सुग्रीवस्य वचः श्रुत्वा हेतुमत् परमार्थवित् । (१।१)

प्रतिजग्राह काकुत्स्थो हनूमन्तम् अथाब्रवीत् ॥ (१।२)

तरसा सेतुबन्धेन सागरोच्छोषणेन वा । (२।१)

सर्वथा सुसमर्थो ऽस्मि सागरस्यास्य लङ्घने ॥ (२।२)

कति दुर्गाणि दुर्गाया लङ्कायास्तद् ब्रवीहि मे । (३।१)

ज्ञातुम् इच्छामि तत् सर्वं दर्शनाद् इव वानर ॥ (३।२)

बलस्य परिमाणं च द्वारदुर्गक्रियाम् अपि । (४।१)

गुप्तिकर्म च लङ्काया रक्षसां सदनानि च ॥ (४।२)

यथासुखं यथावच्च लङ्कायाम् असि दृष्टवान् । (५।१)

सर्वम् आचक्ष्व तत्त्वेन सर्वथा कुशलो ह्यसि ॥ (५।२)

श्रुत्वा रामस्य वचनं हनूमान्मारुतात्मजः । (६।१)

वाक्यं वाक्यविदां श्रेष्ठो रामं पुनर् अथाब्रवीत् ॥ (६।२)

श्रूयतां सर्वम् आख्यास्ये दुर्गकर्मविधानतः । (७।१)

गुप्ता पुरी यथा लङ्का रक्षिता च यथा बलैः ॥ (७।२)

परां समृद्धिं लङ्कायाः सागरस्य च भीमताम् । (८।१)

विभागं च बलौघस्य निर्देशं वाहनस्य च ॥ (८।२)

प्रहृष्टा मुदिता लङ्का मत्तद्विपसमाकुला । (९।१)

महती रथसम्पूर्णा रक्षोगणसमाकुला ॥ (९।२)

दृढबद्धकवाटानि महापरिघवन्ति च । (१०।१)

द्वाराणि विपुलान्यस्याश्चत्वारि सुमहान्ति च ॥ (१०।२)

वप्रेषूपलयन्त्राणि बलवन्ति महान्ति च । (११।१)

आगतं परसैन्यं तैस्तत्र प्रतिनिवार्यते ॥ (११।२)

द्वारेषु संस्कृता भीमाः कालायसमयाः शिताः । (१२।१)

शतशो रोचिता वीरैः शतघ्न्यो रक्षसां गणैः ॥ (१२।२)

सौवर्णश्च महांस्तस्याः प्राकारो दुष्प्रधर्षणः । (१३।१)

मणिविद्रुमवैदूर्यमुक्ताविचरितान्तरः ॥ (१३।२)

सर्वतश्च महाभीमाः शीततोया महाशुभाः । (१४।१)

अगाधा ग्राहवत्यश्च परिखा मीनसेविताः ॥ (१४।२)

द्वारेषु तासां चत्वारः संक्रमाः परमायताः । (१५।१)

यन्त्रैर् उपेता बहुभिर् महद्भिर् दृढसंधिभिः ॥ (१५।२)

त्रायन्ते संक्रमास्तत्र परसैन्यागमे सति । (१६।१)

यन्त्रैस्तैर् अवकीर्यन्ते परिखासु समन्ततः ॥ (१६।२)

एकस्त्वकम्प्यो बलवान् संक्रमः सुमहादृढः । (१७।१)

काञ्चनैर् बहुभिः स्तम्भैर् वेदिकाभिश्च शोभितः ॥ (१७।२)

स्वयं प्रकृतिसम्पन्नो युयुत्सू राम रावणः । (१८।१)

उत्थितश्चाप्रमत्तश्च बलानाम् अनुदर्शने ॥ (१८।२)

लङ्का पुरी निरालम्बा देवदुर्गा भयावहा । (१९।१)

नादेयं पार्वतं वन्यं कृत्रिमं च चतुर्विधम् ॥ (१९।२)

स्थिता पारे समुद्रस्य दूरपारस्य राघव । (२०।१)

नौपथश्चापि नास्त्यत्र निरादेशश्च सर्वतः ॥ (२०।२)

शैलाग्रे रचिता दुर्गा सा पूर् देवपुरोपमा । (२१।१)

वाजिवारणसम्पूर्णा लङ्का परमदुर्जया ॥ (२१।२)

परिघाश्च शतघ्न्यश्च यन्त्राणि विविधानि च । (२२।१)

शोभयन्ति पुरीं लङ्कां रावणस्य दुरात्मनः ॥ (२२।२)

अयुतं रक्षसाम् अत्र पश्चिमद्वारम् आश्रितम् । (२३।१)

शूलहस्ता दुराधर्षाः सर्वे खड्गाग्रयोधिनः ॥ (२३।२)

नियुतं रक्षसाम् अत्र दक्षिणद्वारम् आश्रितम् । (२४।१)

चतुरङ्गेण सैन्येन योधास्तत्राप्यनुत्तमाः ॥ (२४।२)

प्रयुतं रक्षसाम् अत्र पूर्वद्वारं समाश्रितम् । (२५।१)

चर्मखड्गधराः सर्वे तथा सर्वास्त्रकोविदाः ॥ (२५।२)

अर्बुदं रक्षसाम् अत्र उत्तरद्वारम् आश्रितम् । (२६।१)

रथिनश्चाश्ववाहाश्च कुलपुत्राः सुपूजिताः ॥ (२६।२)

शतं शतसहस्राणां मध्यमं गुल्मम् आश्रितम् । (२७।१)

यातुधाना दुराधर्षाः साग्रकोटिश्च रक्षसाम् ॥ (२७।२)

ते मया संक्रमा भग्नाः परिखाश्चावपूरिताः । (२८।१)

दग्धा च नगरी लङ्का प्राकाराश्चावसादिताः ॥ (२८।२)

येन केन तु मार्गेण तराम वरुणालयम् । (२९।१)

हतेति नगरी लङ्का वानरैर् अवधार्यताम् ॥ (२९।२)

अङ्गदो द्विविदो मैन्दो जाम्बवान् पनसो नलः । (३०।१)

नीलः सेनापतिश्चैव बलशेषेण किं तव ॥ (३०।२)

प्लवमाना हि गत्वा तां रावणस्य महापुरीम् । (३१।१)

सप्रकारां सभवनाम् आनयिष्यन्ति मैथिलीम् ॥ (३१।२)

एवम् आज्ञापय क्षिप्रं बलानां सर्वसंग्रहम् । (३२।१)

मुहूर्तेन तु युक्तेन प्रस्थानम् अभिरोचय ॥ (३२।२)