स तस्य गतिम् अन्विच्छन् राजपुत्रः प्रतापवान् । (१।१)

दिदेशातिबलो रामो दशवानरयूथपान् ॥ (१।२)

द्वौ सुषेणस्य दायादौ नीलं च प्लवगर्षभम् । (२।१)

अङ्गदं वालिपुत्रं च शरभं च तरस्विनम् ॥ (२।२)

विनतं जाम्बवन्तं च सानुप्रस्थं महाबलम् । (३।१)

ऋषभं चर्षभस्कन्धम् आदिदेश परंतपः ॥ (३।२)

ते सम्प्रहृष्टा हरयो भीमान् उद्यम्य पादपान् । (४।१)

आकाशं विविशुः सर्वे मार्गमाणा दिशो दश ॥ (४।२)

तेषां वेगवतां वेगम् इषुभिर् वेगवत्तरैः । (५।१)

अस्त्रवित् परमास्त्रेण वारयामास रावणिः ॥ (५।२)

तं भीमवेगा हरयो नाराचैः क्षतविक्षताः । (६।१)

अन्धकारे न ददृशुर् मेघैः सूर्यम् इवावृतम् ॥ (६।२)

रामलक्ष्मणयोर् एव सर्वमर्मभिदः शरान् । (७।१)

भृशम् आवेशयामास रावणिः समितिंजयः ॥ (७।२)

निरन्तरशरीरौ तु भ्रातरौ रामलक्ष्मणौ । (८।१)

क्रुद्धेनेन्द्रजिता वीरौ पन्नगैः शरतां गतैः ॥ (८।२)

तयोः क्षतजमार्गेण सुस्राव रुधिरं बहु । (९।१)

तावुभौ च प्रकाशेते पुष्पिताविव किंशुकौ ॥ (९।२)

ततः पर्यन्तरक्ताक्षो भिन्नाञ्जनचयोपमः । (१०।१)

रावणिर् भ्रातरौ वाक्यम् अन्तर्धानगतो ऽब्रवीत् ॥ (१०।२)

युध्यमानम् अनालक्ष्यं शक्रो ऽपि त्रिदशेश्वरः । (११।१)

द्रष्टुम् आसादितुं वापि न शक्तः किं पुनर् युवाम् ॥ (११।२)

प्रावृताविषुजालेन राघवौ कङ्कपत्त्रिणा । (१२।१)

एष रोषपरीतात्मा नयामि यमसादनम् ॥ (१२।२)

एवम् उक्त्वा तु धर्मज्ञौ भ्रातरौ रामलक्ष्मणौ । (१३।१)

निर्बिभेद शितैर् बाणैः प्रजहर्ष ननाद च ॥ (१३।२)

भिन्नाञ्जनचयश्यामो विस्फार्य विपुलं धनुः । (१४।१)

भूयो भूयः शरान् घोरान् विससर्ज महामृधे ॥ (१४।२)

ततो मर्मसु मर्मज्ञो मज्जयन्निशिताञ् शरान् । (१५।१)

रामलक्ष्मणयोर् वीरो ननाद च मुहुर् मुहुः ॥ (१५।२)

बद्धौ तु शरबन्धेन तावुभौ रणमूर्धनि । (१६।१)

निमेषान्तरमात्रेण न शेकतुर् उदीक्षितुम् ॥ (१६।२)

ततो विभिन्नसर्वाङ्गौ शरशल्याचितावुभौ । (१७।१)

ध्वजाविव महेन्द्रस्य रज्जुमुक्तौ प्रकम्पितौ ॥ (१७।२)

तौ संप्रचलितौ वीरौ मर्मभेदेन कर्शितौ । (१८।१)

निपेततुर् महेष्वासौ जगत्यां जगतीपती ॥ (१८।२)

तौ वीरशयने वीरौ शयानौ रुधिरोक्षितौ । (१९।१)

शरवेष्टितसर्वाङ्गावार्तौ परमपीडितौ ॥ (१९।२)

न ह्यविद्धं तयोर् गात्रं बभूवाङ्गुलम् अन्तरम् । (२०।१)

नानिर्भिन्नं न चास्तब्धम् आ कराग्राद् अजिह्मगैः ॥ (२०।२)

तौ तु क्रूरेण निहतौ रक्षसा कामरूपिणा । (२१।१)

असृक्सुस्रुवतुस्तीव्रं जलं प्रस्रवणाविव ॥ (२१।२)

पपात प्रथमं रामो विद्धो मर्मसु मार्गणैः । (२२।१)

क्रोधाद् इन्द्रजिता येन पुरा शक्रो विनिर्जितः ॥ (२२।२)

नाराचैर् अर्धनाराचैर् भल्लैर् अञ्जलिकैर् अपि । (२३।१)

विव्याध वत्सदन्तैश्च सिंहदंष्ट्रैः क्षुरैस्तथा ॥ (२३।२)

स वीरशयने शिश्ये विज्यम् आदाय कार्मुकम् । (२४।१)

भिन्नमुष्टिपरीणाहं त्रिणतं रुक्मभूषितम् ॥ (२४।२)

बाणपातान्तरे रामं पतितं पुरुषर्षभम् । (२५।१)

स तत्र लक्ष्मणो दृष्ट्वा निराशो जीविते ऽभवत् ॥ (२५।२)

बद्धौ तु वीरौ पतितौ शयानौ तौ वानराः संपरिवार्य तस्थुः । (२६।१)

समागता वायुसुतप्रमुख्या विषादम् आर्ताः परमं च जग्मुः ॥ (२६।२)