एतद् आख्याय काकुत्स्थो भ्रातृभ्याम् अमितप्रभः । (१।१)

लक्ष्मणं पुनर् एवाह धर्मयुक्तम् इदं वचः ॥ (१।२)

वसिष्ठं वामदेवं च जाबालिम् अथ कश्यपम् । (२।१)

द्विजांश्च सर्वप्रवरान् अश्वमेधपुरस्कृतान् ॥ (२।२)

एतान् सर्वान् समाहूय मन्त्रयित्वा च लक्ष्मण । (३।१)

हयं लक्ष्मणसम्पन्नं विमोक्ष्यामि समाधिना ॥ (३।२)

तद् वाक्यं राघवेणोक्तं श्रुत्वा त्वरितविक्रमः । (४।१)

द्विजान् सर्वान् समाहूय दर्शयामास राघवम् ॥ (४।२)

ते दृष्ट्वा देवसंकाशं कृतपादाभिवन्दनम् । (५।१)

राघवं सुदुराधर्षम् आशीर्भिः समपूजयन् ॥ (५।२)

प्राञ्जलिस्तु ततो भूत्वा राघवो द्विजसत्तमान् । (६।१)

उवाच धर्मसंयुक्तम् अश्वमेधाश्रितं वचः ॥ (६।२)

स तेषां द्विजमुख्यानां वाक्यम् अद्भुतदर्शनम् । (७।१)

अश्वमेधाश्रितं श्रुत्वा भृशं प्रीतो ऽभवत् तदा ॥ (७।२)

विज्ञाय तु मतं तेषां रामो लक्ष्मणम् अब्रवीत् । (८।१)

प्रेषयस्व महाबाहो सुग्रीवाय महात्मने ॥ (८।२)

शीघ्रं महद्भिर् हरिभिर् बहुभिश्च तदाश्रयैः । (९।१)

सार्धम् आगच्छ भद्रं ते अनुभोक्तुं मखोत्तमम् ॥ (९।२)

विभीषणश्च रक्षोभिः कामगैर् बहुभिर् वृतः । (१०।१)

अश्वमेधं महाबाहुः प्राप्नोतु लघुविक्रमः ॥ (१०।२)

राजानश्च नरव्याघ्र ये मे प्रियचिकीर्षवः । (११।१)

सानुगाः क्षिप्रम् आयान्तु यज्ञभूमिम् अनुत्तमाम् ॥ (११।२)

देशान्तरगता ये च द्विजा धर्मपरायणाः । (१२।१)

निमन्त्रयस्व तान् सर्वान् अश्वमेधाय लक्ष्मण ॥ (१२।२)

ऋषयश्च महाबाहो आहूयन्तां तपोधनाः । (१३।१)

देशान्तरगता ये च सदाराश्च महर्षयः ॥ (१३।२)

यज्ञवाटश्च सुमहान् गोमत्या नैमिषे वने । (१४।१)

आज्ञाप्यतां महाबाहो तद्धि पुण्यम् अनुत्तमम् ॥ (१४।२)

शतं वाहसहस्राणां तण्डुलानां वपुष्मताम् । (१५।१)

अयुतं तिलमुद्गस्य प्रयात्वग्रे महाबल ॥ (१५।२)

सुवर्णकोट्यो बहुला हिरण्यस्य शतोत्तराः । (१६।१)

अग्रतो भरतः कृत्वा गच्छत्वग्रे महामतिः ॥ (१६।२)

अन्तरापणवीथ्यश्च सर्वांश्च नटनर्तकान् । (१७।१)

नैगमान् बालवृद्धांश्च द्विजांश्च सुसमाहितान् ॥ (१७।२)

कर्मान्तिकांश्च कुशलाञ्शिल्पिनश्च सुपण्डितान् । (१८।१)

मातरश्चैव मे सर्वाः कुमारान्तःपुराणि च ॥ (१८।२)

काञ्चनीं मम पत्नीं च दीक्षार्हां यज्ञकर्मणि । (१९।१)

अग्रतो भरतः कृत्वा गच्छत्वग्रे महामतिः ॥ (१९।२)