शृणु राम महाबाहो यदर्थम् अहम् आगतः । (१।१)

पितामहेन देवेन प्रेषितो ऽस्मि महाबल ॥ (१।२)

तवाहं पूर्वके भावे पुत्रः परपुरंजय । (२।१)

मायासंभावितो वीर कालः सर्वसमाहरः ॥ (२।२)

पितामहश्च भगवान् आह लोकपतिः प्रभुः । (३।१)

समयस्ते महाबाहो स्वर्लोकान् परिरक्षितुम् ॥ (३।२)

संक्षिप्य च पुरा लोकान्मायया स्वयम् एव हि । (४।१)

महार्णवे शयानो ऽप्सु मां त्वं पूर्वम् अजीजनः ॥ (४।२)

भोगवन्तं ततो नागम् अनन्तम् उदके शयम् । (५।१)

मायया जनयित्वा त्वं द्वौ च सत्त्वौ महाबलौ ॥ (५।२)

मधुं च कैटभं चैव ययोर् अस्थिचयैर् वृता । (६।१)

इयं पर्वतसंबाधा मेदिनी चाभवन्मही ॥ (६।२)

पद्मे दिव्यार्कसंकाशे नाभ्याम् उत्पाद्य माम् अपि । (७।१)

प्राजापत्यं त्वया कर्म सर्वं मयि निवेशितम् ॥ (७।२)

सो ऽहं संन्यस्तभारो हि त्वाम् उपासे जगत्पतिम् । (८।१)

रक्षां विधत्स्व भूतेषु मम तेजस्करो भवान् ॥ (८।२)

ततस्त्वम् अपि दुर्धर्षस्तस्माद् भावात् सनातनात् । (९।१)

रक्षार्थं सर्वभूतानां विष्णुत्वम् उपजग्मिवान् ॥ (९।२)

अदित्यां वीर्यवान् पुत्रो भ्रातॄणां हर्षवर्धनः । (१०।१)

समुत्पन्नेषु कृत्येषु लोकसाह्याय कल्पसे ॥ (१०।२)

स त्वं वित्रास्यमानासु प्रजासु जगतां वर । (११।१)

रावणस्य वधाकाङ्क्षी मानुषेषु मनो ऽदधाः ॥ (११।२)

दशवर्षसहस्राणि दशवर्षशतानि च । (१२।१)

कृत्वा वासस्य नियतिं स्वयम् एवात्मनः पुरा ॥ (१२।२)

स त्वं मनोमयः पुत्रः पूर्णायुर् मानुषेष्विह । (१३।१)

कालो नरवरश्रेष्ठ समीपम् उपवर्तितुम् ॥ (१३।२)

यदि भूयो महाराज प्रजा इच्छस्युपासितुम् । (१४।१)

वस वा वीर भद्रं ते एवम् आह पितामहः ॥ (१४।२)

अथ वा विजिगीषा ते सुरलोकाय राघव । (१५।१)

सनाथा विष्णुना देवा भवन्तु विगतज्वराः ॥ (१५।२)

श्रुत्वा पितामहेनोक्तं वाक्यं कालसमीरितम् । (१६।१)

राघवः प्रहसन् वाक्यं सर्वसंहारम् अब्रवीत् ॥ (१६।२)

श्रुतं मे देवदेवस्य वाक्यं परमम् अद्भुतम् । (१७।१)

प्रीतिर् हि महती जाता तवागमनसंभवा ॥ (१७।२)

भद्रं ते ऽस्तु गमिष्यामि यत एवाहम् आगतः । (१८।१)

हृद्गतो ह्यसि सम्प्राप्तो न मे ऽस्त्यत्र विचारणा ॥ (१८।२)

मया हि सर्वकृत्येषु देवानां वशवर्तिनाम् । (१९।१)

स्थातव्यं सर्वसंहारे यथा ह्याह पितामहः ॥ (१९।२)