उपस्थितं तु तं दृष्ट्वा पुष्पकं पुष्पभूषितम् । (१।१)

अविदूरे स्थितं रामं प्रत्युवाच विभीषणः ॥ (१।२)

स तु बद्धाञ्जलिः प्रह्वो विनीतो राक्षसेश्वरः । (२।१)

अब्रवीत् त्वरयोपेतः किं करोमीति राघवम् ॥ (२।२)

तम् अब्रवीन्महातेजा लक्ष्मणस्योपशृण्वतः । (३।१)

विमृश्य राघवो वाक्यम् इदं स्नेहपुरस्कृतम् ॥ (३।२)

कृतप्रयत्नकर्माणो विभीषण वनौकसः । (४।१)

रत्नैर् अर्थैश्च विविधैर् भूषणैश्चाभिपूजय ॥ (४।२)

सहैभिर् अर्दिता लङ्का निर्जिता राक्षसेश्वर । (५।१)

हृष्टैः प्राणभयं त्यक्त्वा संग्रामेष्वनिवर्तिभिः ॥ (५।२)

एवं संमानिताश्चेमे मानार्हा मानद त्वया । (६।१)

भविष्यन्ति कृतज्ञेन निर्वृता हरियूथपाः ॥ (६।२)

त्यागिनं संग्रहीतारं सानुक्रोशं यशस्विनम् । (७।१)

यतस्त्वाम् अवगच्छन्ति ततः संबोधयामि ते ॥ (७।२)

एवम् उक्तस्तु रामेण वानरांस्तान् विभीषणः । (८।१)

रत्नार्थैः संविभागेन सर्वान् एवान्वपूजयत् ॥ (८।२)

ततस्तान् पूजितान् दृष्ट्वा रत्नैर् अर्थैश्च यूथपान् । (९।१)

आरुरोह ततो रामस्तद् विमानम् अनुत्तमम् ॥ (९।२)

अङ्केनादाय वैदेहीं लज्जमानां यशस्विनीम् । (१०।१)

लक्ष्मणेन सह भ्रात्रा विक्रान्तेन धनुष्मता ॥ (१०।२)

अब्रवीच्च विमानस्थः काकुत्स्थः सर्ववानरान् । (११।१)

सुग्रीवं च महावीर्यं राक्षसं च विभीषणम् ॥ (११।२)

मित्रकार्यं कृतम् इदं भवद्भिर् वानरोत्तमाः । (१२।१)

अनुज्ञाता मया सर्वे यथेष्टं प्रतिगच्छत ॥ (१२।२)

यत् तु कार्यं वयस्येन सुहृदा वा परंतप । (१३।१)

कृतं सुग्रीव तत् सर्वं भवता धर्मभीरुणा । (१३।२)

किष्किन्धां प्रतियाह्याशु स्वसैन्येनाभिसंवृतः ॥ (१३।३)

स्वराज्ये वस लङ्कायां मया दत्ते विभीषण । (१४।१)

न त्वां धर्षयितुं शक्ताः सेन्द्रा अपि दिवौकसः ॥ (१४।२)

अयोध्यां प्रतियास्यामि राजधानीं पितुर् मम । (१५।१)

अभ्यनुज्ञातुम् इच्छामि सर्वान् आमन्त्रयामि वः ॥ (१५।२)

एवम् उक्तास्तु रामेण वानरास्ते महाबलाः । (१६।१)

ऊचुः प्राञ्जलयो रामं राक्षसश्च विभीषणः । (१६।२)

अयोध्यां गन्तुम् इच्छामः सर्वान्नयतु नो भवान् ॥ (१६।३)

दृष्ट्वा त्वाम् अभिषेकार्द्रं कौसल्याम् अभिवाद्य च । (१७।१)

अचिरेणागमिष्यामः स्वान् गृहान्नृपतेः सुत ॥ (१७।२)

एवम् उक्तस्तु धर्मात्मा वानरैः सविभीषणैः । (१८।१)

अब्रवीद् राघवः श्रीमान् ससुग्रीवविभीषणान् ॥ (१८।२)

प्रियात् प्रियतरं लब्धं यद् अहं ससुहृज्जनः । (१९।१)

सर्वैर् भवद्भिः सहितः प्रीतिं लप्स्ये पुरीं गतः ॥ (१९।२)

क्षिप्रम् आरोह सुग्रीव विमानं वानरैः सह । (२०।१)

त्वम् अध्यारोह सामात्यो राक्षसेन्द्र विभीषण ॥ (२०।२)

ततस्तत् पुष्पकं दिव्यं सुग्रीवः सह सेनया । (२१।१)

अध्यारोहत् त्वरञ् शीघ्रं सामात्यश्च विभीषणः ॥ (२१।२)

तेष्वारूढेषु सर्वेषु कौबेरं परमासनम् । (२२।१)

राघवेणाभ्यनुज्ञातम् उत्पपात विहायसं ॥ (२२।२)

ययौ तेन विमानेन हंसयुक्तेन भास्वता । (२३।१)

प्रहृष्टश्च प्रतीतश्च बभौ रामः कुबेरवत् ॥ (२३।२)