यादं सहसोर्मिसमाकुलम् । (१३।१)
velāsu kṛtamaryādaṃ sahasormisamākulam |
13.2१३.२निर्मर्यादं करिष्यामि सायकैर् वरुणालयम् ॥ (१३।२)
nirmaryādaṃ kariṣyāmi sāyakair varuṇālayam ||
14.1१४.१एवम् उक्त्वा धनुष्पाणिः क्रोधविस्फारितेक्षणः । (१४।१)
evam uktvā dhanuṣpāṇiḥ krodhavisphāritekṣaṇaḥ |
14.2१४.२बभूव रामो दुर्धर्षो युगान्ताग्निर् इव ज्वलन् ॥ (१४।२)
babhūva rāmo durdharṣo yugāntāgnir iva jvalan ||
15.1१५.१संपीड्य च धनुर् घोरं कम्पयित्वा शरैर् जगत् । (१५।१)
saṃpīḍya ca dhanur ghoraṃ kampayitvā śarair jagat |
15.2१५.२मुमोच विशिखान् उग्रान् वज्राणीव शतक्रतुः ॥ (१५।२)
mumoca viśikhān ugrān vajrāṇīva śatakratuḥ ||
16.1१६.१ते ज्वलन्तो महावेगास्तेजसा सायकोत्तमाः । (१६।१)
te jvalanto mahāvegāstejasā sāyakottamāḥ |
16.2१६.२प्रविशन्ति समुद्रस्य सलिलं त्रस्तपन्नगम् ॥ (१६।२)
praviśanti samudrasya salilaṃ trastapannagam ||
17.1१७.१ततो वेगः समुद्रस्य सनक्रमकरो महान् । (१७।१)
tato vegaḥ samudrasya sanakramakaro mahān |
17.2१७.२संबभूव महाघोरः समारुतरवस्तदा ॥ (१७।२)
saṃbabhūva mahāghoraḥ samārutaravastadā ||
18.1१८.१महोर्मिमालाविततः शङ्खशुक्तिसमाकुलः । (१८।१)
mahormimālāvitataḥ śaṅkhaśuktisamākulaḥ |
18.2१८.२सधूमपरिवृत्तोर्मिः सहसाभून्महोदधिः ॥ (१८।२)
sadhūmaparivṛttormiḥ sahasābhūnmahodadhiḥ ||
19.1१९.१व्यथिताः पन्नगाश्चासन् दीप्तास्या दीप्तलोचनाः । (१९।१)
vyathitāḥ pannagāścāsan dīptāsyā dīptalocanāḥ |
19.2१९.२दानवाश्च महावीर्याः पातालतलवासिनः ॥ (१९।२)
dānavāśca mahāvīryāḥ pātālatalavāsinaḥ ||
20.1२०.१ऊर्मयः सिन्धुराजस्य सनक्रमकरास्तदा । (२०।१)
ūrmayaḥ sindhurājasya sanakramakarāstadā |
20.2२०.२विन्ध्यमन्दरसंकाशाः समुत्पेतुः सहस्रशः ॥ (२०।२)
vindhyamandarasaṃkāśāḥ samutpetuḥ sahasraśaḥ ||
21.1२१.१आघूर्णिततरङ्गौघः संभ्रान्तोरगराक्षसः । (२१।१)
āghūrṇitataraṅgaughaḥ saṃbhrāntoragarākṣasaḥ |
21.2२१.२उद्वर्तितमहाग्राहः संवृत्तः सलिलाशयः ॥ (२१।२)
udvartitamahāgrāhaḥ saṃvṛttaḥ salilāśayaḥ ||
Data courtesy of The Digital Corpus of Sanskrit.
