स विसृज्य ततो रामः पुष्पकं हेमभूषितम् । (१।१)

प्रविवेश महाबाहुर् अशोकवनिकां तदा ॥ (१।२)

चन्दनागरुचूतैश्च तुङ्गकालेयकैर् अपि । (२।१)

देवदारुवनैश्चापि समन्ताद् उपशोभिताम् ॥ (२।२)

प्रियङ्गुभिः कदम्बैश्च तथा कुरबकैर् अपि । (३।१)

जम्बूभिः पाटलीभिश्च कोविदारैश्च संवृताम् ॥ (३।२)

सर्वदा कुसुमै रम्यैः फलवद्भिर् मनोरमैः । (४।१)

चारुपल्लवपुष्पाढ्यैर् मत्तभ्रमरसंकुलैः ॥ (४।२)

कोकिलैर् भृङ्गराजैश्च नानावर्णैश्च पक्षिभिः । (५।१)

शोभितां शतशश्चित्रैश्चूतवृक्षावतंसकैः ॥ (५।२)

शातकुम्भनिभाः केचित् केचिद् अग्निशिखोपमाः । (६।१)

नीलाञ्जननिभाश्चान्ये भान्ति तत्र स्म पादपाः ॥ (६।२)

दीर्घिका विविधाकाराः पूर्णाः परमवारिणा । (७।१)

महार्हमणिसोपानस्फटिकान्तरकुट्टिमाः ॥ (७।२)

फुल्लपद्मोत्पलवनाश्चक्रवाकोपशोभिताः । (८।१)

प्राकारैर् विविधाकारैः शोभिताश्च शिलातलैः ॥ (८।२)

तत्र तत्र वनोद्देशे वैदूर्यमणिसंनिभैः । (९।१)

शाद्वलैः परमोपेताः पुष्पितद्रुमसंयुताः ॥ (९।२)

नन्दनं हि यथेन्द्रस्य ब्राह्मं चैत्ररथं यथा । (१०।१)

तथारूपं हि रामस्य काननं तन्निवेशितम् ॥ (१०।२)

बह्वासनगृहोपेतां लतागृहसमावृताम् । (११।१)

अशोकवनिकां स्फीतां प्रविश्य रघुनन्दनः ॥ (११।२)

आसने तु शुभाकारे पुष्पस्तबकभूषिते । (१२।१)

कुथास्तरणसंवीते रामः संनिषसाद ह ॥ (१२।२)

सीतां संगृह्य बाहुभ्यां मधुमैरेयम् उत्तमम् । (१३।१)

पाययामास काकुत्स्थः शचीम् इन्द्रो यथामृतम् ॥ (१३।२)

मांसानि च विचित्राणि फलानि विविधानि च । (१४।१)

रामस्याभ्यवहारार्थं किंकरास्तूर्णम् आहरन् ॥ (१४।२)

उपनृत्यन्ति राजानं नृत्यगीतविशारदाः । (१५।१)

बालाश्च रूपवत्यश्च स्त्रियः पानवशं गताः ॥ (१५।२)

एवं रामो मुदा युक्ता सीतां सुरुचिराननाम् । (१६।१)

रमयामास वैदेहीम् अहन्यहनि देववत् ॥ (१६।२)

तथा तु रममाणस्य तस्यैवं शिशिरः शुभः । (१७।१)

अत्यक्रामन्नरेन्द्रस्य राघवस्य महात्मनः ॥ (१७।२)

पूर्वाह्णे पौरकृत्यानि कृत्वा धर्मेण धर्मवित् । (१८।१)

शेषं दिवसभागार्धम् अन्तःपुरगतो ऽभवत् ॥ (१८।२)

सीता च देवकार्याणि कृत्वा पौर्वाह्णिकानि तु । (१९।१)

श्वश्रूणाम् अविशेषेण सर्वासां प्राञ्जलिः स्थिता ॥ (१९।२)

ततो रामम् उपागच्छद् विचित्रबहुभूषणा । (२०।१)

त्रिविष्टपे सहस्राक्षम् उपविष्टं यथा शची ॥ (२०।२)

दृष्ट्वा तु राघवः पत्नीं कल्याणेन समन्विताम् । (२१।१)

प्रहर्षम् अतुलं लेभे साधु साध्विति चाब्रवीत् ॥ (२१।२)

अपत्यलाभो वैदेहि ममायं समुपस्थितः । (२२।१)

किम् इच्छसि हि तद् ब्रूहि कः कामः क्रियतां तव ॥ (२२।२)

प्रहसन्ती तु वैदेही रामं वाक्यम् अथाब्रवीत् । (२३।१)

तपोवनानि पुण्यानि द्रष्टुम् इच्छामि राघव ॥ (२३।२)

गङ्गातीरे निविष्टानि ऋषीणां पुण्यकर्मणाम् । (२४।१)

फलमूलाशिनां वीर पादमूलेषु वर्तितुम् ॥ (२४।२)

एष मे परमः कामो यन्मूलफलभोजिषु । (२५।१)

अप्येकरात्रं काकुत्स्थ वसेयं पुण्यशालिषु ॥ (२५।२)

तथेति च प्रतिज्ञातं रामेणाक्लिष्टकर्मणा । (२६।१)

विश्रब्धा भव वैदेहि श्वो गमिष्यस्यसंशयम् ॥ (२६।२)

एवम् उक्त्वा तु काकुत्स्थो मैथिलीं जनकात्मजाम् । (२७।१)

मध्यकक्षान्तरं रामो निर्जगाम सुहृद्वृतः ॥ (२७।२)