ततस्ते राक्षसेन्द्रेण चोदिता मन्त्रिणः सुताः । (१।१)

निर्ययुर् भवनात् तस्मात् सप्त सप्तार्चिवर्चसः ॥ (१।२)

महाबलपरीवारा धनुष्मन्तो महाबलाः । (२।१)

कृतास्त्रास्त्रविदां श्रेष्ठाः परस्परजयैषिणः ॥ (२।२)

हेमजालपरिक्षिप्तैर् ध्वजवद्भिः पताकिभिः । (३।१)

तोयदस्वननिर्घोषैर् वाजियुक्तैर् महारथैः ॥ (३।२)

तप्तकाञ्चनचित्राणि चापान्यमितविक्रमाः । (४।१)

विस्फारयन्तः संहृष्टास्तडिद्वन्त इवाम्बुदाः ॥ (४।२)

जनन्यस्तास्ततस्तेषां विदित्वा किंकरान् हतान् । (५।१)

बभूवुः शोकसंभ्रान्ताः सबान्धवसुहृज्जनाः ॥ (५।२)

ते परस्परसंघर्षास्तप्तकाञ्चनभूषणाः । (६।१)

अभिपेतुर् हनूमन्तं तोरणस्थम् अवस्थितम् ॥ (६।२)

सृजन्तो बाणवृष्टिं ते रथगर्जितनिःस्वनाः । (७।१)

वृष्टिमन्त इवाम्भोदा विचेरुर् नैरृतर्षभाः ॥ (७।२)

अवकीर्णस्ततस्ताभिर् हनूमाञ् शरवृष्टिभिः । (८।१)

अभवत् संवृताकारः शैलराड् इव वृष्टिभिः ॥ (८।२)

स शरान् वञ्चयामास तेषाम् आशुचरः कपिः । (९।१)

रथवेगांश्च वीराणां विचरन् विमले ऽम्बरे ॥ (९।२)

स तैः क्रीडन् धनुष्मद्भिर् व्योम्नि वीरः प्रकाशते । (१०।१)

धनुष्मद्भिर् यथा मेघैर् मारुतः प्रभुर् अम्बरे ॥ (१०।२)

स कृत्वा निनदं घोरं त्रासयंस्तां महाचमूम् । (११।१)

चकार हनुमान् वेगं तेषु रक्षःसु वीर्यवान् ॥ (११।२)

तलेनाभिहनत् कांश्चित् पादैः कांश्चित् परंतपः । (१२।१)

मुष्टिनाभ्यहनत् कांश्चिन् नखैः कांश्चिद् व्यदारयत् ॥ (१२।२)

प्रममाथोरसा कांश्चिद् ऊरुभ्याम् अपरान् कपिः । (१३।१)

केचित् तस्यैव नादेन तत्रैव पतिता भुवि ॥ (१३।२)

ततस्तेष्ववपन्नेषु भूमौ निपतितेषु च । (१४।१)

तत् सैन्यम् अगमत् सर्वं दिशो दश भयार्दितम् ॥ (१४।२)

विनेदुर् विस्वरं नागा निपेतुर् भुवि वाजिनः । (१५।१)

भग्ननीडध्वजच्छत्रैर् भूश्च कीर्णाभवद् रथैः ॥ (१५।२)

स तान् प्रवृद्धान् विनिहत्य राक्षसान् महाबलश्चण्डपराक्रमः कपिः । (१६।१)

युयुत्सुर् अन्यैः पुनर् एव राक्षसैस् तद् एव वीरो ऽभिजगाम तोरणम् ॥ (१६।२)