तथा वसिष्ठे ब्रुवति राजा दशरथः सुतम् । (१।१)

प्रहृष्टवदनो रामम् आजुहाव सलक्ष्मणम् ॥ (१।२)

कृतस्वस्त्ययनं मात्रा पित्रा दशरथेन च । (२।१)

पुरोधसा वसिष्ठेन मङ्गलैर् अभिमन्त्रितम् ॥ (२।२)

स पुत्रं मूर्ध्न्य् उपाघ्राय राजा दशरथः प्रियम् । (३।१)

ददौ कुशिकपुत्राय सुप्रीतेनान्तरात्मना ॥ (३।२)

ततो वायुः सुखस्पर्शो विरजस्को ववौ तदा । (४।१)

विश्वामित्रगतं रामं दृष्ट्वा राजीवलोचनम् ॥ (४।२)

पुष्पवृष्टिर् महत्य् आसीद् देवदुन्दुभिनिस्वनः । (५।१)

शङ्खदुन्दुभिनिर्घोषः प्रयाते तु महात्मनि ॥ (५।२)

विश्वामित्रो ययाव् अग्रे ततो रामो महायशाः । (६।१)

काकपक्षधरो धन्वी तं च सौमित्रिर् अन्वगात् ॥ (६।२)

कलापिनौ धनुष्पाणी शोभयानौ दिशो दश । (७।१)

विश्वामित्रं महात्मानं त्रिशीर्षाव् इव पन्नगौ । (७।२)

अनुजग्मतुर् अक्षुद्रौ पितामहम् इवाश्विनौ ॥ (७।३)

बद्धगोधाङ्गुलित्राणौ खड्गवन्तौ महाद्युती । (८।१)

स्थाणुं देवम् इवाचिन्त्यं कुमाराव् इव पावकी ॥ (८।२)

अध्यर्धयोजनं गत्वा सरय्वा दक्षिणे तटे । (९।१)

रामेति मधुरां वाणीं विश्वामित्रो ऽभ्यभाषत ॥ (९।२)

गृहाण वत्स सलिलं मा भूत् कालस्य पर्ययः । (१०।१)

मन्त्रग्रामं गृहाण त्वं बलाम् अतिबलां तथा ॥ (१०।२)

न श्रमो न ज्वरो वा ते न रूपस्य विपर्ययः । (११।१)

न च सुप्तं प्रमत्तं वा धर्षयिष्यन्ति नैरृताः ॥ (११।२)

न बाह्वोः सदृशो वीर्ये पृथिव्याम् अस्ति कश्चन । (१२।१)

त्रिषु लोकेषु वा राम न भवेत् सदृशस् तव ॥ (१२।२)

न सौभाग्ये न दाक्षिण्ये न ज्ञाने बुद्धिनिश्चये । (१३।१)

नोत्तरे प्रतिपत्तव्यः समो लोके तवानघ ॥ (१३।२)

एतद्विद्याद्वये लब्धे भविता नास्ति ते समः । (१४।१)

बला चातिबला चैव सर्वज्ञानस्य मातरौ ॥ (१४।२)

क्षुत्पिपासे न ते राम भविष्येते नरोत्तम । (१५।१)

बलाम् अतिबलां चैव पठतः पथि राघव । (१५।२)

विद्याद्वयम् अधीयाने यशश् चाप्य् अतुलं भुवि ॥ (१५।३)

पितामहसुते ह्य् एते विद्ये तेजःसमन्विते । (१६।१)

प्रदातुं तव काकुत्स्थ सदृशस् त्वं हि धार्मिक ॥ (१६।२)

कामं बहुगुणाः सर्वे त्वय्य् एते नात्र संशयः । (१७।१)

तपसा संभृते चैते बहुरूपे भविष्यतः ॥ (१७।२)

ततो रामो जलं स्पृष्ट्वा प्रहृष्टवदनः शुचिः । (१८।१)

प्रतिजग्राह ते विद्ये महर्षेर् भावितात्मनः । (१८।२)

विद्यासमुदितो रामः शुशुभे भूरिविक्रमः ॥ (१८।३)

गुरुकार्याणि सर्वाणि नियुज्य कुशिकात्मजे । (१९।१)

ऊषुस् तां रजनीं तत्र सरय्वां सुसुखं त्रयः ॥ (१९।२)