दर्शनार्थं तु वैदेह्याः सर्वतः कपियूथपाः । (१।१)

व्यादिष्टाः कपिराजेन यथोक्तं जग्मुर् अञ्जसा ॥ (१।२)

सरांसि सरितः कक्षान् आकाशं नगराणि च । (२।१)

नदीदुर्गांस् तथा शैलान् विचिन्वन्ति समन्ततः ॥ (२।२)

सुग्रीवेण समाख्यातान् सर्वे वानरयूथपाः । (३।१)

प्रदेशान् प्रविचिन्वन्ति सशैलवनकाननान् ॥ (३।२)

विचिन्त्य दिवसं सर्वे सीताधिगमने धृताः । (४।१)

समायान्ति स्म मेदिन्यां निशाकालेषु वानराः ॥ (४।२)

सर्वर्तुकांश् च देशेषु वानराः सफलान् द्रुमान् । (५।१)

आसाद्य रजनीं शय्यां चक्रुः सर्वेष्व् अहःसु ते ॥ (५।२)

तद् अहः प्रथमं कृत्वा मासे प्रस्रवणं गताः । (६।१)

कपिराजेन संगम्य निराशाः कपियूथपाः ॥ (६।२)

विचित्य तु दिशं पूर्वां यथोक्तां सचिवैः सह । (७।१)

अदृष्ट्वा विनतः सीताम् आजगाम महाबलः ॥ (७।२)

उत्तरां तु दिशं सर्वां विचित्य स महाकपिः । (८।१)

आगतः सह सैन्येन वीरः शतबलिस् तदा ॥ (८।२)

सुषेणः पश्चिमाम् आशां विचित्य सह वानरैः । (९।१)

समेत्य मासे सम्पूर्णे सुग्रीवम् उपचक्रमे ॥ (९।२)

तं प्रस्रवणपृष्ठस्थं समासाद्याभिवाद्य च । (१०।१)

आसीनं सह रामेण सुग्रीवम् इदम् अब्रुवन् ॥ (१०।२)

विचिताः पर्वताः सर्वे वनानि नगराणि च । (११।१)

निम्नगाः सागरान्ताश् च सर्वे जनपदास् तथा ॥ (११।२)

गुहाश् च विचिताः सर्वा यास् त्वया परिकीर्तिताः । (१२।१)

विचिताश् च महागुल्मा लताविततसंतताः ॥ (१२।२)

गहनेषु च देशेषु दुर्गेषु विषमेषु च । (१३।१)

सत्त्वान्य् अतिप्रमाणानि विचितानि हतानि च । (१३।२)

ये चैव गहना देशा विचितास् ते पुनः पुनः ॥ (१३।३)

उदारसत्त्वाभिजनो महात्मा स मैथिलीं द्रक्ष्यति वानरेन्द्रः । (१४।१)

दिशं तु याम् एव गता तु सीता ताम् आस्थितो वायुसुतो हनूमान् ॥ (१४।२)