युध्यतां तु ततस्तेषां वानराणां महात्मनाम् । (१।१)

रक्षसां संबभूवाथ बलकोपः सुदारुणः ॥ (१।२)

ते हयैः काञ्चनापीडैर् ध्वजैश्चाग्निशिखोपमैः । (२।१)

रथैश्चादित्यसंकाशैः कवचैश्च मनोरमैः ॥ (२।२)

निर्ययू राक्षसव्याघ्रा नादयन्तो दिशो दश । (३।१)

राक्षसा भीमकर्माणो रावणस्य जयैषिणः ॥ (३।२)

वानराणाम् अपि चमूर् महती जयम् इच्छताम् । (४।१)

अभ्यधावत तां सेनां रक्षसां कामरूपिणाम् ॥ (४।२)

एतस्मिन्न् अन्तरे तेषाम् अन्योन्यम् अभिधावताम् । (५।१)

रक्षसां वानराणां च द्वन्द्वयुद्धम् अवर्तत ॥ (५।२)

अङ्गदेनेन्द्रजित् सार्धं वालिपुत्रेण राक्षसः । (६।१)

अयुध्यत महातेजास्त्र्यम्बकेण यथान्धकः ॥ (६।२)

प्रजङ्घेन च संपातिर् नित्यं दुर्मर्षणो रणे । (७।१)

जम्बूमालिनम् आरब्धो हनूमान् अपि वानरः ॥ (७।२)

संगतः सुमहाक्रोधो राक्षसो रावणानुजः । (८।१)

समरे तीक्ष्णवेगेन मित्रघ्नेन विभीषणः ॥ (८।२)

तपनेन गजः सार्धं राक्षसेन महाबलः । (९।१)

निकुम्भेन महातेजा नीलो ऽपि समयुध्यत ॥ (९।२)

वानरेन्द्रस्तु सुग्रीवः प्रघसेन समागतः । (१०।१)

संगतः समरे श्रीमान् विरूपाक्षेण लक्ष्मणः ॥ (१०।२)

अग्निकेतुश्च दुर्धर्षो रश्मिकेतुश्च राक्षसः । (११।१)

सुप्तघ्नो यज्ञकोपश्च रामेण सह संगताः ॥ (११।२)

वज्रमुष्टिस्तु मैन्देन द्विविदेनाशनिप्रभः । (१२।१)

राक्षसाभ्यां सुघोराभ्यां कपिमुख्यौ समागतौ ॥ (१२।२)

वीरः प्रतपनो घोरो राक्षसो रणदुर्धरः । (१३।१)

समरे तीक्ष्णवेगेन नलेन समयुध्यत ॥ (१३।२)

धर्मस्य पुत्रो बलवान् सुषेण इति विश्रुतः । (१४।१)

स विद्युन्मालिना सार्धम् अयुध्यत महाकपिः ॥ (१४।२)

वानराश्चापरे भीमा राक्षसैर् अपरैः सह । (१५।१)

द्वन्द्वं समीयुर् बहुधा युद्धाय बहुभिः सह ॥ (१५।२)

तत्रासीत् सुमहद् युद्धं तुमुलं लोमहर्षणम् । (१६।१)

रक्षसां वानराणां च वीराणां जयम् इच्छताम् ॥ (१६।२)

हरिराक्षसदेहेभ्यः प्रसृताः केशशाड्वलाः । (१७।१)

शरीरसंघाटवहाः प्रसुस्रुः शोणितापगाः ॥ (१७।२)

आजघानेन्द्रजित् क्रुद्धो वज्रेणेव शतक्रतुः । (१८।१)

अङ्गदं गदया वीरं शत्रुसैन्यविदारणम् ॥ (१८।२)

तस्य काञ्चनचित्राङ्गं रथं साश्वं ससारथिम् । (१९।१)

जघान समरे श्रीमान् अङ्गदो वेगवान् कपिः ॥ (१९।२)

संपातिस्तु त्रिभिर् बाणैः प्रजङ्घेन समाहतः । (२०।१)

निजघानाश्वकर्णेन प्रजङ्घं रणमूर्धनि ॥ (२०।२)

जम्बूमाली रथस्थस्तु रथशक्त्या महाबलः । (२१।१)

बिभेद समरे क्रुद्धो हनूमन्तं स्तनान्तरे ॥ (२१।२)

तस्य तं रथम् आस्थाय हनूमान्मारुतात्मजः । (२२।१)

प्रममाथ तलेनाशु सह तेनैव रक्षसा ॥ (२२।२)

भिन्नगात्रः शरैस्तीक्ष्णैः क्षिप्रहस्तेन रक्षसा । (२३।१)

प्रजघानाद्रिशृङ्गेण तपनं मुष्टिना गजः ॥ (२३।२)

ग्रसन्तम् इव सैन्यानि प्रघसं वानराधिपः । (२४।१)

सुग्रीवः सप्तपर्णेन निर्बिभेद जघान च ॥ (२४।२)

प्रपीड्य शरवर्षेण राक्षसं भीमदर्शनम् । (२५।१)

निजघान विरूपाक्षं शरेणैकेन लक्ष्मणः ॥ (२५।२)

अग्निकेतुश्च दुर्धर्षो रश्मिकेतुश्च राक्षसः । (२६।१)

सुप्तघ्नो यज्ञकोपश्च रामं निर्बिभिदुः शरैः ॥ (२६।२)

तेषां चतुर्णां रामस्तु शिरांसि समरे शरैः । (२७।१)

क्रुद्धश्चतुर्भिश्चिछेद घोरैर् अग्निशिखोपमैः ॥ (२७।२)

वज्रमुष्टिस्तु मैन्देन मुष्टिना निहतो रणे । (२८।१)

पपात सरथः साश्वः पुराट्ट इव भूतले ॥ (२८।२)

वज्राशनिसमस्पर्शो द्विविदो ऽप्यशनिप्रभम् । (२९।१)

जघान गिरिशृङ्गेण मिषतां सर्वरक्षसाम् ॥ (२९।२)

द्विविदं वानरेन्द्रं तु द्रुमयोधिनम् आहवे । (३०।१)

शरैर् अशनिसंकाशैः स विव्याधाशनिप्रभः ॥ (३०।२)

स शरैर् अतिविद्धाङ्गो द्विविदः क्रोधमूर्छितः । (३१।१)

सालेन सरथं साश्वं निजघानाशनिप्रभम् ॥ (३१।२)

निकुम्भस्तु रणे नीलं नीलाञ्जनचयप्रभम् । (३२।१)

निर्बिभेद शरैस्तीक्ष्णैः करैर् मेघम् इवांशुमान् ॥ (३२।२)

पुनः शरशतेनाथ क्षिप्रहस्तो निशाचरः । (३३।१)

बिभेद समरे नीलं निकुम्भः प्रजहास च ॥ (३३।२)

तस्यैव रथचक्रेण नीलो विष्णुर् इवाहवे । (३४।१)

शिरश्चिछेद समरे निकुम्भस्य च सारथेः ॥ (३४।२)

विद्युन्माली रथस्थस्तु शरैः काञ्चनभूषणैः । (३५।१)

सुषेणं ताडयामास ननाद च मुहुर् मुहुः ॥ (३५।२)

तं रथस्थम् अथो दृष्ट्वा सुषेणो वानरोत्तमः । (३६।१)

गिरिशृङ्गेण महता रथम् आशु न्यपातयत् ॥ (३६।२)

लाघवेन तु संयुक्तो विद्युन्माली निशाचरः । (३७।१)

अपक्रम्य रथात् तूर्णं गदापाणिः क्षितौ स्थितः ॥ (३७।२)

ततः क्रोधसमाविष्टः सुषेणो हरिपुंगवः । (३८।१)

शिलां सुमहतीं गृह्य निशाचरम् अभिद्रवत् ॥ (३८।२)

तम् आपतन्तं गदया विद्युन्माली निशाचरः । (३९।१)

वक्षस्यभिजघानाशु सुषेणं हरिसत्तमम् ॥ (३९।२)

गदाप्रहारं तं घोरम् अचिन्त्य प्लवगोत्तमः । (४०।१)

तां शिलां पातयामास तस्योरसि महामृधे ॥ (४०।२)

शिलाप्रहाराभिहतो विद्युन्माली निशाचरः । (४१।१)

निष्पिष्टहृदयो भूमौ गतासुर् निपपात ह ॥ (४१।२)

एवं तैर् वानरैः शूरैः शूरास्ते रजनीचराः । (४२।१)

द्वन्द्वे विमृदितास्तत्र दैत्या इव दिवौकसैः ॥ (४२।२)

भल्लैः खड्गैर् गदाभिश्च शक्तितोमरपट्टसैः । (४३।१)

अपविद्धश्च भिन्नश्च रथैः सांग्रामिकैर् हयैः ॥ (४३।२)

निहतैः कुञ्जरैर् मत्तैस्तथा वानरराक्षसैः । (४४।१)

चक्राक्षयुगदण्डैश्च भग्नैर् धरणिसंश्रितैः । (४४।२)

बभूवायोधनं घोरं गोमायुगणसेवितम् ॥ (४४।३)

कबन्धानि समुत्पेतुर् दिक्षु वानररक्षसाम् । (४५।१)

विमर्दे तुमुले तस्मिन् देवासुररणोपमे ॥ (४५।२)

विदार्यमाणा हरिपुंगवैस्तदा निशाचराः शोणितदिग्धगात्राः । (४६।१)

पुनः सुयुद्धं तरसा समाश्रिता दिवाकरस्यास्तमयाभिकाङ्क्षिणः ॥ (४६।२)