एवम् उक्त्वा तु काकुत्स्थं प्रशस्य च पुनः पुनः । (१।१)

पुनर् एवापरं वाक्यम् उवाच रघुनन्दनः ॥ (१।२)

इमान्यश्वसहस्राणि चत्वारि पुरुषर्षभ । (२।१)

रथानां च सहस्रे द्वे गजानां शतम् एव च ॥ (२।२)

अन्तरापणवीथ्यश्च नानापण्योपशोभिताः । (३।१)

अनुगच्छन्तु शत्रुघ्न तथैव नटनर्तकाः ॥ (३।२)

हिरण्यस्य सुवर्णस्य अयुतं पुरुषर्षभ । (४।१)

गृहीत्वा गच्छ शत्रुघ्न पर्याप्तधनवाहनः ॥ (४।२)

बलं च सुभृतं वीर हृष्टपुष्टम् अनुत्तमम् । (५।१)

सम्भाष्य संप्रदानेन रञ्जयस्व नरोत्तम ॥ (५।२)

न ह्यर्थास्तत्र तिष्ठन्ति न दारा न च बान्धवाः । (६।१)

सुप्रीतो भृत्यवर्गस्तु यत्र तिष्ठति राघव ॥ (६।२)

अतो हृष्टजनाकीर्णां प्रस्थाप्य महतीं चमूम् । (७।१)

एक एव धनुष्पाणिस्तद् गच्छ त्वं मधोर् वनम् ॥ (७।२)

यथा त्वां न प्रजानाति गच्छन्तं युद्धकाङ्क्षिणम् । (८।१)

लवणस्तु मधोः पुत्रस्तथा गच्छेर् अशङ्कितः ॥ (८।२)

न तस्य मृत्युर् अन्यो ऽस्ति कश्चिद्धि पुरुषर्षभ । (९।१)

दर्शनं यो ऽभिगच्छेत स वध्यो लवणेन हि ॥ (९।२)

स ग्रीष्मे व्यपयाते तु वर्षरात्र उपस्थिते । (१०।१)

हन्यास्त्वं लवणं सौम्य स हि कालो ऽस्य दुर्मतेः ॥ (१०।२)

महर्षींस्तु पुरस्कृत्य प्रयान्तु तव सैनिकाः । (११।१)

यथा ग्रीष्मावशेषेण तरेयुर् जाह्नवीजलम् ॥ (११।२)

ततः स्थाप्य बलं सर्वं नदीतीरे समाहितः । (१२।१)

अग्रतो धनुषा सार्धं गच्छ त्वं लघुविक्रम ॥ (१२।२)

एवम् उक्तस्तु रामेण शत्रुघ्नस्तान् महाबलान् । (१३।१)

सेनामुख्यान् समानीय ततो वाक्यम् उवाच ह ॥ (१३।२)

एते वो गणिता वासा यत्र यत्र निवत्स्यथ । (१४।१)

स्थातव्यं चाविरोधेन यथा बाधा न कस्यचित् ॥ (१४।२)

तथा तांस्तु समाज्ञाप्य निर्याप्य च महद् बलम् । (१५।१)

कौसल्यां च सुमित्रां च कैकेयीं चाभ्यवादयत् ॥ (१५।२)

रामं प्रदक्षिणं कृत्वा शिरसाभिप्रणम्य च । (१६।१)

रामेण चाभ्यनुज्ञातः शत्रुघ्नः शत्रुतापनः ॥ (१६।२)

लक्ष्मणं भरतं चैव प्रणिपत्य कृताञ्जलिः । (१७।१)

पुरोधसं वसिष्ठं च शत्रुघ्नः प्रयतात्मवान् । (१७।२)

प्रदक्षिणम् अथो कृत्वा निर्जगाम महाबलः ॥ (१७।३)